Nyiɛkpɔɔ We Moab Kla
15
Moab kee yi kre.Kakpɔɛ nyjɛ pe yeeri Ar,
na Kir yire,
ble nununu ni pra yi kla,
a blee na yi, a ndro nsra ja,
mbe nyu kun Moab tra nu.
2 A Dibon chia kre leele,
na nduu mu sɛ,
pe nyambie yire na,
mu sɛ na nyɛni
pe sɛɛnlɛ yire yiɛ.
Moab leele nyɛni,
na gble leni Nebo,
na Medeba chiɛ yire ndra na,
ki tia pe pe ndrɛ klu,
mu pe nyutanyooro klu na.
3 Na mu leele nya chiɛ yire lete na,
kumu yonyi pe tɔtɔ kro,
pe nyinyi yire ndra na,
na lawee ŋga nu mu pe nya kpan,
nyɛni pe nyɛni na fooro lii.
4 Leele mblɛ Heshbon,
na Elealeh na pre nyɛni kpɔɔ,
ki tia na mu yire Jahaz na,
mu pe nyɛnɛɛ ndru,
hali Moab ŋunɔwifɛɛnlɛ,
pre kuraa sɔɔnrɔ ku,
a pra seeri poŋgo.
5 Ni gbun ni sroi,
mu Moab chia kre ŋga.
Ki leele pre kro fɛ mu sɛ chia,
ŋga pe yeeri Zoar kre na,
hali mu sɛ Eglath-Shelishiyah na.
A pe plɛ na nyɛni mu kolo yii,
na shie chia ŋga pe yeeri,
Luhith kre na,
a plɛ fɛ mu shɔ mu sɛ tni,
Horonaim na na fooro kpɔɔ lii.
6 Nyumu lawee nyjɛ yii wa,
Nimrim na yire yuwa,
a pan nyaa nyjɛ yi mbra,
wa yire yuwa na,
a yira ka n wa wa,
mu pe yira nyiŋge.
7 Leele pre yili mu sɛ kun mu tro,
lafolo ŋga nu willow tinyi
nyi kre nu,
mu sɛ na pe yirɛ kro ni.
8 Mu tro Moab tra samu na kro,
nyɛnɛɛ wɛɛri yi na,
hali chiɛ nyjɛ pe yeeri Eglaim,
na Beerelim yire,
pe pe nyɛnɛɛ ndru wa.
9 A chia ŋga pe yeeri Dibon kre,
ki lɔɔ pe nyimi poŋgo.
La Nyiɛkpɔɔ we ti,
mbe kanyana kpɔɔ titi pan,
Dibon na.
Leele mblɛ pie kro,
Moab tra nu pre,
jira we pan mbe pe gbo.