Tre Sɛnyi See Kre Mɛɛ
5
Mbe mɛɛ ka kɔ,mbe ni korifun wa ŋga,
mɛɛ kre wru ni korifun wre,
tre sɛnyi see ka haa.
Ni korifun wree wa na,
tre sɛnyi see ka ni nyambie,
mbɛɛ tra taan titi ka nu.
2 Wra tra kre tuulo,
mna ki gbonyi yoori ki nu,
mna tre sɛnyi,
chichiele luu ki nu.
Mna nyuŋgo gedeŋge ka sin ki na,
na ndru ki na, na see kre sri.
Mna wee ka tuu,
mna we na simi nyumu yuwi.
Wraa sri na yie sɛ mbe tna,
la, yira kɔ mu taan nyanya kro.
3 Kena yire Jerusalem,
na Judah leele,
e mi na ni tre sɛnyi see,
kre kprakun.
4 Kena kala kaa wa
mbe ndaa pe ki na,
a ni nsra ki pe ree?
Kena ŋgi ki tia,
tre sɛnyi tɛɛn ndaa chaa,
a yi kro sɛ taan nyanya ma hin?
5 Fuŋga mbe e nyina imi,
mbe ni tre sɛnyi see kre pe.
Mbe wuuro nyjɛ ni luu,
mu ki fɛ mu kun yire chile,
mbe ki ti yurɛ yi ka.
A mbe mboo ŋga ni sin,
mu yi fɛ mu kun kre,
juari mbe yurɛ yi taanla.
6 Mbe ti mbe yi kro nyaa nu,
mba yi lamu fali,
a mba yi ndra klu,
la mbe ti wuuro,
na afue yi tɔ kro poŋgo,
a mba ti mbe nyiɛ pan,
mbe wo yi na.
7 Israel yi o Tafun Nyiɛkpɔɔ,
Jaŋgafun wre tre see kre,
a Judah leele lɛ tre sɛnyi yire,
wra luu kre.
Wraa le na pie kee ŋga ki nyu pe,
la, linkuuro kee bribri praa pini.
Wraa le na pie kee ŋga ki fraka pe,
la, fooro nyɛnɛɛ bri wra loo.
Sisam Ŋga Lewo Pini
8 E atɛ. Yire mblɛ e nyinyi siin,
na yaa nyinyi nyjɛ yii wa,
e pan fa na,
na trɛ loni na yaa trɛ na,
mbe sɛ su na ndro wa lawee,
ta mbe tni na,
mbe yire chiin tra kre wru,
mbe tni.
9 Kee ŋga o Tafun Nyiɛkpɔɔ,
Jaŋgafun wre yo,
a ni loo yi kre mbo,
“Imi kie pe kpan,
yire nyinyi badɛnyi chichiele,
nyjɛ we sni ma waara,
a ndro n wa mbe tni yi nu.
10 Tre sɛnyi eka kɛ see simi gbɔwo,
ŋga kie ja mbe pe kro we pe,
galɔm kɔɔnanu.
Ee shɔlɔ luu tataara,
la, fiɛn yɛ ee kɔ mbe ta,
mbe kun yi na.”
11 E atɛ, yire mblɛ e yirii bnimi pupu,
mbe kɛ le sigbɔɔrɔ nu,
mbe gbɔ chiin mbe yila sɛ kɔ,
mbe hɛ su na ee gbɔ,
mbe bru mbra fuula.
12 E juru, na saŋgo, na yambrawa,
na bnɔɛ, na simi teeri,
na e ble kpɔɛ lii,
ande e kee ka ma na,
kee nyjɛ o Tafun Nyiɛkpɔɔ,
pini yire ni.
13 Ki tia pie ni leele yii,
mbe sɛ na pe ni waŋgra fɔŋgɔ nu,
ŋga pe n jawala ni kre ndra na.
A klo kie pe loplombo gbo,
a lenɛɛmu pre, gbɔɔ kie pe gbo.
14 Kuulo ndoo nyu nyaa gbɛnkɛm,
mu na Jerusalem loplombo,
na lenɛɛmu mblɛ pe gble,
na tro ki na,
na mblɛ pe peyɛ kpɔɔri,
na ki ni pre sri, mbe pe jɔli.
