Nyiɛkpɔɔ We Syria Na Israel Ndie Tini
17
O Tafun Nyiɛkpɔɔ yo mbo,“E le, Damascus wa pe chia na,
kie kaari kajaa,
mbe pe kramboe bri.
2 Leele we fɛ,
mbe Aroer kakpɔɛ yire ti,
mbe mbaala na nui na kaa wa,
a ndro wa pe wa mbe pe ni.
3 Yaka wa Israel ŋga faŋga na,
a Damascus wa ki yɛ ta na.
Syria leele mblɛ pie kro chiɛri pre,
nyifɛɛrɛ we pe gbo,
na Israel leele pre lɛ.
Mi e Tafun Nyiɛkpɔɔ,
Jaŋgafun wre, ni ki yo.”
4 O Tafun Nyiɛkpɔɔ wre yo mbo,
“Nyjila kaa wa na paan,
mbe Israel kpɔɔmu,
ŋga ki ta kre nyu to,
mbe ki yɛtaara kre kaari shian.
5 Pan Israel we pe,
na see ŋga shɔlɔ pe kun,
mu ndru mu ki yaai.
Pan kie sni waara,
na Rephaim nyuɛ mbɛɛ tra,
nyjɛ shɔlɔ pe kun peii yi.
6 Leele chiɛri plɛ pie kro.
Pan Israel we pe na,
olive tiŋge ŋga sɛnyi,
pe knumu ki na peii,
a yi sɛ kro sɛnyi shiin,
ndee taarɛ yɛ ki ndra,
kolikoli na,
ndee mu sɛ kro chiɛri yɛ,
ki klɛ tapan wee na.
Mi, Israel Tafun Nyiɛkpɔɔ wre,
Mi ni ki yo.”
7 Na kre nyjila kre waa da,
leele we ndru,
mbe pan pe gbeelefun,
Israel Nyiɛkpɔɔ cheche
wre pan,
mbe u ya pe na.
8 Pia peyɛ wru mbe taa,
pe sragbuɛnlɛɛ,
nyjɛ pre titi kɛnyi tɛɛ,
mu gbeele yire na,
ndee mbe dankna,
pe kɛ nyu tnumu yire na na,
pe Asherah sɛɛn kɛɛn,
na sragbuɛnlɛɛ nyjɛ na,
pe tuwe ndiom tɛɛn sroi,
yire na ni nyi.
9 Na kre nyjila kre waa da,
kakpɔɛ nyjɛ nu faŋga na nyi,
yire leele we fɛ mbe yi ti,
mbe yi kaari kajɛɛ.
Pan yie pe na chiɛ nyjɛ,
Hivite leele na Amora leele,
na Israel leele nya,
mna fɛ mu yi ti yire yi.
10 Israel, mu mu Nyiɛkpɔɔ,
ŋmba wra mu ŋmaa shɔ,
wre fɛɛ.
Mu Nyiɛkpɔɔ ŋmba wi Dnɛ Kpɔɔ,
a wre wi mu faŋga kre,
mu n u sɔɔnri.
Yirɛ fɔnyi nyjɛ e luu fuŋga kuraa,
sɛɛnlɛ e sumi na yi ni.
11 Hali na e yirɛ luu,
a yi fin ki ble kre kuraa,
mu toto pe ki ble kre lam kre,
yaa sɛŋgɛ nunu chom ta,
mbe kun yi na.
Kanyana, na fnaa bri ee ta.
Nyiɛkpɔɔ Kɛ Tɔ U Leele Na
12 Waŋgrɛ faŋgafɛɛnlɛ pre,
gble kpɔɔ le,
kra tini na epo nyumu yi,
pe gblee kre tiŋge kpɔɔ mu tro.
13 Na waŋgrɛ yire gblee pe fiɛrɛ ni,
na epo nyumu yi kuraa kre,
na o Tafun Nyiɛkpɔɔ,
fuu pe na pie ndru pe kro.
Pan pie pe na fuflɛ,
nyua mbɛɛ bloŋgo wru,
ndee mbe pe na legboo fuflɛ,
yirɛ fue wru nyambie na.
14 Na yila koo, gbun yɔɔlɛɛ kee,
bri ni pe paan,
la nyiŋge naa yo kie se kre,
na Nyiɛkpɔɔ pe kla kro.
Tnu ŋga leele mblɛ pe o juu,
mu na o yirɛ foolo pre,
we ta yi kre.