9
Kolo ka n wa ŋga na pie tro mbe ja mbe peyɛ shɔ mbe yili kre kanyana nyjila kre nu. Zebulun na Naphtali sele tra yire, leele nsra yi le mu nya fa, la, brika na, pie yire trɛ yire ŋga buuro mbe yire epo kre na, mbe sɛ su Jordan lɔɔ kre kro, hali mbe sɛ su Galilee tra ŋga leele pe n Nyiɛkpɔɔ chin pre na.2 Leele mblɛ praa nyaari,
wɔmu nu kre,
pe nyisee kpɔɔ ka nya.
Mblɛ praa wa mu tni wɔmu,
kprikpri tra nu kre,
pe nyisee nya.
3 O Tafun Nyiɛkpɔɔ,
ŋu mu ti pe waŋgra kre kpɔɔ,
mu pe ŋga yɛshɔɔrɔ kpɔɔ.
Kee ŋga mu pe mu pe ŋga,
kre ndra na,
pe yɛshɔɔrɔ kpɔɔ lii,
imi na leele yɛshɔɔrɔ lii,
sro kun nyjila kre,
ndee imi na leele shie ŋunɔ,
mbe yirɛ foolo,
mbe pan mbe yɛshɔɔrɔ tɛɛ,
mbra yi yɔɔlɛ kre.
4 Ŋgi na hin? Mu mu leele shɔ,
mu yili jaŋga ŋga kra pe pe tinlɛ,
mnaa pe fiŋge kre kɛɛ.
Mu pe shɔ,
imi na mna wi mna mu leele,
shɔ Midian leele kɛɛ fa kre.
5 Pe ŋunɔwifɛɛnlɛ pre kpawrɛ,
na pe dodonyi nyjɛ nyimi,
mana yire kro,
kanhun we yi shɔ.
6 Pe pɔ wa se mu o ŋga.
Pe o kɛ biblɔ wa,
a u ŋunumu lie wa u patiɛ na.
Pie u mɛɛ tɛɛ “Kawako,
Paaranyinafun,
Nyiɛkpɔɔ Jaŋgafun,
Lɛ ŋmba uu waa blenyini,
Wejinyiŋge Ŋunu.”
7 U jaŋga n wa nyukɔɔrɔ ni,
a u ŋunumu lie we pe,
wejinyiŋge bri.
A Ŋunu David ŋujɔɔn kre,
na we tni,
mbe u ŋunumu li kpra,
na frakaa ni,
mbe yire fuŋgaami,
mbe sɛ su nyjila kro nu.
O Tafun Nyiɛkpɔɔ Jaŋgafun,
wre, u chaara kie ti,
mbe nyjɛ krɛrɛ pe.
Nyiɛkpɔɔ We Israel Ndie Tini
8 O Tafun wre Israel leele,
mblɛ lɛ Jacob nanae pre jaari,
na u kprakuɔn paan.
9 A Israel leele pre na mblɛ,
pee wa Samaria kakpɔɔ na,
pre kro we chin na wre u ki pe.
Pre pe yɛkpɔɔmu,
na kpoŋmbooro kee pini,
na yuu na,
10 “Nyinyi nyjɛ pe sin tofa ni,
yire juari mu wo,
la, wre we dnɛ nyjɛ pe tɛ tɛɛ,
mbe yi sin na.
Fig tinyi nyjɛ ni pe nyinyi yire,
pe yire wo tra,
la, wre we cedar kɛɛn chichiele,
tɛɛ mbe yi sin na.”
11 Ki tia o Tafun Nyiɛkpɔɔ faŋga le,
Ŋunu Rezin loŋgoolo nu,
mu suuroo le pe nu,
mbe pe pan mbe pe tɔ.
12 Syria leele yire yila finhaa,
a Philistine leele yire,
yila tohaa,
a pe nyu nyaa mbe Israel jɔli.
Kre wa ti mbe o Tafun,
Nyiɛkpɔɔ krɔ nyjii,
we pe ndie tini mbe ya.
13 O Tafun Jaŋgafun Nyiɛkpɔɔ,
wre Israel leele pre ndie tini,
nde pe n pe jawala chinɛ,
mu ndru mu pan u pan.
14 Ble nunu chom ni,
o Tafun Nyiɛkpɔɔ we tɛɛ,
mbe Israel waŋgra kre ndra,
na ki naa kun ki na,
we ki shuɛ klɛ,
na ki nyaa knumu mbe wo na.
15 Waŋgra kre ŋulo,
na pe yɛkulo pre lɛ ki ndra,
a ki kafinɛ keenyanyofɛɛnlɛ,
pre lɛ ki naa.
16 Mblɛ pe yiɛklu na leele mblɛ
ni pre tia tutom wo pe na,
a pe pe wa mu fun.
17 Ki tia o Tafun wa ti mbe,
nyanyjɛbɛɛlɛ pre wa shɔ,
a wa lekuchiɛlɛ, ndee bijile,
pre fooro le, ŋgi na hin?
Leele pre kro n Nyiɛkpɔɔ chin,
a pe kro pe sisampefɛɛnlɛ,
na sisam kee bribri yuu.
La, kre wa ti mbe Nyiɛkpɔɔ,
gbun nyjii,
we pe ndie tini mbe ya.
18 Pan pe sisam yire nyini na,
kanhun ki wuuro shio.
Pan ki nyini na kanhun,
to klɔ na na ki shio,
mbe ki wree yiri mbe sɛ,
nyjeeri mbe lawee tɔ.
19 Ŋga o Tafun Nyiɛkpɔɔ Jaŋgafun,
wre krɔ kun kre ndra na,
pan u ndietiniɛ kre nyini na,
kanhun ki nyini tra kre nu,
mbe ki leele pre kla,
mbe pre titi kna,
mbe to peyɛ na.
20 Mna lewo we tro tra kre nu,
sro ŋga we ta chiɛri kpan,
foolo u foolo na kaa, la,
pia ja mbe yɔɔ fio.
Hali pe pre titi biile,
kuraa kaa na.
21 Manasseh sele leele, na,
Ephraim wolo na to peyɛ na,
a pe kro shiin pre ndru,
mu sɛ Judah tɔ.
La, kre wa Nyiɛkpɔɔ krɔkuɔn,
nyu nyiŋge,
we pe ndie tini mbe ya.