Ŋunu Nyiɛkpɔɔ Ŋga Mboo
144
O Tafun Nyiɛkpɔɔwo yi mɛɛ,
wre u kɛ toni ni na.
Wre u ni nyina ŋunɔ wiire,
mbe ni jaa kɛnyi tɛɛ mbe ŋunɔ wi.
2 Wre u nyɔɔ ni na, ni lefun wi,
wre jaara ni feni mbe sɛ ndra
mbe u ni shɔ,
a wre wi ni dankna,
a wre u leele pini fiɛn ni yiɛ.
3 O Tafun Nyiɛkpɔɔ,
lewo wi ŋmbi
a u kee mu shian ma hin?
Lewo na nyjuro wi ŋmbi kuraa,
a mna u kee jawa ma hin?
4 Pan lewo nyi na
fuflɛ ŋga ndro ŋuni ŋga yi.
Pan u ble nyjɛ we li troi nyaanyaa
na shie na yira ndile yi.
5 O Tafun Nyiɛkpɔɔ,
nyjeeri yɔ mu tii tra,
mu jeelee taa nyuɛ na
mbe yiraa wree kuun.
6 Ti mbe nyiɛ na nyini plipli,
mbe mu loŋgoolo fɛ mbe nyina.
Pe ŋu snimi ni, mu pe kla.
7 Yire nyjeeri mu kɛ tini mu ni shɔ.
Ni wɔ mu yili latɛɛ
ŋga ki ni lii ŋga nu,
ni shɔ mu yili fumblɔ kɛɛ.
8 Kafinɛ kee bribri yi yilii pe nyuu,
pie da na kpra pe yuu,
ande kala pe fnɛ.
9 Nyiɛkpɔɔ, mbe mɛɛ fɔŋgɔ kɔ
mbe mu ŋga,
saŋgo ŋga mɛnyi yii kɛ mbe gbun
mbe mɛɛ kɔ mbe mu ŋga.
10 Ŋu mu tia ŋulo wi mu yili,
a mu mu sumifun David shɔ
brɔfiɛn yiɛshiin kɛɛ.
11 Ni shɔ mu yili fumblɔ kɛɛ,
kafinɛ kee bribri pe yuu.
Pie da na kpra kee pe yuu,
ande kala pe fnɛ.
12 Nyiɛkpɔɔ ti mbe o bibilɛ yiri
mbe lɛ, na tiŋge ŋga pe luu yi,
mbe o bichabɛɛlɛ nyu na ŋunu
katoo nyuŋgo pilaasi yi.
13 Nyiɛkpɔɔ, ti mbe o sro tɛɛ lawee
nyi sro nyininyini,
mbe o mbaala
mblɛ pee wa o tra nu pre nɛɛ
mbe ndro wa jaa pe tɔɔnri.
14 Mbe o nui se nɛɛrɛ,
mbe plɛ wa biile kpɔli,
ndee mbe kro ma mbe pia na sii.
Maa ti mbe o fooro
nyɛnɛɛ loo o lete na.
15 Waŋgra ŋga pan
yire kee nyjɛ pe kpra,
kre wo yi Nyiɛkpɔɔ yɛshɔɔrɔ.
A lele mblɛ pe Nyiɛkpɔɔ wru
mu pe pe Tafun pre wo yi dwamu.