Nyiɛkpɔɔ Isaiah Yeeri
6
Yɛlɛ ŋga na Ŋunu Uzziah na ku kre, ndaa o Tafun Nyiɛkpɔɔ nya na uu wa mu tni ŋujɔɔn na, mu kpɔɔ, mu yiri nyjeeri, a u dodoŋgi titnɔŋɔ nyu wo mu Suminyuŋgo kre nyi poŋgo. 2 A nyjeeri bitumblɔ mblɛ pe yeeri seraphim pre naa wa mu yire u ndra na, praa wa na kuɛn kɔɔnanunu ni. A pra pe yiɛ tɔtɔ na kuɛn shiinshiin ni, mna pe yɛ tɔ na shiinshiin ni, mna shiinshiin tɛɛ na yirii nyjeeri. 3 A praa yuu pe yɛ pan mbo,“Cheche, cheche, cheche.
O Tafun Nyiɛkpɔɔ Jaŋgafun,
wre u pe cheche,
a u yɛnyiŋge waŋgra,
ŋga nyi kro.”
4 A imi pe mana naa yilii kre na tia Suminyuŋgo kre na teele, mna sɛ su ki nɔɔ na, a wree na ki nyi poŋgo.
5 Bawa ndaa nyɛni mna yo na, “Woyo! Ni wo kɔ, ŋgi na hin? Lewo wi mi, a kee ŋga ki yilii ni nyuu kro pe sisam, a leele mblɛ nyuu sisam kee yilii nu ni nyi mu tni. Ande ni nyibie Ŋunu ŋmba wi o Tafun Jaŋgafun Nyiɛkpɔɔ wre nya.”
6 A seraphim pre nunu na yiri mna pan ni pan, wra sɛ kanhun muŋgo wɔ sragbunu kre na, na tɔɔnrɔ kanhun wɔ wo ni, 7 mna pan mu ni nyu ni na ki ni, mna yo mbo, “Ŋga ki mu nyu ni ŋga, mu pimi laa mu na, a pe mu ndra lɔ.”
8 A ndaa loo na o Tafun Nyiɛkpɔɔ yuu mbo, “Ŋmbi mbe tun hin? A ŋmbi we sɛ hin?” A ndaa yo, “Ni we, ni tun.”
9 A o Tafun Nyiɛkpɔɔ na yo mbo,
“Sɛ yo ni leele pre pan na,
ee kaalɛɛ loo, a yaa yi nɔɔ loo.
Ee kaalɛɛ nya, a yaa yi nɔɔ chin.”
10 A wra yo ni pan mbo,
“Ti mbe leele mblɛ jawala ku,
mbe pe ndiile kan,
mbe fun nyiɛlɛ na,
mbe pia na nyaa,
ndee mbra ndru,
ndee mbe kala nɔɔ loo.
Na kre ma, pie ndru,
mbe pan ni pan,
mbe ni pe tra.”
11 A ndaa u wie na, “Ni Tafun, nyjila mni kre kee ŋga we li hin?” A wra kna mbo,
“Mbe sɛ su na kakpɔɛ yire we kla,
mbe ndro wa pe yi na,
mbe kalonyi yire sni,
waara kpekle,
mbe tra kre sni waara.
12 Kre nyjila kre mbe leele pre ni,
mbe pe sɛ haalee lawee ka nu,
mbe ki ti tra kre kaari kataa.
13 Hali na mu leele pre yɔ kɛ,
a pe yɔmu nunu kro tra
kre nu kuraa mbe pe kla.
Mblɛ pie kro wa pre,
pie pe na oak didikolo,
ŋga pe kun mu wa yi.
Mbe ki ti Nyiɛkpɔɔ leele,
mblɛ pe pe cheche,
yiri tra kre nu.”