Nyiɛkpɔɔ We Babylon Ndie Tini
13
Babylon kee ŋga Amoz biblɔ Isaiah na ta mu yiri Nyiɛkpɔɔ pan na yi kre, mbo,2 E ŋunɔ flaŋgaa kan,
nyambie waara na.
E gble le ŋunɔwifɛɛnlɛ pre pan,
e kɛnyi nyini,
mbe pe sɛ wi na kakpɔɔ,
ŋga leele pe peyɛ kpɔɔri kre ni.
3 O Tafun Nyiɛkpɔɔ wre,
u u ŋunɔwifɛɛnlɛ,
mblɛ ni u uyɛ kpɔɔri,
mu na kaan pe na kre wɔ,
mbe pe sɛ ŋunɔ ka wi,
mbe u yire ki na,
mbe mblɛ ni u krɔ kun,
pre ndie tini.
4 E lenɛɛmu mblɛ gblee loo,
nyua na wa.
E waŋgrɛ yɛ, na ŋunumu,
yɛ leele gblee loo,
imi na pe,
pe ŋunɔwifɛɛnlɛ nyu blei.
O Tafun Nyiɛkpɔɔ,
ŋunɔwifɛɛnlɛ kro tafun,
wre u tia u ŋunɔwifɛɛnlɛ,
na peyɛ kna,
mbe sɛ ŋunɔ.
5 Pe yiri haalee trɛ yɛ nu,
tra nyukɔɔrɔ na na paan,
O Tafun Nyiɛkpɔɔ wre paan,
na krɔkuɔn kpɔɔ ni,
mbe tra ŋga kro kla.
6 E nyɛni, e gblee le.
O Tafun Nyiɛkpɔɔ wre,
ble kre mbra mna,
ble ŋga na Jaŋgafun,
wre we tra ŋga kla kre,
ki da mna mu kɔ.
7 Leele kro kɛ we gblɛ,
mbe pe sɔɔnrɔ ku.
8 Fiɛrɛ kpɔɔ we pe yii,
mbe sra wɔ pe na,
imi na siire lɛɛ we na chlɔ yaa,
mbe sra wɔ u na kre.
Fiɛrɛ we ti mbe praa kna,
mbra peyɛ le,
mbe pe yiɛ chinɛ poŋgo.
9 O Tafun Nyiɛkpɔɔ ble kre paan.
Kre ble kre pe ndrashelee ble,
na krɔkuɔn sisaa,
na fiɛrɛ kpɔɔ ble.
Ki ble kre we sisaapefun,
kro kla,
mbe tra ŋga kro sni ma waara.
10 Wɔɛlɛɛ wa yili mbe chiɛnri na,
a na yila yili kie wɔ poŋgo,
a yeŋge wa fniŋge.
11 O Tafun Nyiɛkpɔɔ yo mbo,
“Mbe tra ŋga, na sisaapefɛɛnlɛ,
mblɛ pee wa ki na,
pre ndie tini mbe pe kla.
Mbe ti yɛkpɔɔmufun kro nyjii.
Mbe kpoŋmboorofun,
na ndrasheleefun ndie tini.
12 Leele mblɛ pie kro pre,
nyaa we sheli,
imi na swanyiɛ kee sheli kre.
13 Ki ble ŋga mi e Tafun Nyiɛkpɔɔ,
we ni krɔkuɔn wɔ,
mbe nyina kre,
mbe ti mbe nyjeeri,
na tra seeri.
14 Fumblɔ mblɛ pee wa,
mu tni Babylon na kre,
we fɛ mbe sɛ pe tra nu.
Pan pie fɛ mbe nyina,
imi na sajemble feni,
mbe shɔ bɔfɔɔlɔ kɛɛ kre.
Pan pie pe na mbaala,
mblɛ pe n lefun ni lɛ.
15 A ŋmba pie ta mbe yii kpan,
pie u su brɔfiɛn ni mbe gbo.
16 Pie yire mbra le,
mbe praa pe bifimble,
gbuun mbra kuu.
A pie pe kalonyi yirɛ foolo,
mbe pe chiɛlɛ frɛ,
mbe cha jaŋga na.”
17 O Tafun Nyiɛkpɔɔ yo mbo,
“Mbe suuroo le Mede leele pre nu,
mbe pe sɛ Babylon tɔ.
Pe kee ka ma na swafiŋge,
ndee swanyiɛ ni.
18 Pie pe bɛnyi, na pe snimi tɛɛ,
mbe nyanyjɛbɛɛlɛ pre gbo.
Pia bifimble na bibɛɛlɛ,
fooro chin.
19 Babylon ki yɛ wɔ,
mu nyu ŋunumulie ni,
mu wɛ chiɛ yire kro na,
a ki tia ki leele na peyɛ,
kpɔɔri na ki ni.
La, mi e Tafun Nyiɛkpɔɔ wre,
we Babylon kɔ mbe wa,
imi na ndaa Sodom,
na Gomorrah pe kre.
20 Ndro wa da mbe tni wa na fio.
A Arab ndro wa da,
mbe u yoŋgo nyuŋgo kan,
wa na fio,
pan chɔɔ mbaala lefun wa da,
mbe sɛ u yurɛ ni,
mbe pe sɛ ka wa na fio.
21 Kie pe lawee ŋga nu,
fimi tra yurɛ we tni,
mbe kuweele na zeere leni wa.
Krɔnisooloe we tni wa,
mbe lɔŋgɔɔlɔ na yeni,
mbra tro ki kajaa kre na.
22 Komboolo, na ŋmbokuŋmboe,
pie na gble leni pe nyinyi,
chichiele lawee yire nu.
Babylon ja nyjila da mu kɔ.”