Kee Nyjɛ Isaiah Na Yo Ŋunu Ahaz Pan
7
Nyjila ŋga nu Ŋunu Ahaz, Jotham biblɔ ŋmba wra pe Uzziah nana wre na ŋunumu li Judah tra nu kre, ŋunɔ ka na kun. Syria ŋunu Rezin, na Pekah, Remaliah biblɔ ŋmba wra pe Israel ŋunu wre na pan mu Jerusalem tɔ, la, pe nsra ja mu wi mu chia kre shɔ.2 Ŋga Ŋunu Ahaz na loo na Syria ŋunɔwifɛɛnlɛ, na Israel ŋunɔwifɛɛnlɛ nyu pe nunu mbe pan mbe wi na u ni kre, fiɛrɛ kpɔɔ na wre na Judah leele pre kro yii, a praa seeri kro na fuflɛ gbun mu le klɔ tinyi nu, a yira teele.
3 A O Tafun Nyiɛkpɔɔ na yo Isaiah pan mbo, “Mu biblɔ Shear-Jashuba wru mbe ŋu na wre sɛ Ŋunu Ahaz fni. Ee sɛ u da kolo ŋga na yonyi jefɛɛnlɛ pre nyi lawee ka nu, nyjeeri haa lawee ŋga nu nyumu nyi mu yire kre nu. 4 Yo u pan na u dɔɔta, mbe pe komm, a waa shia fiɛ, a waa ti mbe gbun yɔ u na, krɔ kpɔɔ ŋga ki Syria ŋunu Rezin, na Ŋunu Pekah kun kre, ki n fiɛrɛ ni, pan ki nyi na pe kefɛɛ shiin tɛɛ mu kanhun gbɛɛri, a kra wree yili. 5 Syria ŋunu, na Israel ŋunu pe sɛ jawala fɔɔn le na mu ni. 6 Pe chaa mbe wi Judah leele ni, mbe ki ti fiɛrɛ kpɔɔ wo pe na, mbe pe leele pre ta mbe yii mbe ya pe yɛ na, mbe Tabeel biblɔ wre yii mbe tɛɛ Judah ŋunumu na.
7 La, mi e Tafun Nyiɛkpɔɔ wre yo na,
‘Mba ti mbe kre kee ŋga pe fio.’
8 Ŋgi na hin?
Syria ndra yi ki kakpɔɔ Damascus kre,
a Damascus ndra yi Ŋunu Rezin.
A mna yɛlɛ fuloe taarɛ na kunɔ,
nyu na, Israel we ja,
kia ja mbe pe waŋgra.
9 Israel ndra yi,
ki kakpɔɔ Samaria kre,
a Samaria ndra yi,
ki Ŋunu Pekah.
Kena Ahaz, na mu n ja mu yire,
gbiŋmbi mu shɔnlie nu,
ma ja mbe yire.”
Immanuel Wre Sɛmbɛɛrɛ Kee
10 O Tafun Nyiɛkpɔɔ na ndru mu paara na Ahaz ni mbo, 11 “Mu Tafun Nyiɛkpɔɔ wre wie mbe u mu ŋga sɛmbɛɛrɛ kee ka. Kie jaa pe kee ŋga ki yiri kuulo ndoo tra tapan, ndee mbe pe kee ŋga ki yiri nyjeeri nyjeeri.”
12 A Ahaz na kna mbo, “Mba ki wie. Mba ja mbe ni Tafun Nyiɛkpɔɔ wre pe mbe le.”
13 Bawa Isaiah na yo mbo, “Kena yire David katoo leele, e loo, e ja na lewo frɔ ŋga ni u nyi pini na le imi na e chaa, kena e chaa mbe ni Nyiɛkpɔɔ wre frɔ ŋga ni u nyi pe mbe le ma na ree? 14 Kena na pan yi rɛ, o Tafun wre titi we mu ŋga sɛmbɛɛrɛ kee ka. Bichable ŋmba u n blɔ chin tun we siire ta, mbe biblɔ se, mbe pe u mɛɛ tɛɛ Immanuel.b 15 Nyjila ŋga ni pɔ wre we da mbe ja mbe ŋga ki nyu, na ŋga ki n nyu lalaa chin kre, naara, na srɛ nyumu yie pe u sro. 16 Kre nyjila kre, tra ŋga ŋulo shiin mblɛ mnaa fiɛ titi pre trɛ yire we sni waara.
17 O Tafun Nyiɛkpɔɔ we ti mbe kanyana kpɔɔ e da, ŋu na mu leele pre, na mu tolɛɛ David katoo leele, mu yire ŋga Israel kun Judah na, kre kanyana nyjila kre ka n da mu to o leele plɛ na tun, Assyria ŋunu we ti mbe u pan e na.”
18 Na kre nyjila kre waa da, o Tafun Nyiɛkpɔɔ we afeelee fɔ, mbe ki ti mbe Egypt ŋunɔwifɛɛnlɛ pan na shunshɔɔnlɔ lɛ, mbe Assyria leele pe na srɛ lɛ, mbe pan e na. 19 Pie paan tni lawee kre nu poŋgo, plɛ we tni lafooloe yire mbɛɛlɛ na, na dnɛ weele nu, lawee nyjɛ nu wuuro nyi, na yurɛ kahaa yire kro, pie tni yi nu.
20 “Na kre nyjila kre waa da, o Tafun Nyiɛkpɔɔ we Assyria ŋunu hari mbe u Euphrates lɔɔ kre kun mbe pan na u ndra klu yira ni, mbe pan mbe e ndrɛ klu, mbe yooro nyjɛ yii wa e jeelee na klu na, yire na e nyutan yooro ni kro.
21 Kre nyjila kre nu, ndro we ja mbe napɔlɔ, na sikaala shiin shɔ mbe tɛɛ. 22 A pie ja mbe u ŋga naara ŋga kie u da. Kie ti mbe leele chiɛri mblɛ pie kro tra kre nu pre, we naara, na srɛ ta mbe yi pe pe sro.
23 Na kre nyjila kre waa da, see ŋga nu tre sɛnyi tinyi kagbeŋge nyi, mbe ki ndrɔ da swafinyi kagbeŋge kre, afue wrɛ, na wuuro yie tɔ mbe yi yii. 24 Bawa leele we na shie nyaa mbra kaara chaa na bɛnyi, na snimi ni, ŋga afue wrɛ, na wuuro we tɔ mbe lawee kre tɔ poŋgo kre ndra na. 25 Lawee nyjɛ nu praa yirɛ ndru fa yire kro, wuuro we tɔ mbe yi tɔ kro, mbe ndro wa jaa le wa, bawa nui, na mbaala we na kaa.”