10
E atɛ, yire mblɛ e mbranyjɛ yi n fraka leni,
mu yi tɛɛ na ni leele fiŋge kre.
2 Kre kolo ŋga na e tro,
a e na shianfɛɛnlɛ kala li kpra ni,
mu pe ŋga.
Pan chɔɔ e lekuchiɛlɛ,
na bijile yirɛ shio pe pan na.
3 A na Nyiɛkpɔɔ waa na e ndie tinii,
mni ee pe hin?
Ndee na waa tia,
leele yiri haalee ka nu,
mu e le kanyana nu,
mni ee pe hin?
Na ki waa pan ma,
ŋmbi pan ee fɛ mbe sɛ,
mbe u e shɔ hin?
A sena ee e yɛtaara yirɛ,
yire ndra hin?
4 Ŋga kie jaa pe kro yi,
na pie e gbo ŋunɔ,
ndee mbe e yii mbe sɛ.
A kre wa ti,
mbe o Tafun Nyiɛkpɔɔ krɔ nyjii.
We u jaŋga kre tɛɛ,
mbe e ndie tini mbe ya.
Nyiɛkpɔɔ Na Assyria Ŋunu
5 Assyria ŋunu ni, krɔ ni kun,
ŋu wi kaan ŋga ni ni ni leele frɔ,
a ŋu wi van ŋga ni,
ni ni leele ndie tinii.
6 Assyria ŋunu ni tun,
mbe u sɛ waŋgra ŋga leele,
pe n ni chin,
mu tia ni krɔ kun pre ndie tini.
Ndaa u tun mbe u sɛ pe yirɛ,
nyjɛ pe wi mu ta,
na nyjɛ pe foolo ŋunɔ yire,
shɔ pe pan,
mbe leele pre taanla na frɛrɛ yi.
7 La, Assyria ŋunu,
wre jawala yili ki yɛ.
U jawala yi na,
we waŋgrɛ tataara kla,
mbe yi leele gbo.
8 Nyukpɔɔmu kee ŋga,
Assyria ŋunu yuu yi na,
“Ni ŋunɔwifɛɛnlɛ loplombo pre,
kro ŋulo lɛ.
9 A ni wi mu kakpɔɛ,
nyjɛ pe yeeri Calno,
na Carchemish, na Hamath,
na Arpad yire shɔ.
A ni wi mu Samaria,
na Damascus shɔ na.
10 Ni kɛ to sɛɛnlɛ bribri,
waŋgrɛ yire na,
yi sɛɛnlɛ yire jaŋga wɛ,
Jerusalem na Samaria wee yire na.
11 Ni Samaria na ki sɛɛnlɛ kla,
pan mbe Jerusalem na yirɛ,
nyjɛ pe sumi wa yire pe na.”
12 La, Nyiɛkpɔɔ yo mbo, “Na mbaa nyjɛ ni pini Zion nyua kre, na Jerusalem na kro pe mu kɔ kre, mbe Assyria ŋunu wre ndie tini, u nyukpɔɔmu kee, na kpoŋmbooro kee nyjɛ u pini yire na.”
13 Kee nyjɛ Assyria ŋunu wre yuu yi kre mbo,
“Mi titi faŋga, na kachindɛ ni,
ni yire kee nyjɛ krɛrɛ pe.
Ŋgi na hin? Nii hachila ni.
Ni waŋgrɛ yirɛ,
nyjɛ ni pe samu gbun,
yire klɔ mu wa,
mu pe yirɛ foolo mu wru.
Ni pe na jaŋgafun wi,
mu pe ŋulo kro ŋunɔ,
pe juɛn na mu chan.
14 Pan leele mblɛ pee wa,
waŋgrɛ yire nu,
pre nyi na hanyini zeere,
ŋga nu ndro kɛ le,
mu u chrɛwɛ wɔ yi.
Pan ni waŋgrɛ yire leele pre pe,
hali ndro nsra kuɛn gbun vava,
mbe ni piɛri ndee,
mna nyu nyaa mna nyɛni.”
15 La, kee ŋga o Tafun Nyiɛkpɔɔ wre yuu yi ŋga mbo,
“Kena gbana we ja mbe ki yɛ kpɔɔ,
mbe wɛ ŋmba u tnumu tuni,
na ki ni wre naa?
A sraraa we ja mbe ki yɛ kpɔɔ,
mbe wɛ ŋmba u yira kuun,
na ki ni wre na ra?
Van wa ja,
mbe ki yifun yire nyjeeri,
ki yii fun we ja,
mbe van kre yire nyjeeri.”
