Mɛɛ Ŋgaa Mɛɛ
145
Ni Nyiɛkpɔɔ, ŋunu wi ŋunu,kena mbe mu kpɔɔ,
mbe mu ŋga mɛɛ nyjila kro nu.
2 Blenyini ŋga mbe mu ŋga mɛɛ,
mbe mu mɛɛ kpɔɔ nyjila kro nu.
3 O Tafun wre kpɔɔ,
kena ki fna o u ŋga mɛɛ kpɔɔ,
ndro wa jaa u kpɔɔrɔm
kre damu chin.
4 Kawako kee nyjɛ mna pe kre,
leele mblɛ pie yiri mbakɔ
pre we yi loo,
plɛ we yiri mbe yi yo plɛ pan.
5 Pie mu yɛnyiŋge,
na mu jaŋga kre kee yo,
a mbe tni mbe mu kawako kee
nyjɛ mu pe yire kee jawa.
6 Pie mu jaŋga kee nyjɛ mu pe,
a yi pe fiɛrɛ ni yire kee yo,
a mbe mu kekpɔɛ nyjɛ mu pe
yire kee kpali.
7 Pie chichie ŋga mu pe kee yo,
mbe mu frakaa ŋga mu fraka
kre yɛshɔɔrɔ mɛɛ kɔ mbe mu ŋga.
8 O Tafun Nyiɛkpɔɔ wre pe lewo
dumifun na foorochinfun.
U krɔ na kun nyaanyaa,
a u koroo kpɔɔ mu tro.
9 O Tafun wre nyu
mu lewo kro ŋga,
a u fooroo wa
yira ŋga u pe kro na.
10 O Tafun Nyiɛkpɔɔ, yira ŋga
mu wa kro we mu ŋga mboo.
A mu leele kro we mu ŋga mɛɛ.
11 Pie mu ŋunumu kre
yɛnyiŋge kee yo,
mbe mu jaŋga kre kee yo,
12 mbe ki ti mbe lewo kro
mu kekpɔɛ nyjɛ mu pe
yire kee chin,
mbe mu ŋunumu kre yɛnyiŋge
ŋga ki chiɛnri kre nya.
13 Mu ŋunumu liee wa nyjila kro nu,
a mu jaŋgaa wa lewo
na nyjuro kro na nyjila kro nu.
O Tafun wre kpra lii
u nyu kee kro nu,
a u yira ŋga u pe kro kori.
14 Mblɛ pe to pre u pe yirei,
na mblɛ pee wa,
kanyana nu pre shio na waa.
15 Ŋu na leele, na yurɛ kro yiɛ nyi,
a mu pe kaan sro
nyjila ŋga ki fna nu.
16 A mu kɛ nyaari na yira
ŋga ki ŋuni kro kaan
ŋga ki ki shia,
mbe yi kro ta mbe yɔɔ.
17 O Tafun wre fraka
u kooloe kro na,
a uu koroo ni mu yira
ŋga u gbeele kro ŋga.
18 Mblɛ pe o Tafun wre yeeri
na kpra ni pre,
u floi na mbrai pe na.
19 A mblɛ pe u fiɛ pre,
u pe keshiɛn pini na pe kaan,
na pe nyɛnɛɛ ndru, na pe shio.
20 A mblɛ pe u kori pre,
u kɛ toni pe na,
la, sisampefɛɛnlɛ pre rɛ,
we pe kla.
21 Ni nyu wa jaa tɔ o Tafun
Nyiɛkpɔɔ mɛɛ ŋgaa na,
e ti mbe yira ŋga u wa kro
u mɛɛ cheche kre kpɔɔ
nyjila kro nu.