Gavena Feliks yupu kot empo Pol
24
5pla kaire paiyi pekini se,
hetpris empo tempol noula wunini Ananaias empo yupone taunwamo Jerusalem ka palo paiyi taun Sisaria yakle nu ilauma wamfafai plai,
ka mana wongke fai namale lo empo nu Rom noula wunini Tertulus.
Nu uma namo nire painri nulu gavena Feliks fai nu ese kotim Pol.
2 Empo nu nouw Pol pari monre,
Tertulus yemei yeli ka yireni Gavena nanrona,
“Manawamo,
yene fai paiyi risi ka yangke ommo mingklari empo mewmew mu uporo wamo wi plele mee.
Ka ommo mingklari yene fai yangkeye namo ke yangke mu mulu nanrona ommo mingklari yene yemplekuru namo fei yukaine isi mu ka mu maime wolraulo.
3 Mu woluporo wamo empo nale namo nanrona fane empo mokoi mingklari ka empo nale wongkwongkeni mingklari mu mire mi uporo wamo paiyi yene.
4 Ki ese fei kuna yene waiyeye sa onne.
Ki kili yene,
yene afle wai ka yupu mi pitiri munini.
5 “Mana namo fai yangke nu Juda empo mokoi mingklari fai nopu mi ka naraine nopu none kore ka fai nangke ompla fafaile wamo.
Ka mu isi mulu ompla namo pu.
Wu mana fai paiyi risi nu uma fai nupene mana namo empo Nasaret.a
6-8 Wu yire yangke tempol nemei fafaile nama empo God ka empo nomu namo,
wola mu muna wu.b
Ka naimele yene yaline Pol mi empo ommo wu yangkeye.
Nanrona fane empo wu yirewi yene mi wunini,
yene ese namale nomu empo mi wunini empo mu kotim wu namo.”
9 Nu Juda napalnolo mi plola empo Tertulus ka nire nanrona,
“Mi empo wu yire namo,
sa wone alwone.”
Pol yoploni Feliks mi woneni
10 Empo Gavena mew kauka fai ese yuku nanrona Pol ese yoplo mi wunini,
Pol yire nanrona,
“Ki namale nanrona kikla mingklari painri pu,
yene waiye yukaine mana fai yupuye kot empo nu uma empo kantri namo.
Nanrona fane ki woluporo wamo fai ki ese koplo mi kinini yene ese yupu.
11 La empo yene yalile uma plai,
sa yene ese namale nanrona,
12pla kaire paiyi pu,
ki isi kali taunwamo Jerusalem ka kesapuke.
12 Nu uma empo mi nolone ki,
nu fei nulu ki kane mana wongke mopu mi tempol monre,
ka nu fei nulu ki kererkali nu uma empo nemnokune mow koli monre,
wee mokoi plai empo taunwamo mee.
Sam onne!
13 Nu ese fei nuku yene mi nomu empo nu kotimne ki namo.
14 “Ka,
ki ese samo kire mi alwone nanrona ki mana fai kupeneke Rokoic ka fai kosikaneke God,
nu mamimam munini fai nosinanene wu.
Ka nu Juda namo nire nanrona ompla namo sa wongkeni wamo.
Ki fai bilipim mi mingklari empo lo ka mi mingklari empo nu profet neꞌrene.
15 Ka ki fai bilip nanrona nu uma empo rili pu God ese yangke nu nemei kore.
Ka empo taim namo nu uma God wone yulu nu nanrona uporo ka nu uma God wone yulu nu nanrona fafaile ese nemei plau.
Nu uma empo kotim ki,
nu re empo bilip ompla namo ka nu noru God ese yangke nanrona.
16 Nanrona fane empo kaire mingklari ki fai amparpunu kangke ommo uporo nama empo God.
Ka nama empo nu pinuma re ese namale nanrona ki fai kangke ommo uporo.
17 “Isi ki kupone taunwamo Jerusalem ka kaiki kaike mokoi plai.
Nanrona fane naimele ki koloki kore ese kale romaula plai nu uma empo ommo onne.
Ka ki re kire kangke ofa plai kinini.
18 Ki kaike kangke ofa kinini tempol monre,
nanrona fane ki kupene nale empo namkile nama empo God se,
ka empo ki kangke ofa pekimo,
nu noloni nane ki.
Ka ki fei kakle nu pinuma mingklari maime plau ka nu fei nangke nale fafaile wongke ka nu fei wewela.
19 Namo sa nu Juda plai empo provins Esia isi nangke fafaile nanrona ki.
Nanrona fane la nu nire nuna mi plai none ese noloni neli risi yene ka nu ese kotim ki.
20 La empo onne,
nu uma empo naine mee ese samo nire mi alwone empo ompla fika fafaile nu uma empo kot wamo empo nu Juda namo isi napu ki empo ki keli nama empo nu.
21 Empo fika ompla wokera nro ki isi kangke empo ki keli nama nunini ka koplo mi kinini.
Empo taim namo,
ki isi kangke mi kelo wamo ka ki kire nanrona,
‘Ki fai samo bilip nanrona God ese yangke nu uma empo rili pu ese nemei kore.
Nanrona fane ki keli pone ungklamayen mee ka nu kotim ki.’ ”
22 Feliks sa namale pu ompla fika nu pinuma fai bilipne ka nupenene Rokoi empo Manawamo fai nangkene.
Nanrona fane wu yiflipalo yuka mi kaire wongke ka yirengkle nu nanrona,
“Mi mee ese yeye pai la taim Lisias yolowi mee sa ki ese kirepi pone mi fika.”
23 Wu yali mi kelo nu iimuma ese samo nopane Pol.
Ka wu woluporo wu ese nu folo empo Pol nu ese noloni nulu wu ka nane wu ommo plai ka nu fai samo nina wu waiye kalabus sa nenrape wu ese as yolo waraiye moile ka none ese nopane wu.
Nu samo nopane Pol waiye mow kalabus
24 Kaire plai paiyi se sema Feliks yane puli woneni Drusila noloni nulu Pol.
Drusila wu sa Juda pin.
Wuyane noloni ka Feliks mi paiyi Pol yolowi ka yireni wuyane mi empo rokoi fai nupene Krais Jisas.
25 Empo Pol yoplongkle nale uporo,
mana ese samo yopane laip woneni nama empo God,
ka kingke mi empo God ese kotim nu uma.
Ka mi namo yangke Feliks yum wamo ka yireni Pol nanrona,
“Resuklu.
Ki ese kulu yene kore ka ki ese kouw yene yolowi kore.
Naimele yene paiyi se.”
26 Empo Feliks yane puli woneni fai noloni ka nulune Pol namo,
Feliks wu sa fai wola nanrona Pol ese yane wu romaula fai wu ese mewyimane wu paiyi.
Nanrona fane wu fai youw wu ningki kaire yolowi ka wu yoploniye wu.
27 Empo kikla plainrane paiyi se Porsius Festus ke yem koii empo Feliks.
Nanrona fane Feliks yire yangke nu Juda ese wolpuna uporo fane wu fei yangke ompla wongke Pol.
Nanrona fane wu mewyimane Pol waiye mow kalabus ro.