Yilakɔŋgɔ Talaa
141
Nyiɛkpɔɔ, ni nyɛni na mu yeeri,kena loo ni pan nyaanyaa,
jande na ni nyɛni na mu yeeri,
loo ni pan.
2 Ti mbe ni nyiɛtalaa da mu na,
mbe pe na tuwe ndiom tɛɛn
ni sroi.
Mbe ni kɛnyi nyjɛ ni yire nyjeeri
na nyiɛtali yire, tna mu pan
na yilakɔŋgɔ sra ni wɔ.
3 O Tafun Nyiɛkpɔɔ,
ti mbe ni jaa frɔ ni nyu na.
Ta ni nyu le
mbe kee sisaa wa yili ki nu.
4 Maashia ti mbe ni sisam kee
jawa mbe pe,
ndee mbe mi na sisampefɛɛnlɛ
chaa mbe yaka pe.
Maa shia ti mbe mi na pre chaa,
mbe pe yirɛ tɛɛn nyjɛ pe lii yire li.
5 Ti mbe lewo ŋmba u fraka
ni gbun pimi ni, ndee mbe
ni yiɛ kee yo ni pan.
We ki pe fooro chiɛn ni,
a mba ki je,
la, na sisampefɛɛnlɛ ni kaan buuro,
kia tna ni pan. Ŋgi na hin?
Nyjila kro nu, ni nyiɛtali,
na mba nyjɛ pe piin yire ka pe.
6 Na pe yɛkulo pre kee nyjɛ
pe jawa, waa fin pe na kre,
kre pie chin na kee nyjɛ
ni yuu yire pe kpra.
7 Imi na falifun tra fali
mbe tra kre juari kre,
pan pe kajle nyina mu wo
fanyi nyu na.
8 La, ŋu Nyiɛkpɔɔ
Jaŋgafun wre na ni yiɛ nyi,
ŋu jaara mbe fɛɛ sɛ ndra,
maa shia ti pe ni taa gbo.
9 Ni wɔ mu yili pɛɛlɛɛ nyininyini
nyjɛ sisampefɛɛnlɛ pre
ni pɛɛri nu.
10 Ti mbe sisampefɛɛnlɛ pre to
pre titi pɛɛlɛɛ nu,
mbe ni pe waa tro
mbe yaka wa ni ta.