Nebuchadnezzar Na Yo Na Ndro Kro Fna Mbe Swanyiɛ Sɛɛn Kre Sumi
3
Ŋunu Nebuchadnezzar na tia pra swanyiɛ sɛɛn ka faanri a ki gedem na pe fiiti fuloe jijirɛ na kɛ, a ki valam naa fiiti kɔɔnanyjirɛ. Pra kre sɛɛn ŋga sin Dura lawee gbeŋglen ka nu Babylon tra nu wa. 2 A ŋunu wre na yo u loplombo pre kro pe paan fni titɛɛ, ŋunu bibilɛ pre, na tra lefɛɛnlɛ, na sojae loplombo, na paaranyinafɛɛnlɛ, na swatɛɛfɛɛnlɛ pre, na kalalifɛɛnlɛ, na loplombo, na yɛkulo mblɛ pra wa tra kre nu kro. Mbo pe kro fna mbe pan mbe sɛɛn ŋga Nebuchadnezzar faanri kre nyu nyaa. 3 Ŋga pe kro na pan mu fni sɛɛn kre yiɛ wa kre, 4 pe wa na yiri mna paara mana kpɔɔ ni mbo,“Waŋgrɛ kro leele, na yolo nyininyini yofɛɛnlɛ, e loo. 5 Bnɔɛ yɛ paan mbe tin, a yire kɔkro ee juru na yirɛ nyjɛ ni pe mɛɛ koni yɛ tiŋge loo. Na e waa loo na yire yirɛ nyjɛ kro chaa mu tin to, ndro kro u lɛɛlɛ mbe Ŋunu Nebuchadnezzar sɛɛn ŋga u faanri mu yire kre sumi. 6 Ndro ŋmba u nsraa lɛɛlɛ mu ki sumi kpan, oo u wa kanhun ŋga o gbɛɛri lawee ŋga ki pe na paanu fɔ ndoo yi, a kra nyini wa ŋga nu fuŋgaami.”
7 Ki tia ŋga pra bnɔɛ yire, na juru, na yirɛ nyjɛ ni pe mɛɛ koni yire tiŋge loo kre, a waŋgrɛ kro leele, na yolo nyininyini yofɛɛnlɛ kro, na lɛɛlɛ mna Nebuchadnezzar sɛɛn ŋga wra faanri kre sumi.
Pe Daniel Nɔɔlɔ Taarɛ Pre Wɔ Mu Ŋga
8 Kre kee ŋga na tia Babylon leele pre plɛ na pan mna Judae pre wɔ mu ŋga. 9 Pra sɛ yo Ŋunu Nebuchadnezzar pan mbo, “Tolɛɛ, Nyiɛkpɔɔ we mu ndra tun tɔɔnrɔ. 10 Mu mbra le na, na bnɔɛ yire na juru, na yirɛ nyjɛ ni pe mɛɛ koni yire waa chaa mu tin, ndro kro u lɛɛlɛ mbe mu swanyiɛ sɛɛn kre sumi. 11 Ŋmba waa je, a u n lɛɛlɛ mu ki sumi kpan, pie u wa kanhun ŋga ki nyini fnunu nu. 12 Tolɛɛ, Judae mblɛ mu pe Babylon tra ŋga lefɛɛnlɛ kre ndikana pe kee ŋga mu yo kre na. Pre lɛ, Shadrach, Meshach, na Abednego. Pe n na chaa mbe lɛɛlɛ mu swanyiɛ sɛɛn ŋga mu faanri mu yire kre yiɛ, a pe na chaa mbe mu sɛɛnlɛ yire ka sumi kple.”
13 Ŋga ŋunu wre na kee ŋga loo ma kre, u krɔ na kun, a wra nyi uyɛ nu, a wra tia pra sɛ pe yii mu pan. 14 Bawa ŋunu wre na pe wie mbo, “Shadrach, Meshach na Abednego, ki pe kpra na e je mbo yaa lɛɛlɛ ni swanyiɛ sɛɛn ŋga ni faanri mu yire kre yiɛ, a yaa ni sɛɛlɛ yire ka sumii? 15 Fuŋga rɛ, na e waa loo na bnɔɛ yire, na juru yire, na mɛɛ kɔ yirɛ yire kro chaa mu tin, e lɛɛlɛ e sɛɛn kre sumi. Na e n pe ma, mbe ti pe e yii mbe wa kanhun ŋga ki nyini fnunu nu wa ŋga nu. Ndee e jawa na sɛɛn kaa wa mbe jaa e shɔ ni kɛ ree?”
