Moab Leele Kanyana Kpɔɔ
16
Moab leele mblɛ pee wa,chia ŋga pe yeeri Sela,
fimi tra nu kre,
pe sɛ na mbaala ni,
mbe sɛ ŋmba u Jerusalem le,
wre kɛ.
2 A pe chiɛlɛ sɛ kun,
Amon lɔɔ kre kun haa,
mu sɛ na kila na tro,
a pe n chin mna pie yiɛ le,
pan pe nyi to na hanyiɛlɛ,
mblɛ zeere pe wɔ mu wa,
a pe n lawee ta mbe tro lɛ.
3 Ki tia pe yo Judah leele pan mbo,
“E o nyina kee ŋga oo pe ɛ.
Imi na tiŋge nyimi nyjiri,
lafo chrichri na kre,
e ti mbe o wuu e jaara ma.
O pe leele mblɛ o fɛ,
mu pan mu e kaari.
Ki tia e o ndra lawee ŋga nu,
ndro nyibie wa to o na.
4 E ti mbe o tni e tra ŋga nu.
E kɛ tɔ o na,
e o shɔ mblɛ pe o chaa,
mbe kla pre kɛɛ.
Mblɛ pe o fiŋge pre,
na mblɛ pe o chaa,
mbe kla pre nyu we ku,
a mblɛ pe wii na o ni pre,
waa pe nya tra kre nu na.
5 David nanae pre wa we yiri,
mbe ŋunumu li,
a koroo na kpralie ni,
we leele pre le.
We ŋga ki fraka pe,
a we ti mbe kprakuɔn,
pe nyaanyaa.”
6 Judah leele pre yo mbo,
“O loo imi na Moab leele
peyɛ kpɔɔri mu da.
O chin na pe kpoŋmbooro,
na pe mɛchaara,
na pe yɛkpɔɔmu,
na pe nyibishelee yire,
yi kro, kee waara yi.”
7 Moab leele we nyɛni,
pe kanyana yire ndra na.
Pe kro we nyɛni,
na pe sroe chichiele,
nyjɛ praa lii kakpɔɔ,
ŋga pe yeeri Kir-Hareseth,
na yire sɔɔnri.
8 Seele nyjɛ yi mbra,
Heshbon chia na,
na tre sɛnyi seele,
nyjɛ yii wa Sibmah na,
yire krɛrɛ, pe yi kla,
yire tre sɛnyi seele,
nyjɛ yira tia waŋgrɛ ŋulo,
naa gboo na tuuri yire kro kla.
Nyjila ka nu,
na tre sɛnyi tinyi yire,
klɛ tini mu sɛ su kakpɔɔ,
ŋga pe yeeri Jazer kre na,
mna tini mu sɛ su yila finhaa,
tablɔ tra kre nu,
hali mna tini mu sɛ su,
epo ŋga nu weŋge wɛ titi kre,
na kokoo ŋga kraa wa,
na shie yila tohaa wa kre.
9 Fuŋgaami, ni nyɛni na Sibmah,
na Jazer kaan,
pe tre sɛnyi seele yire na.
Yetunyi ni fuu Heshbon,
na Elealeh ndra na,
Ŋgi na hin? Pe n yaka ta,
mbe kun pe seele yire nu,
mbe ki ti mbe pe yɛshɔɔrɔ ta.
10 Ndro n wa, a u yiɛ shɔ
tra taan seele yire na na.
Ndro n na tre sɛnyi ta mbe taanla,
mbe simi gbɔwo pe na,
yɛshɔɔrɔ gblee,
nyjɛ praa gble fa yire nyu to.
11 Ni lɛɛ ni sroi na Moab kaan,
a fooro ni yii,
na Kir-Hareseth ni.
12 Moab leele pe yɛ fnai finfin,
na shie pe sɛɛnlɛ,
nyjɛ yii wa nyuɛ na yire,
nyinyi nu na prɛ woni,
a yia ja mbe ya pe na.
13 Kre kee ŋga, o Tafun Nyiɛkpɔɔ na klu mna ki yo mu wru Moab haa. 14 A fuŋga rɛ, o Tafun Nyiɛkpɔɔ wre yo mbo, “Mna yɛlɛ taarɛ nyu na, Moab yɛnyiŋge, na ki yɛtaara kro we fun, imi na lewo we tnu lɔ, a ble kaa wa mbe u u wa, mbe ki ti tnu wre na u ble tɔɔnri kre, pan Moab we pe. Ki leele tataara pre nu, chiɛri plɛ pie kro, a pie pe yiɛyiɛ.”