16 O Tafun Nyiɛkpɔɔ Jaŋgafun,
wre we ti,
mbe yira sisaa le,
pe ŋunɔwifɛɛnlɛ nu,
mbe u ki tɛɛ mbe,
mblɛ pe pe yɛ lii,
fuŋgaami pre ndie tini.
Kie pe na kanhun kii wa,
pe wejinyi nu na pe sroi.
17 Nyiɛkpɔɔ ŋmba wi,
Israel leele kania wre,
we kaari kanhun kre.
Israel leele Nyiɛkpɔɔ cheche wre,
we kaari kanhun ŋga ki nyini,
mbe yirɛ kro sro ble nunu ni,
hali mbe nyaa,
na wuuro kro sro na.
18 We klɔɛ tra chichiele,
na seele kro sro mbe yi kla,
imi yira sisaa lewo gbuun,
mbe u kla kre.
19 Tinyi yire chiɛri yɛ,
yie kro tra kre nu,
hali pɔ fiɛn kuraa,
we ja mbe yi tɔɔnri.
Pe Chiɛri Plɛ Pie Ndru Mbe Pan
20 Nyjila kaa wa na paan, mbe Israel leele mblɛ pie kro Jacob katoo wolo nu kre, wa pe yɛ wru mbe taa waŋgrɛ nyjɛ leele praa chaa mbra pe kla pre na na. Pie dankna ta pe Tafun Nyiɛkpɔɔ, Israel leele Nyiɛkpɔɔ cheche wre nu kpra ni. 21 Israel leele mblɛ lɛ Jacob katoo wolo pre chiɛri plɛ pie ndru mbe pan pe Nyiɛkpɔɔ Jaŋgafun wre pan. 22 Kii wa na Israel leele pre nɛɛ na epo nyu tanyiɛ yi, nde pe chiɛri plɛ pie ndru mbe pan. Ŋga pe n fraka kre ndra na, pe klaa kre fna na pe ni. 23 Ki pe kpra, na waŋgra kre kro nu, o Tafun Nyiɛkpɔɔ Jaŋgafun wre we pe kla imi na u ki yo mu tɛɛ kre.
Nyiɛkpɔɔ We Assyria Ndie Tini
24 O Tafun Jaŋgafun Nyiɛkpɔɔ wre yo u leele mblɛ pee wa Zion nyua na pre pan mbo,
“Kii wa na,
Assyria leele pre e fiŋge,
imi na Egypt leele,
pre na e pe kre,
ande yaa pe fiɛ.
25 Kia mu, e ndie tiniɛ,
kre nyu we to,
mbe ni kna mbe pe kla.
26 Mi e Tafun Nyiɛkpɔɔ Jaŋgafun,
wre mbe pe frɔ na fotro ni,
kre fotro kre ni,
ndaa Midian leele gbun,
Oreb dnɛ kpɔɔ kre lawee kre.
Mbe Assyria leele ndie tini,
imi na ndaa Egypt leele,
ndie tini kre.
27 Na kre nyjila kre waa da,
mbe e shɔ mbe wa,
Assyria leele pre jaŋga kɛɛ.
A pe kanyana ŋga nu pe e le,
mu sɛ pe tuuro e na kre,
we laa e na.”
28 Loŋgoolo wifɛɛnlɛ wi,
mu Ai kakpɔɔ kre shɔ.
Migron na pe yire mu tro,
mu pan.
A pe pe tuuro ti Michmash na.
29 Nyua wee kre nu pe tro,
mu pan mu Ŋunu Geba,
chia kre na.
A ki tia fiɛrɛ Ramah chia leele,
pre yii,
a Ŋunu Saul chia,
Gibeah leele pre fɛ.
30 Gallim leele, e gblee le.
Laishah chia leele e loo.
A Anathoth chia leele,
e paara ɛ.
31 Madmenah, na Gebim leele feni,
mbe pe yɛ ŋmaa shɔ.
32 Aŋga, loŋgoolo pree wa,
Nob chia kre na.
Bawa pe yire na kaŋgroe nyini,
nyua Zion ŋga na,
Jerusalem nyi kre na,
na nyina na pie pe ja.
33 O Tafun Nyiɛkpɔɔ Jaŋgafun,
wre we pe kuari,
mbe wo imi pe tinyi klɛ chile,
na woni kre.
Ŋmba u pe lekpɔɔ titi,
na u yɛ kpɔɔri pe nu wre,
Nyiɛkpɔɔ we u pe fiɛn.
34 O Tafun Nyiɛkpɔɔ wre,
we pe chile mbe wo,
imi na pe klɔ lamu tinyi,
chaan gbana ni na waa kre,
pan pie pe imi na pe,
Lebanon klɔ tinyi chaan kre.