16 A Shadrach, Meshach na Abednego na yo ŋunu wre pan mbo, “Tolɛɛ, ki n shian na oo kee ŋga nyu wɔ. 17 Na mu o wa kanhun ŋga ki nyini fnunu nu kre nu, Nyiɛkpɔɔ ŋmba o sumi wre we jaa o wɔ mbe yili ki nu, mbe o shɔ mu kɛɛ. 18 La, hali na u n o shɔ kuraa kre, o chaa mbe mu chin na waa lɛɛlɛ mbe mu swanyiɛ sɛɛn ŋga mu faanri mu yire kre, na mu sɛɛnlɛ yire ka sumi fio.”
Pe Daniel Nɔɔlɔ Pre Gbun Na Kumu Pimi Ni
19 Bawa Nebuchadnezzar krɔ na kun na Shadrach, Meshach, na Abednego ni mu ya, a u nyiɛlɛ na nyina piipii. Ki tia wra yo u leele pre pan, na pe ti mbe fnunu kre wɛɛri imi ki nyi kre ma gbee kɔɔnashin. 20 A wra yo u ŋunɔwifɛɛnlɛ faŋgafɛɛnlɛ pre plɛ pan, na pe pre bilɛ taarɛ pre yii mbe pe pɔ mbe sɛ pe wa fnunu kanhun ŋga ki nyini kre nu. 21 A pra pe pɔ, na pe dodonyi titnɔnyi, na kplɛ nyjɛ pe chaan wa pe na, na pe namu pɔ pɔ pe ndrɛ na, a pra sɛ pe wa kanhun kre nu. 22 Ŋga ŋunu wre na paara pɔɔrɔ ni, a kanhun kre naa nyini kpɔɔ kre ndra na, kra ŋunɔwifɛɛnlɛ mblɛ pra sɛ pe wa ki nu kre shɔ mu gbo kro. 23 A Shadrach, Meshach, na Abednego mblɛ kɛnyi pra pɔ gbiŋmbi kre na sɛ to kanhun kre lalaa.
24 Titɛɛ kre nu, ŋunu Nebuchadnezzar wre na kawako kee ka nya, mna tin mu yiri mu yire, mna u loplombo pre wie mbo, “Bilɛ taarɛ ma o pɔ mu wa kanhun ŋga nu kree?” A pra yo, “Ɛnhɛɛn, Tolɛɛ.”
25 A wra kna mbo, “A ki pe mni a leele jijirɛ ni nya na pe nyaari kanhun ŋga nu ŋga hin? Pe n pe kɛnyi pɔ, a yaka n nyina na kala ka wa ta, a jijirɛ wo wre pe na Nyiɛkpɔɔ pɔ wi.”
Pe Bilɛ Taarɛ Pre Ŋga Kpɔɔmu Lihaa
26 Ki tia Nebuchadnezzar na sɛ yire fnunu kre nyu na mna pe yeeri mbo, “Shadrach! Meshach! Na Abednego! Nyiɛkpɔɔ ŋmba u kpɔɔ wre sumifɛɛnlɛ, e yili e pan fimi na.” Titɛɛ kre nu, a pra yili mu pan. 27 A ŋunu bibilɛ, na tra lefɛɛnlɛ, na ŋunu paaranyinafɛɛnlɛ, na loplombo plɛ na pan mu bilɛ mblɛ pe le kanhun a pe n ja mu shɔ kre fɛ mu kun. Hali pe nyjure nsra puari, a pe dodonyi nsra shɔ, a wree ndiom nsraa wa pe na.
28 A ŋunu wre na yo mbo,
“E ti o Shadrach, Meshach, na Abednego Nyiɛkpɔɔ wre ŋga mɛɛ! Wre u u bituŋu tun a u pan mu nyanyjɛɛlɛ mblɛ pe u sumi mu u shɔ mu li ŋga ŋmaa shɔ. Pra ni nyu kee je, mna pe ŋmaa wa jenyje, kre na prɔ pe pan mu wɛ ŋga pie sɛɛnlɛ sumi na, fɔna pe Nyiɛkpɔɔ wre chiin bɔkɔ.
29 A fuŋgaami, mbra ŋga ni leni yi na, waŋgra kro leele, na yolo nyininyini yofɛɛnlɛ, ŋmba we kee ka yo mbe Shadrach, Meshach, na Abednego Nyiɛkpɔɔ wre taan kre, mbe ti pe u kaara knumu bujibuji, mbe u katoo juari mbe ble. Ŋgi na hin? Sɛɛn ka n wa mbe jaa ndro ŋmaa shɔ kre kolo ŋga na.”
30 A ŋunu wre na Shadrach, Meshach, na Abednego ŋga kpɔɔmu lawee a kra wɛ jle wee yire na Babylon tra nu.