Zion O Tafun Nyiɛkpɔɔ Ŋga Mboo
149
E o Tafun Nyiɛkpɔɔ ŋga mɛɛ.E mɛɛ fɔŋgɔ kɔ e u ŋga.
E yire u leele, kprafɛɛnlɛ fnihaa,
e u ŋga mɛɛ.
2 E ti mbe Israel leele
yiɛshɔ pe gbeelefun na,
e ti mbe Zion leele yiɛshɔ kpɔɔ
pe ŋunu wre na.
3 E ti mbe pe yɛshɔɔrɔ tɛɛ
mbe u ŋga mɛɛ,
mbe pe binyi na saŋgo gbun
mbe mɛɛ kɔ mbe u ŋga.
4 O Tafun Nyiɛkpɔɔ yiɛshɔ
u leele na,
a u mblɛ pe peyɛ nyjiri na u kaan
pre kaan ŋmaashɔmu.
5 E ti mbe u leele pre yiɛshɔ
pe buuro ŋga pe ta na,
mbe yɛshɔɔrɔ mɛɛ kɔ
pe dɛŋglɛ na.
6 E ti Nyiɛkpɔɔ mɛɛ ŋgaa kpɔɔ
e nyu na,
mbe e brɔfiɛn yiɛshiin yii kɛɛ,
7 ŋga ni ee tɛɛ wi
waŋgra leele ni mbe pe ja,
mbe pe ndie tini,
8 mbe pe ŋulo le jlɔnyi na,
mbe sɛɛrɛ le pe loplombo na,
9 mbe pe ndie tini imi na
pe ki nyunɔ mu tɛɛ
na pie pe pe kre.
Kre kolo ŋga na Nyiɛkpɔɔ leele
we tro mbe wi mbe yili,
kena e o Tafun Nyiɛkpɔɔ
wre ŋga mɛɛ.