Nyiɛkpɔɔ Leele Pre We Pan Katoo
14
O Tafun Nyiɛkpɔɔ,we Israel leele pre fooro le,
mbe ndru mbe pe pe u leele.
We ti mbe pe pan,
mbe tni pe tra kre nu na,
a fumblɔ we pan mbe tni,
mbe chaa pe nu.
2 Waŋgrɛ tataara we ya,
Israel leele pre na,
mbe pe ndru mbe sɛ tra ŋga,
O Tafun Nyiɛkpɔɔ,
na pe ŋga kre na.
Bawa yire waŋgrɛ yire,
we Israel leele pre sumi,
na tinlɛ lɛ.
Mblɛ praa Israel leele jani fa kre,
Israel leele pre we kna,
mbe pe ja,
a Israel leele pre we kna,
mbra mblɛ praa pe fiŋge fa,
kre le.
Babylon Ŋunu Wa Kuulo Ndoo
3 O Tafun Nyiɛkpɔɔ wre we ti mbe Israel leele pre wuu pe kanyana, na pe fnaa kɛɛ, na tnumu shelee nyjɛ praa pe frɛ a praa tuni yire nu. 4 Na waa kre kee ŋga pe ma, ki fna pe Babylon ŋunu wre pe mbe tɛɛ, mbe yo na,
“Ŋunu ŋmba ndra ki sheli wre to.
A wa ja mbe ndro fiŋge na.”
5 O Tafun Nyiɛkpɔɔ wre tia,
ŋulo sisaala pre jaŋga nyu to.
6 Pre pra krɔkuɔn tɛɛ na leele fiŋge,
a pe nsra chaa mbe waŋgrɛ,
yire pe wi mu shɔ yire,
leele fiŋgee ti.
7 Fuŋga rɛ, waŋgra kro yiɛshɔ,
na pe wuu,
a wejiŋge nyjii pe na,
ki tia ndro kro,
na yɛshɔɔrɔ mɛɛ koni.
8 Cedar na cypress tinyi,
nyjɛ yii wa Lebanon,
tra nu yire yiɛ shɔ,
na pe ŋunu wre kɔ mu wa,
ŋgi na hin? Ndro n wa,
mbe yi kun mbe chan na.
9 Kuulo ndoo ki yɛ kna,
na Babylon ŋunu wre sri,
mbe u ŋga mupaŋge.
Leele mblɛ praa jaŋga ni,
tra na kre,
pe gboolo yiɛ shɔ,
na u paan wa,
a ŋulo mblɛ pe kuku,
pre gboolo yiri pe ŋujuɛn na.
10 A pe kro na yuu u pan mbo,
“Fuŋga rɛ,
mu pe yiɛyiɛ na wre lɛ.
A wre na ŋu pe nunu.
11 Juru ni praa mɛɛ koni,
na mu leni yɛnyiŋge,
la, fuŋgaami ŋga,
mu le kuulo ndoo.
Fiɛnlɛ dɛŋglɛ na mu sni,
mbe dɔmblɔ sniyira tɔ.”
12 Ŋu ŋmba na wi,
nyisee nyu wɔlɔ kre,
mni mu pe,
a pe mu kun nyjeeri,
mu wa tra hin?
Ŋu ŋmba mna wi,
mu waŋgrɛ shɔ fa kre,
pe mu kun mu wa tra.
13 Mna mu jawala pe,
na mu nduu mbe sɛ nyjeeri,
mbe sɛ mu ŋujɔɔn tɛɛ,
Nyiɛkpɔɔ wɔɛlɛɛ yire ndra na.
Mna mu jawala pe na,
mu pe ŋunu nyua ŋga kii wa,
na shie nyjeeri haa,
mna sɛɛnlɛ kro fni kre na.
14 Mna mu jawala pe na mu nduu,
mbe sɛ tloe ndra na,
mbe sɛ mu yɛ pe na,
Jaŋgafun wre wi.
15 La, pe mu tre,
mu sɛ tɛɛ kuulo ndoo,
jijuom titi kre nu tra tapan.
16 Mblɛ pie mu nya
kre we nyiɛlɛ gbli,
mbe mu le mbe yo mbo,
“Kena blɔ ŋmba wra tra nyaara,
mna tia fiɛrɛ kpɔɔ,
na ŋunumu tataara yii kree?
17 Kena blɔ ŋmba wra kakpɔɛ kla,
mna tia waŋgra na kaari,
fimi tra kree?
Wre blɔ ŋmba wraa leele yiri,
a wa pe wa mbe pe ndru,
mbe sɛ pe kalonyi nu kree?”
