Isaiah Pɔ Pe Sɛmbɛɛrɛ Kee
8
O Tafun Nyiɛkpɔɔ na yo ni pan mbo, “Yurɔ hlɛ badaaŋga cha, mu nyunɔ kaan tɛɛ mu nyunɔ ki na na, Maher-Shalal-Hash-Baz. a 2 Mbe ti srawɔfun Uriah, na Zechariah biblɔ Jeberechiah pre pe kee ŋga kpra dansiɛfɛɛnlɛ mbe ni ŋga.”3 Nyjila ka kɔkro, ndaa da ni chɔ ŋmba na wi keenyanyofun wre na, a wra siire ta mna biblɔ se. A O Tafun Nyiɛkpɔɔ na yo ni pan mbo, “Pɔ wre mɛɛ tɛɛ Maher-Shalal-Hash-Baz. 4 Ŋgi na hin? Nyjila ŋga nu pɔ wre we ja mbe yo, ‘Maa,’ ndee, ‘Ndoo,’ kre, Assyria ŋunu we pan mbe Damascus, na Samaria yirɛ nyjɛ pe foolo mu shɔ ŋunɔ yire koli mbe sɛ peii.”
Assyria Ŋunu Wre Paan
5 O Tafun Nyiɛkpɔɔ na paara ni pan na mbo,
6 “Ŋga leele mblɛ Shiloah nyumu,
ŋga ki fuu brɛmm kre je,
a pe yiɛ shɔ Ŋunu Rezin,
na Ŋunu Pekah na ŋga,
7 kre ndra na, Mi e Tafun wre,
we ti mbe Assyria ŋunu,
na u ŋunɔwifɛɛnlɛ faŋgafɛɛnlɛ,
pre pan mbe e tɔ,
na Euphrates lɔɔ kpɔɔ ki nyi,
mu yili fimi na.
8 Loŋgoolo pre we Judah tra,
tɔ poŋgo,
pan pie pe na lɔɔ ki nyi,
mu pe yii yulɔɛ nu.
La, wre na Nyiɛkpɔɔ oo wa,
a we kɛ nyaa na kuɛn yi,
mbe o tɔ tra kre na.
9 Yire leele mblɛ ee wa,
waŋgrɛ fɔnyi nu kre,
e ti mbe fiɛrɛ e yii,
yire leele mblɛ ee wa,
haalee kre,
e ndie tɛɛ e loo,
e eyɛ kna na ŋunɔ e shie,
mbe e ti mbe fiɛrɛ kpɔɔ e yii.
10 Jawala ŋga ee wru kpan,
kie pe waara.
E paaraa nyjɛ e chaa kro paara,
yi kro we pe finfin,
ŋgi na hin?
Wre na Nyiɛkpɔɔ oo wa.”
O Tafun Nyiɛkpɔɔ Isaiah Jaari
11 O Tafun Nyiɛkpɔɔ na paara ni pan jaŋga ni mna ni jaari na, mbaa na tro kooloe nyjɛ na leele pre tro yire na. Wra yo mbo,
12 “Kee nyjɛ leele pre yeeri,
linku kee yire,
yaa na yi jawa ma,
a yaa na yirɛ nyjɛ yi pe fiɛrɛ ni,
yire fiɛ, mbra seeri yi yiɛ.
13 E sɔɔnri na mi wi e Tafun,
Nyiɛkpɔɔ Jaŋgafun wre,
wre u pe cheche,
a wre u fna mbe e fiɛ,
mbra seeri ni yiɛ.
14 A wre we pe e shɔfun.
La, Israel jlomu shiin yire,
pan rɛ,
we pe dnɛ ŋga na pie gbro,
mbe to.
A we pe pɛlɛ,
mbe Jerusalem leele ŋga.
15 Pe tataara we gbro mbe to,
mbe kuari.
Pie to pɛlɛ nu mbe ki pe yii.”
Gboo Wie Jaaraa
16 Yire ni twanfɛɛnlɛ pre, e kee,
na mbra nyjɛ ni nyina yire,
nyu yii yira ni,
e yi le chichie.
17 Mbe o Tafun Nyiɛkpɔɔ ŋmba,
u yiɛ wɔ Jacob katoo leele na wre,
mbe u shie, a mbe dankna u na.
18 Mi wi ŋmba,
mi na biile mblɛ o Tafun,
Nyiɛkpɔɔ ni ŋga pre.
O Tafun Nyiɛkpɔɔ Jaŋgafun,
ŋmba uu wa mu tni,
Zion nyua na,
wre tia o pe sɛmbɛɛrɛ,
na kawako yira Israel tra nu.
19 La, leele we yo e pan na e sɛ chlɛfɛɛnlɛ, na gboolo wiefɛɛnlɛ mblɛ pe yirɛ pini mbe yira tini na hanyiɛlɛ nyɛnɛɛ yi pre wie kaalɛɛ. Nyiɛkpɔɔ ma leele fna mbe wie kala ree? Yira ŋgi kie ti mbe lefɛɛnlɛ sɛ na gboolo wie kala hin?
20 Na pe waa yo e pan ma, e yo pe pan na, “E kee ŋga o Tafun Nyiɛkpɔɔ e nyina kre loo, yaa ndie tɛɛ gboolo wiefɛɛnlɛ pre kee yire na, yia ja mbe e wɔ wɔmu ŋga nu e nyi kre nu.”
Kanyana Nyjila
21 Leele pre we tro tra kre nu. Sra we wɔ pe na, mbe klo pe ta. Pe klo ta nyjila kre nu krɔ we pe kun, mbe pe pe ŋunu, na pe Nyiɛkpɔɔ wre sun. Pie yiɛ yire mbe le nyjeeri, 22 mbe yiɛ soo mbe le tra, la, pia yaka nya, na kanyana, na wɔmu ŋga ki pe fiɛrɛ ni bɔkɔ, mbe pe pe kɔɔnri mbe sɛ le wɔmu kprikpri nu.