ᒥᔽᒋᒧᐅᓂᔪᐤ ᑲ ᒥᓯᓇᐊᐧᒃ
ᒪᕐᒃ
ᑕᓐ ᐊ ᐃᓯ ᐊᔨᒧᑕᒡ ᐅᑕ ᒥᓯᓇᐃᑭᓂᒡ
ᒪᕐᒃ ᐊᓐ ᑲ ᒥᓯᓇᐊᐧᒃ ᐅᔭ ᒥᔽᒋᒧᐅᓂᔪᐤ᙮ ᒂᔄᓐ ᐊᐅᒄ ᐊᐛᓐ ᒪᐅᒡ ᓂᔅᑎᒻ ᑲ ᒥᓯᓇᐊᐧᒃ ᑕᓐ ᑲ ᐃᑎᔨᒋ ᒋᓴᓴ ᒪᒂᒡ ᐅᑕ ᐊᔅᒋᒡ ᑲ ᑕᔨᒋ᙮ ᒂᔄᓐ ᑭᔭ ᐊᐅᒄ ᐅ ᐊᓐ ᐊᐛᓐ ᒥᒐᑐᐳᓇ ᑲ ᐎᒋ ᐊᑐᔅᒐᒪᑦ ᑈᓚ ᑭᔭ ᐸᕐᓇᐸᓴ ᐊ ᐱᐸᒧᑕᔨᒋ ᒥᔽᒋᒧᐅᓂᔪᐤ᙮ ᒋ ᒥᓯᓇᐊᒻ ᐅᔭ ᒥᔽᒋᒧᐅᓂᔪᐤ ᒪᕐᒃ ᐊ ᐎ ᒋᔅᒐᔨᑎᒥᐊᑦ ᐊᓂᔭᔪᐛ ᓂᔅᑎᒻ ᑲ ᐊᑎ ᑕᑈᑎᒥᔨᒋ ᒥᔽᒋᒧᐅᓂᔪᐤ ᑕᓐ ᑲ ᐃᑕᔨᑕᑯᓯᔨᒋ ᒋᓴᓴ ᑭᔭ ᒐᒂᔪᐤ ᐛᒋ ᓂᑐᐛᔨᑕᑯᓯᔨᒋ ᒐᒋ ᓂᐱᔨᒋ᙮ ᐛᐸᑎᔨᐛᐤ ᒧᔅ ᐊᒋ ᑎᑯᓂᔨᒡ ᒐᒂᔪᐤ ᐊ ᐃᑐᑎᒥᔨᒋ ᒋᓴᓴ ᑭᔭ ᑕᑈ ᐊᒋ ᐊᔭᔨᒋ ᒐᒋ ᐃᑎᔨᒋ ᑕᓐ ᑲ ᐃᑎᔨᒋ ᑭᔭ ᒐᒋ ᐃᑐᑎᒥᔨᒋ ᑕᓐ ᑲ ᐃᑐᑎᒥᔨᒋ᙮ ᐅᔅᑕ ᐊᐱᑐᐤ ᐊ ᐃᔎᔨᒡ ᐊᓂᔭ ᐅᒥᓯᓇᐃᑭᓐ ᐊᓐᑕ ᐊ ᐊᑎ ᐃᔎᐱᔨᒡ ᐎᑎᒻ ᑕᓐ ᑲ ᐃᔅᐱᔨᒡ ᐊᓂᔭ ᒪᔅᑕᔾ ᐊ ᒥᓇᔅᑕᑭᓄᐎᒡ ᒋᓴᓴ ᑲ ᑕᔨᒋ ᐅᑕ ᐊᔅᒋᒡ᙮ ᐊᑯᑕ ᐊ ᐊᑎ ᐎᑕᐧᒃ ᑲ ᓂᐱᔨᒋ ᒋᐱᔭᑎᑯᒡ ᑭᔭ ᑲᐤ ᑲ ᐅᓂᔅᑲᔨᒋ ᓂᔅᑐ ᒋᓯᑲᐛ ᐸᑎᒪ᙮