18 Waŋgrɛ ŋulo pre kro ku ku,
a pee wa mu sni,
pe fanyi chichiele yire nu,
19 la, ŋu rɛ, pia mu le faŋga nu,
pie mu gboo wa fimi na,
mbe mu sni wa mbe fɔɔn.
A ŋunɔwifɛɛnlɛ mblɛ,
pe gbo gbo ŋunɔ,
pre gboolo we mu tɔ,
a pie e koli mbe sɛ le,
dnɛ lawee wee ka nu,
mbe e taanla mbe le tra.
20 Ŋga mna mu waŋgra kre kla,
mna ŋu titi leele gbo,
kre ndra na pra mu le,
imi na pe ŋulo leni.
A pia sisaapefɛɛnlɛ biile,
pre mɛɛ sɔɔnri na.
21 E ti mbe o leele gbo.
Oo ŋunu bibilɛ pre gbo,
pe tolɛɛlɛ sisam,
nyjɛ pra pe yire na.
Pe wa wa ŋunumu li tra ŋga nu,
ndee mbe yiri,
mbe kakpɔɛ sin tra ŋga nu.
Nyiɛkpɔɔ We Babylon Kla
22 O Tafun Nyiɛkpɔɔ Jaŋgafun wre yo mbo,
“Mbe wi Babylon ni mbe ki kla,
mba yaka ti ki na,
mba biile ti wa,
mbe pe ŋmaa ta kple,
mi e Tafun Nyiɛkpɔɔ wre,
ni ki yo.
23 Mbe ti Babylon kaari dɛɛdɛɛ lawee,
mbe kuweele na sni wa.
Mbe pɔyira tɛɛ,
mbe Babylon pɔ pleple,
mbe yaka wa kro ki na na.
Mi Jaŋgafun Nyiɛkpɔɔ wre,
ni ki yo.”
Nyiɛkpɔɔ We Assyria Leele Kla
24 O Tafun Nyiɛkpɔɔ Jaŋgafun wre u u daŋga da mbo,
“Kee ŋga ni jawa kre we pe,
a kala ŋga ni yo mbe pe kre,
mbe ki pe.
25 Mbe Assyria leele,
mblɛ pee wa ni tra nu,
Israel na pre kla,
mbe pe taanla mbe tro,
ni nyuɛ yire ndra na.
Mbe ni leele pre shɔ,
Assyria leele pre fnaa,
na kanyana ŋga nu,
pe pe le kre nu.
26 Ni jawala kee ŋga ni ta,
waŋgra ŋga kro na yi kre,
a ni jaŋga ŋga mbe nyina,
mbe waŋgrɛ ndie tini yi kre.”
27 Kee ŋga O Tafun Nyiɛkpɔɔ,
Jaŋgafun wre jawa,
mbe pe yi kre.
We kɛ yire mbe leele ndie tini,
a ndro wa ja mbe u tɔ kolo.
Nyiɛkpɔɔ We Philistine Kla
28 Kee ŋga O Tafun Nyiɛkpɔɔ na yo yɛlɛ ŋga na Ŋunu Ahaz na ku kre yi kre, mbo,
29 Yire Philistine leele, yaa ti,
mbe e yiɛ shɔ,
na kaan ŋga ni,
pe e gbuun kre ka.
Na wɔɔ ku, wɔɔ sisaa titi,
we yiri u titɛɛ.
Mbe wɔɔ wre chrɛwɛ jiri,
mbe kaari wɔɔ sisaa,
ŋmba u yiri nyjeeri.
30 O Tafun Nyiɛkpɔɔ we pe u leele,
mblɛ pe shian pre lefun,
mbe ti mbe pe tni,
wejinyiŋge nu.
La, we ti mbe klo sisaa to,
yire Philistine leele na,
mbe e gbo peii, wa wa kro.
31 Yire mblɛ ee wa,
Philistine kakpɔɛ na yire kro,
e nyɛni, e gble le.
E ti mbe fiɛrɛ kpɔɔ e yii.
Wree ka yili nyjeeri haa
wa na paan,
a pe pe ŋunɔwifɛɛnlɛ,
mblɛ pe peyɛ kna mu na paan.
32 Kee ŋgi oo yo bitumblɔ,
mblɛ pe yiri Philistine na,
mu pan o pan ŋga pan hin?
Oo yo pe pan na,
O Tafun Nyiɛkpɔɔ,
u Zion chia kre sin,
a bawa u leele mblɛ,
pe kala nyaa pre,
we wejinyiŋge ta.