4 Ni katoo ndaa nyi mu tni na ni yɛ lii, a kee kro naa nyɔɔ na ni kaan. 5 Ndaa sni mna ŋunɛ yɛ ŋunu, mna yirɛ nya nyiɛlɛ na, a yira ni pe fiɛrɛ ni. 6 A ndaa yo pe ni paaranyinafɛɛnlɛ mblɛ pee wa Babylon na kro yeeri mbe pe paan ŋunɛ yire nɔɔ nyina. 7 Bawa ndaa ni chlɛfɛɛnlɛ, na ni befɛɛnlɛ, na mblɛ pe wɔɛlɛɛ le na kee nyaa na yuu pre kro yeeri a pra pan, a ndaa ŋunɛ yire tɔɔnri pe pan, la, wa nsra ja mu yi nɔɔ nyina. 8 Bawa Daniel na pan. (A wre chɔɔ pe yeeri ni sɛɛnlɛ yire ka mɛɛ ni mbo, ‘Belteshazzar.’) A sɛɛnlɛ cheche yire ŋumu wa u nu, ki tia ndaa ŋunɛ yire tɔɔnri u pan na.

9 Belteshazzar chlɛfɛɛnlɛ lopom, ni chin na sɛɛnlɛ cheche yire ŋumuu wa mu nu, a ki tia mu ndrandra kee kro nɔɔ chin. Kena ŋunɛ nyjɛ ndaa ŋunu yi kre, ni nyina yi nɔɔ. 10 Ŋga ndaa sni, ndaa tiŋge badaaŋga ka nya na kii wa mu yire waŋgra lalaa. 11 Tiŋge kre naa lee mna faŋga ta mna sɛ su na kra lɛ chiin mna sɛ su nyiɛ yiɛ na, a waŋgra ŋga leele kro naa ki nyaa. 12 Ki wrɛ na nyu, a kra pe sɛnyi bribri mbe waŋgra ŋga leele kro ta mbe li. Yurɛ mblɛ pe nyaai naa paan na sni ki nyimi, a hanyiɛlɛ naa pe zeere leni ki klɛ na, a yurɛ mblɛ pee wa tra ŋga na kro naa ki sɛnyi lii.

13 Ŋga ndaa kee ŋga ni nya ŋga jawa kre, ndaa nyjeeri bituŋu ŋmba u u yɛ kna nya na u yiri nyjeeri na paan. 14 A wra mana kpɔɔ tɛɛ mna yo mbo, ‘E tiŋge kre kun e chan, e ki klɛ chile, e ki wrɛ yire mbru e ki sɛnyi yire nyina. E yurɛ pre ni ki jaara, e hanyiɛlɛ pre ni e laa ki klɛ yire na. 15 La, e ki nɔɔ kre ti tra wa, e tɔɔnrɔ mɛnyi na swafre mɛnyi tɛɛ e ki pɔ, e ki ti nyaa wa.

E blɔ wre ti mbe mɛŋɛ wo u na, mbe wre na yurɛ tni nyaalam. 16 Yɛlɛ kɔɔnashin, wa lewo jawala le, na yurɔ wo bɔkɔ. 17 Kre kee ŋga yi nyjeeri bitumblɔ mblɛ pe yiri nyjeeri mu pan kre jawala. Ki tia fuŋga, ti mbe leele kro loo lawee kro nu na, Jaŋgafun Nyiɛkpɔɔ wre uu wa faŋga ni ŋunumulie nyjɛ yii wa tra ŋga nu ŋga kro na, a ŋmba u chaa u kaan ŋunumu, hali ndro ŋmba leele n le mu nya kre.’”

18 A Nebuchadnezzar na kna mbo, “Ŋunɛ nyjɛ ndaa ŋunu yire yi kre, kena Belteshazzar, ni nyina yi nɔɔ. Ni paaranyinafɛɛnlɛ pre wa n wa mbe jaa yi nɔɔ nyina, la, ŋu we ki ja. Ŋgi na hin? Ŋu nu sɛɛnlɛ cheche yire ŋumu nyi.”

19 Kre kee ŋga na tia tutom kpɔɔ na wo Daniel ŋmba pe yeeri Belteshazzar wre na, a u nsra chin kee ŋga we yo. Bawa ŋunu wre na kna mbo, “Belteshazzar, maa ti mbe ŋunɛ nyjɛ na kee ŋga kii wa yi nu ti mbe tutom wo mu na kpɔɔ ma.”