15 Ndro kro we pe fiɛn, mbe uyɛ nyjii,
mbe yɛkpɔɔmu nyu to.
16 La, o Tafun Nyiɛkpɔɔ Jaŋgafun,
we yire kefrakaa ŋga u pini na,
mbe u kpɔɔmu nyina.
A we yire u leele pre kprakuɔn na,
mbe nyina na u pe cheche.
17 Chia kre kataa kre na mbaala,
na sikaala biile we na kaa,
na pe kahaa yi.
18 E atɛ, kee nyjɛ e fnɛ yire,
pe na mɛnyi yi,
a e yi tɛɛ na sisam poo,
na mbra e yɛ na.
19 E yuu mbo,
“E ti mbe Nyiɛkpɔɔ kee,
ŋga u yo we pe kre,
pe nyaanyaa mbe o le.
E ti mbe Israel Nyiɛkpɔɔ cheche wre,
kee ŋga kii wa u ndra pe,
mbe o ki chin.”
20 E atɛ, yire mblɛ,
e sisam yeeri chichie,
na chichie yeeri sisam.
Na e wɔmu nya e ki yeeri nyisee,
a na e nyisee nya,
mbe e ki yeeri wɔmu.
Yire e susrom yeeri taan,
na taan yeeri susrom.
21 E atɛ, yire mblɛ e jawa,
na e kala chin eyɛ pan,
mu jawala ni kre.
22 E atɛ, yire mblɛ e simi kɔtua,
tɛɛ na blɛm kuun,
yire mblɛ e eyɛ kpɔɔri,
sigbɔɔrɔ ni kre, e atɛ.
23 Dɔli yira ŋga ee shɔ kre ndra na,
e tia pimi lifɛɛnlɛ,
na pe yɛ wru na lii,
a e na kpra li,
mbe tamu lifɛɛnlɛ ŋga.
24 Ki tia imi na kanhun nyaa wɛɛ,
na yua kpakpɛɛ sroi,
mbe wo kre,
pan e didinyi we fɔɔn,
mbe e totoe nyaara,
mbe wo, ŋgi na hin?
E kee ŋga o Tafun Jaŋgafun,
Israel leele Nyiɛkpɔɔ,
cheche wre nyina kre je.
25 O Tafun Nyiɛkpɔɔ wre krɔ kun,
na u leele pre ni,
a u kɛ tini mbe pe ndie tini.
Nyuɛ yire we teele,
mbe leele ku,
mbe sni lete na na kra yi.
A kre chiin ma o Tafun Nyiɛkpɔɔ,
wre krɔ kɔɔn haŋa,
u krɔ we kun kpɔɔ,
mbe u pe ndie tini mbe ya.
26 O Tafun Nyiɛkpɔɔ wre,
we sɛmbɛɛrɛ kee pe,
mbe haalee trɛ yire leele yeeri.
We afeelee weeri mbe pe yeeri,
mbe yiri tra nyukɔɔrɔ na,
mbe tafɛŋgɛ wru,
mbe pan nyaanyaa.
27 Ndro n wa mbe fna pe nu,
a wa wa gbro.
Pe wa wa gbunu,
a ŋunumu wa wa shɔ.
Wa greree wa saan,
a wa kpawrɛ maŋa wa kun.
28 Pe snimi nyu tna,
a pe pe bɛnyi kru mu tɛɛ.
Pe soolo yeŋgrɔɛ sheli,
na chirɛbɔ yi,
a pe sookɛɛ jeelee kna,
nyaanyaa na legboo fuflɛ yi.
29 Pan pe ŋunɔwifɛɛnlɛ pre,
gble leni na jirae lɛ,
na gnu na jirae pɔɛlɛɛ,
mblɛ pe yurɔ gbo,
mu u fulo na shie,
mna ndro wa jaa u shɔ pe pan.
30 Na ki ble kre waa da,
imi na jirae gble leni kre,
pan pie na gble,
Israel na badaaŋga,
imi na epo tini kre.
Na ndro yiɛ wa mu tra kre le,
kanyana, na wɔmu,
we na nyaa,
hali tloe we ti,
mbe nyisee kaari wɔmu.