Nyiɛkpɔɔ Blenyini Kpra Lie
146
E o Tafun Nyiɛkpɔɔ wre ŋga mɛɛ.Ni nyiɛ, o Tafun Nyiɛkpɔɔ
ŋga mɛɛ.
2 Ŋga nii wa ŋmaa ni ŋga,
mbe o Tafun wre ŋga mɛɛ,
ŋga nii wa na le ŋga wala,
mbe mɛɛ kɔ
mbe o Tafun wre mɛɛ yile.
3 Maa dankna ŋulo na,
lewo na nyjuro wa jaa mu shɔ.
4 Na u ŋumu yili u nu mu kɔ to,
mbe u kaari pooro.
Kre ble kre, kee ŋga u jawa
mbe pe kro nyu to.
5 Lewo ŋmba na Jacob Nyiɛkpɔɔ
wre yaa,
a u u chin na u Tafun wi,
mu dankna u na
wre wo yi dwamu.
6 Wre Nyiɛkpɔɔ wre wra
nyjeeri na tra, na epo
na yira ŋga kii wa ki nu kro wa,
wre wi kprafun nyjila kro nu.
7 U mblɛ pe gbuun pimi ni waara
pre kee lii na pe kaan,
na mblɛ klo ta pre kaan sro.
A mblɛ pe yiri na leni nyuŋgo
finfin kre,
u pe woni na waa.
8 O Tafun Nyiɛkpɔɔ u tia
fuunlo na nyaa,
a mblɛ pe to pre,
u pe yire na yirei sholo,
a mblɛ pe fraka pre u pe kori.
9 O Tafun Nyiɛkpɔɔ u fumblɔ le,
na bijile na lekuchiɛlɛ le.
La, sisampefɛɛnlɛ rɛ,
u shie na pe ni klahaa.
10 O Tafun Nyiɛkpɔɔ wre,
u ŋunumu lii nyjila kro nu.
Zion, mu Nyiɛkpɔɔ wre
ŋunumu lii nyjila kro nu,
kena o Tafun Nyiɛkpɔɔ
wre ŋga mɛɛ.