Nyiɛkpɔɔ We Egypt Ndie Tini
19
Egypt kee yi kre.O Tafun Nyiɛkpɔɔ nduu tlo na,
na paan nyaa nyaa Egypt na.
Egypt tra sɛɛnlɛ yire kro,
seeri u yiɛ,
a ki leele pre kro sɔɔnrɔ ku.
2 O Tafun Nyiɛkpɔɔ wre yo mbo,
“Mbe ti mbe Egypt leele,
pre kna, mbe to peyɛ na,
mbe ŋunɔ wi,
mbe ti mbe nyjɔ na chunu,
to peyɛ na,
mbe chamna na u chamna,
to peyɛ na,
mbe chia na chia,
to yi yɛ na,
mbe ŋunumu na ŋunumu,
to peyɛ na.
3 Egypt tra leele nyiɛ we fɛ pe kro,
a mbe ti mbe pe jina,
nyjɛ pe to yire kro pe waara.
Pie sɛ to pe sɛɛnlɛ na,
na yi ya pe na,
a pie sɛ chlɛ pe chlɛfɛɛnlɛ pan,
mbe sɛ pe mblɛ pe gboolo,
yeeri pan mbe sɛ jawala shɔ.
4 Mbe Egypt leele pre le tafun,
ndrasheleefun wa kɛɛ,
ŋunu ŋmba kee kii fiɛrɛ ni wa,
mbe ti u ŋunumu li pe na.
Mi e Tafun Nyiɛkpɔɔ Jaŋgafun,
wre ni ki yo.”
5 Nile lɔɔ kre nyumu we shɔɔnri,
mbe yuwa.
6 A lɔɔ kre laklɛ yire kro we yuwa,
mbra ndio.
Mbe ki nyaa,
nyjɛ yii wa wa yire kro yuwa.
7 A yirɛ nyjɛ pe luu,
Nile lɔɔ kre mɛɛ na kro,
we yuwa,
mbe fuflɛ yi wru mbe sɛ.
8 Ndro ŋmba u tnumu tuni,
Nile lɔɔ kre nu na lii kro,
we jiin, mbe nyɛni.
Pe drawae, na pe asau,
we pe yirɛ wɛɛ.
9 Mblɛ pe kɔdɔli teeri,
na yonyi finyi tini pre kro,
pe dankna we kɔ.
10 A yotumblɔ mblɛ pee wa,
tra kre nu kro yiɛ we je kpɔɔ.
A mblɛ pe yi tnumu tuni,
na swa taa pre we fooro li.
11 Zoan kakpɔɔ kre loplombo pre,
jijiele lɛ.
A Egypt kachimblɛ titie pre,
na jijiere jawala kaan.
Yira ŋgi ki tia pra yuu,
Egypt ŋunu wre pan na,
kachimblɛ pre,
na fawolo ŋulo pre,
biile lɛ wre hin?
12 Egypt ŋunu, sena mu kachimblɛ,
mblɛ pe mu kaan,
jawala pre nyi hin?
Aada pie jaa mu nyina,
kala sisaa ŋga Nyiɛkpɔɔ,
Jaŋgafun wre jawa,
mbe pe Egypt tra nu.
13 Zoan, na Memphis loplombo pre,
jijiele lɛ, pe pe yɛ fana,
mu Egypt leele fana,
mu pe wa mu fun.
14 O Tafun Nyiɛkpɔɔ tia,
tutom wo pe na,
a ki tia kee ŋga pie pe,
kro n nyu,
pan pe fuula to,
na gbɔgbɔɔ mbulɔ u tuuroe nu.
15 Ndro n wa Egypt tra nu,
mu pe swafun, ndee shianfun,
lekpɔɔ, ndee ndro,
ŋmba leele le mu nya,
mbe u ja mbe kee ka pe,
mbe ya pe na.
Egypt We Nyiɛkpɔɔ Sumi
16 Kre nyjila kre nu Egypt leele pre we pe fiɛrɛfɛɛnlɛ na chiɛlɛ lɛ. Na o Tafun Nyiɛkpɔɔ Jaŋgafun wre waa u kɛ yire mbe pe ndie tini, fiɛrɛ kpɔɔ we pe yii. 17 Judah tra kre we ti mbe fiɛrɛ kpɔɔ Egypt leele pre yii! Egypt ndro ŋmba we Judah mɛɛ loo kpan, gbun we yɔ u na, kee sisaa ŋga o Tafun Nyiɛkpɔɔ Jaŋgafun wre jawa mbe pe Egypt tra nu kre ndra na.
18 Na kre nyjila kre waa da, pie Hebrew yolo yo Egypt tra kre kakpɔɛ kunɔ na, mbe sɛ da mbe o Tafun Nyiɛkpɔɔ Jaŋgafun wre ŋga. Pie yire kakpɔɛ yire nunu yeeri “Yila kakpɔɔ.”
19 Na kre nyjila waa da, pie o Tafun Nyiɛkpɔɔ wre sragbuɛnlɛɛ sin Egypt tra kre lalaa, mbe dnɛ tɛɛ mbe pilaasi sin pe samu na Nyiɛkpɔɔ pan. 20 Kre kie pe sɛmbɛɛrɛ yira, na dansiɛrɛ yira mbe Nyiɛkpɔɔ ŋga Egypt tra nu. Na pe waa nyɛni mu wo o Tafun Nyiɛkpɔɔ wre na pe fiŋge kre ndra na kre, we ŋmaashɔfun wa tun, mbe u pan mbe yire pe kro, mbe pe shɔ. 21 O Tafun Nyiɛkpɔɔ we uyɛ wɔ mbe Egypt leele pre nyina, a kre nyjila kre pie u chin, mbe u sumi na pe sra wɔ yirɛ, na pe shɔlɔ sra wɔ wee ni! Kre nyjila kre pie da na o Tafun Nyiɛkpɔɔ wre mɛɛ ni, mbe li pe danyi na. 22 Nyiɛkpɔɔ we Egypt leele pre ndie tini, la, we ndru mbe pe bre. Pie ndru mbe pan u pan, a we pe nyiɛtalaa loo, mbe pe shɔ.
23 Na kre nyjila kre waa da, kokpɔɔ ka we yire Egypt tra nu mbe sɛ yili Assyria tra nu. Kie ti mbe Egypt leele ja mbra shie Assyria na, mbe Assyria leele ja mbra shie Egypt na. A Egypt leele pre na Assyria leele pre we chaa mbra sumi. 24 Na kre nyjila kre waa da, Israel we ya Egypt, na Assyria na, mbe yire waŋgrɛ taara yire pe dwamu mbe waŋgrɛ kro ŋga tra ŋga nu. 25 O Tafun Nyiɛkpɔɔ Jaŋgafun wre we pe dwan mbra yuu na, “Ni leele Egypt leele, ni e dwan, a Assyria leele mblɛ lɛ ni kɛ nyu tnumu kre, ni e dwan, a ni Israel leele wɔ mu pe pe ni leele.”