Nyiɛkpɔɔ Jaŋga
147
E o Tafun Nyiɛkpɔɔ wre ŋga mɛɛ,Ki nyu na mu mɛɛ kɔ
mbe o Nyiɛkpɔɔ wre ŋga,
a ki tna, mu fna na oo u ŋga mɛɛ.
2 O Tafun Nyiɛkpɔɔ we ndru
mbe Jerusalem pe na ki fa yi,
a Israel leele mblɛ pe fɛ
mu nyina pre,
we ndru mbe pan na pe ni.
3 A mblɛ pe fooro lii pre,
we pe gbunyiŋge,
mbe mblɛ pe kala nyaa pre bre.
4 U wɔɛlɛɛ nyjɛ yii wa
nyjeeri kro nyu chin,
mu yi kro ŋga mɛɛ nununu.
5 O Tafun Nyiɛkpɔɔ wre kpɔɔ,
a u jaŋga kpɔɔ,
a ndro wa jaa u kachindɛ
damu chin.
6 O Tafun Nyiɛkpɔɔ wre mblɛ
pe peyɛ nyjiri pre yire nyjeeri,
la, u sisampefɛɛnlɛ ŋunɔi
na chaan tra.
7 E mɛɛ kɔ e o Tafun Nyiɛkpɔɔ
ŋga mboo,
e saŋgo tɛɛ e mɛɛ gbun
e o Nyiɛkpɔɔ wre ŋga.
8 Wre u tloe tɛɛ mu nyiɛ yiɛ tɔ,
mu tia nyiɛ na paan
na woni tra na,
a ki tia nyaa na fini nyuɛ na.
9 U yurɛ mblɛ mu chin
kro kaan sro,
a na hanyiɛlɛ biile nyɛni
na u yeeri,
u pe kaan pe sro.
10 Soo faŋga ŋga kii wa u nu
na ma u yiɛshɔ,
a faŋga ŋga kii wa lewo nu
na ma u yiɛshɔ.
11 La, mblɛ na u yiɛshɔ lɛ
mblɛ pe wre Nyiɛkpɔɔ fiɛ,
mu na dankna u koroo kpɔɔ
ŋga kii wa nyjila kro nu kre na.
12 Jerusalem, mu Nyiɛkpɔɔ
wre ŋga mɛɛ,
ŋga ki fna na u ni.
13 Ŋgi na hin? Wre u mu krɔɛ
nyjɛ yii wa mu jlonwee nyu na
yire ŋga faŋga,
mu leele mblɛ pee wa
mu nu pre dwan.
14 U tia wejinyiŋge pan mu sam na,
mu mu ŋga shɔlɔ chiriri,
a mu leele ta mu yɔɔ.
15 Wre u paara tra pan,
mbe ŋga u yuu kre pe nyaanyaa.
16 U sugbeŋge chaan na dɛŋglɛ yi,
mu mɛŋɛ na woni
mbe ki pe na kanhun tɔɔnrɔ yi.
17 U nyiɛsubie woni na gbonyi yi.
Ŋmbi we jaa yire
mbe ki nyii mu shie hin?
18 Na u paara,
mbe yi kro nya mbe wo,
na u tia fuflɛ gbun,
mbe yi kaari nyumu mbra fuu.
19 Wra u kee wɔ mu Jacob nyina,
mna Israel leele nyina u mbra,
na kee nyjɛ u chaa.
20 U n waŋgrɛ hɛnyi yire pe ma,
a ki tia pe n u mbra yire chin.
Kena e o Tafun Nyiɛkpɔɔ
wre ŋga mɛɛ.