Nyiɛkpɔɔ We Ethiopia Ndie Tini
18
Tra ŋga nu hanyini kuɛn tini,Ethiopia lɔɛ yire kro wa kre,
ki atɛ.
2 Kre tra kre nu,
bitumblɔ plɛ yiri mu tni krɔɛ,
nyjɛ pe pe papyrus nyaa ni,
mu tro epo yiɛ na na paan.
Kena bitumblɔ mblɛ,
ee nyaa nyaa,
e sɛ leele mblɛ pe gede gede,
a pe wejinyi pe plɔplɔ,
a leele na pe fiɛ,
lawee kro nu pre pan,
waŋgra kree faŋga ni,
a lɔɛ pe tra yɔɔlɛ.
3 Yire mblɛ ee wa tra,
ŋga yiɛ na kro, e loo.
Pie flaŋgaa ka kan,
nyuɛ yire ndra na,
a ee ki nya, a pie bnɔ ka fɔ,
mbe e ki tiŋge loo.
4 O Tafun Nyiɛkpɔɔ na yo ni pan mbo,
“Mbe kro ni tnihaa wa,
mbra yirɛ le dumm,
imi na mɛŋɛ woni blee,
brɛmm ndram wrɛmu,
na yirɛ kun nyjila kre.
Ndee imi na lafo yila,
weerii brɛmm kre.”
5 Na tre sɛnyi kun nyjila,
waa na dani,
nyjila ŋga ni yi toto wo mu kɔ,
mbe yira nyinai kre,
kre nyjila kre,
Nyiɛkpɔɔ we tinyi nyjɛ yi fun,
na paan yire ndrɛ klu,
na brɔfiɛn bɛɛlɛ ni,
mbe yi klɛ nyjɛ,
yi tnu tnu yire knumu,
mbe yi koli mbe sɛ wo.
6 Tinyi yire, na yi klɛ yire kro,
we kro wa nyuɛ hanyiɛlɛ,
na nyaa lam yurɛ pan,
hanyiɛlɛ pre we yi ta,
mbe li ndram wrɛmu nyjila,
mbe yurɛ pre yi ta,
mbe ka weere nyjila.
7 Kre nyjila kre nu,
leele mblɛ pe gede gede,
a pe wejinyi pe plɔplɔ,
a leele na pe fiɛ lawee kro nu,
a faŋga wa pe nu,
a lɔɛ pe tra yɔɔlɛ,
pre we pan,
mbe o Tafun Nyiɛkpɔɔ,
Jaŋgafun wre kɛ yirɛ,
Zion nyua ŋga na o Tafun,
Nyiɛkpɔɔ Jaŋgafun wre,
mɛɛ nyi kre,
bawa pie pan na yirɛ yire ni.