A Belteshazzar na kna mbo, “Tolɛɛ Jaŋgafun, na kra kɔ mi na, mbe ŋunɛ yire na yi nɔɔ krɛrɛ na pan mu loŋgoolo na, mbe yia na pan mu na. 20 Tiŋge ŋga mna nya a kraa lee mna faŋga ta mna sɛ su na kra lɛ chiin mna sɛ su nyiɛ yiɛ na, a waŋgra ŋga leele kro naa ki nyaa kre, 21 ki wrɛ na nyu, a kra pe sɛnyi bribri mbe waŋgra ŋga leele kro ta mbe li. Yurɛ mblɛ pe nyaai naa sni ki nyimi, a hanyiɛlɛ naa zeere leni ki klɛ nu.

23 Nyjila ŋga ni mnaa wa na ki le kre, nyjeeri bituŋu wa na pan mna yo mbo, ‘Tiŋge kre kun mu chan mu ki kla, la, ki nɔɔ kre ti tra wa, mu tɔɔnrɔ na swanyiɛ fre mɛnyi tɛɛ mu ki pɔ mu fɛ mu kun. Fuŋga rɛ, e ti mbe mɛŋɛ wo blɔ wre na yɛlɛ kɔɔnashin, mbe wre na nyaalam yurɛ kro nyaa wa.’

24 Tolɛɛ, mu ŋunɛ yire nɔɔ yi kre, a kee ŋga Nyiɛkpɔɔ Jaŋgafun wre yo kie pan mu na yi kre. 25 We mu ni mbe yili leele nu, mbe sɛ mu chaa nyaa yurɛ nu mbe ŋu na pre tni nyaa. Mu nyaa ka yɛlɛ kɔɔnashin na nuu wi, mbra sni fimi na, mbe mɛŋɛ na woni mu na, mbe sɛ su na mu muyɛ nɔɔ loo na na Nyiɛkpɔɔ Jaŋgafun wre kɛɛ ŋunumulie nyjɛ yii wa tra yiɛ na ŋga kro nyi, a we jaa ŋmba u chaa kro ŋga yi yi imi u chaa. 26 Nyjeeri bituŋu wre na yo pe tiŋge kre nɔɔ kre ti tra wa. Kre ki nyina na na maa ndru mu muyɛ nɔɔ loo na Nyiɛkpɔɔ kɛɛ waŋgra ŋga kro nyi kre, we ndruu mu ŋga mu ŋunumu kre na. 27 Ki tia Tolɛɛ Jaŋgafun, jande ni kee ŋga loo, na kie na nyu mbe mna sisam pee ti, mbraa kee ŋga ki fraka pini, mbraa mblɛ pe fiŋge fooro chini. Na mu pe ma, kre mu kala kro we nyu mbe mu ŋga nyjila kro nu.”

28 Yire kee nyjɛ kro na Ŋunu Nebuchadnezzar da imi na Daniel na yo kre. 29 Kie pe nyiɛpɔ kɛmbɔshiin kɔkro, ki ble ka na Nebuchadnezzar nyaari na tro u katoo zio ndra na Babylon tra nu. 30 Kee ŋga wraa yuu yi kre mbo, “Le, imi na Babylon kpɔɔ mu da ma! Mi ni ki sin na kakpɔɔ yi, mu ki tɛɛ mbe ni faŋga, na ni jaŋga, na ni yɛnyiŋge nyina.”

31 U nsra ta mu yire kee nyjɛ yo mu kɔ, a mana ka na yili nyjeeri mna yo mbo, “Ŋunu Nebuchadnezzar, kee nyjɛ yie mu da ŋga loo! Mu ŋunumulie jaŋga kre, ni ki shɔ mu pan. 32 Mbe mu ni mbe yili leele nu, mbe ŋu na yurɛ mblɛ pe nyaai sɛ tni nyaa, mbe mna nyaa kaa na nuu wi ma yɛlɛ kɔɔnashin, mbe sɛ su na mu mu yɛ nɔɔ loo na Nyiɛkpɔɔ Jaŋgafun wre uu wa jaŋga ni ŋunumulie kro na, a ŋmba u chaa kpan u kaan ki yi.”

33 Titɛɛ kre nu, a kre kee ŋga na pan ma yɛŋgɛ. Nyiɛkpɔɔ na Nebuchadnezzar wɔ leele nu a wra sɛ tni nyaa, mnaa nyaa kaa na nuu wi. Mɛŋɛ naa woni u na, a u nyjure titnɔmu na da na nyuu sinyi ni, a u kajinyi titnɔmu na pe na hanyini wee yi.