Wejinyiŋge Ŋunumu
11
Imi na didikolo we wrɛ fun kre,pan ndro wa we kɔ mbe yili,
David sele nu, mbe pe ŋunu.
2 O Tafun Nyiɛkpɔɔ,
wre ŋumu we u ŋga,
kachindɛ na hachila,
mbe ki ti u chin,
imi we jaa u leele pre yiɛklu.
Kre ndro wre we o Tafun,
Nyiɛkpɔɔ wre chaara chin,
mbe u ŋga buuro.
3 A u yɛshɔɔrɔ kpɔɔ yi na,
we li o Tafun Nyiɛkpɔɔ,
wre nyu kee na.
Wa ndro yiɛ le mbe kpra kun,
a wa peyoo wru mbe pe yaka,
4 a pɔlɛfɛɛnlɛ na shianfɛɛnlɛ kro,
we pe kala li kpra kolo na,
imi na ki fna.
U nyu kee na kie yire,
mbe leele ndie tiniɛ ta,
mbe ki ti mbe sisampefɛɛnlɛ ku.
5 Kpralie, na frakaa kolo na,
we na u leele pre le.
6 Komboolo, na mbaala we chaa,
mbe tni titɛɛ wejinyiŋge nu,
mbe kajinyurɛ,
na sikaala biile chaa,
mbe sni titɛɛ.
Mbe nui biile, na jirae biile chaa,
mbra kaa lawee nunu nu,
a biile fiɛnfiɛn pie na pe le.
7 A nui, na sisire we chaa,
mbra kaa lawee nunu nu,
mbe pe biile chaa,
mbe sni titɛɛ wejinyiŋge nu.
Jirae we nyaa ka,
imi na nui yi kaa kre.
8 Biile fiɛnfiɛn we pna,
dɔɔdɔɔ wee nyu na,
a biile we kɛnyi le gbɛtɛri wee,
pia pe pe yaka.
9 Nyiɛkpɔɔ nyua cheche,
Zion kre na wa,
yaka sisaa, ndee sisam kee,
ka wa ndro tɔɔra wa.
O Tafun Nyiɛkpɔɔ wre,
chiŋgɛ kie nɛɛ tra yiɛ na,
imi na nyumu nɛɛ epo nu kre.
Nyiɛkpɔɔ Leele Pre We Ndru Mbe Pan
10 Nyjila kaa wa na paan mbe Jesse nɔɔ ndro yiri mbe paan ŋunumu li waŋgrɛ kro na. Pie u chin, a u kakpɔɔ kre we yɛnyiŋge ta. 11 Na kre nyjila kre waa da, o Tafun wre we ndru mbe u jaŋga tɛɛ mbe u leele pre nyu ble uyɛ jaara, u leele mblɛ pe kro Assyria na Egypt tra nu, na Pathros tra nu, na Ethiopia tra nu, na Elam tra nu, na Babylon tra nu, na Hamath tra nu, na pe mblɛ pee wa epo nyu trɛ yire na, pre na pe mblɛ pee wa kuyɔɔsu nyjɛ yii wa epo nu yire kro na.
12 O Tafun Nyiɛkpɔɔ wre,
we sɛmbɛɛrɛ kee ka pe,
mbe trɛ yire leele nya,
mbe ki nyina na,
wre u ndru mu na Judah,
na Israel leele mblɛ pe nyina,
mu sɛ tra jenu jijirɛ yire kro,
na pre blei titɛɛ na.
13 Na ki waa pan ma,
Israel wa yenyjam wi,
na Judah ni na,
a Judah wa pe Israel loŋgo na.
14 Pe kro shiin we nyu pe nunu,
mbe sɛ Philistine tɔ,
mbe yire yila tohaa,
mbe pe yirɛ foolo,
mbe sɛ yili yila finhaa.
Pie wi mbe Edom,
na Moab leele ja,
a Ammon leele we,
peyɛ nyjii mbe pe ŋga.
15 Nyiɛkpɔɔ we ti mbe epo klɛ,
ŋga ki mbra Egypt na,
kre yuwa,
a we ti fuflɛ wrɛŋgɛ ka gbun,
mbe ki ti Euphrates lɔɔ,
kre yuwa mbe pile,
mbe pe lafooloe kɔɔnashin,
mbe ndro jaa le ki nu mbe kun.
16 Kolo chichie ka we sni,
mbe u leele mblɛ pie kro,
Assyria na pre pan,
mbe ta mbe tro,
imi na kolo na sni,
mna pe tolɛɛlɛ ŋga,
Egypt tra nu,
a pra ta mna tro kre.