Nyiɛtalaa
143
O Tafun Nyiɛkpɔɔ,ni nyiɛtalaa loo,
jande, ndie tɛɛ ni pan,
mu frakaa na mu kpra
kre ndra na, loo ni pan.
2 Mu sumifun wi mi,
maa shia ni gbun na pimi ni,
ŋgi na hin? Ndro n wa
mu fraka mu yiɛ.
3 Ni loŋgoolo ni mu sɛ ni yii,
mu ni gbun mu wa tra,
mu tia ni tni wɔmu nu
na gboo wi.
4 Ki tia ni fna,
a ni loloŋgo na seeri ni lɛɛ.
5 Ni fafa ble yire sɔɔnri,
mu kee nyjɛ mna pe yire kro jawa,
mu kro na yi sɔɔnri suwi.
6 Ni kɛnyi yire nyjeeri na mu tali.
Imi na gbɔɔ we lewo ta tra
ŋga nu nyumu n wa kre,
pan mu la ni nyiɛ ta.
7 O Tafun Nyiɛkpɔɔ,
pe nyaanyaa mu shɔ ni pan,
ni dankna kro kɔ.
Maa shia yiɛ wɔ ni na,
na kre ma, mbe pe na gboo
ŋmba uu wa faŋga nu wi.
8 Ti mbe ni mu koroo nya
bnimi nyu na,
ŋgi na hin? Ŋu na ni dankna.
Ni nyina kolo ŋga na mbe tro.
Ŋgi na hin?
Ŋu kɛɛ ni ni nyiɛ wru mu le.
9 O Tafun, ni shɔ ni loŋgoolo kɛɛ.
Ŋgi na hin?
Ŋu jaara ni fɛ mu sɛ ndra.
10 Ni nyina mbe ni mu chaara pe.
Ŋgi na hin? Ŋu wi ni Nyiɛkpɔɔ.
Kena ti mbe mu ŋumu wre tro
na ni ni kolo mbrɛrɛ na.
11 Mu mɛɛ kre saara na,
ni ŋga ŋmaa, mu ti mu frakaa
ni wɔ kanyana nu.
12 A mu koroo kpɔɔ kre na,
ni loŋgoolo gbo mu laa ni na,
mu mblɛ pe ni tɔɔra pre kro kla.
Ŋgi na hin? Mu sumifun wi mi.