Kanyana Nyiɛtalaa
140
O Tafun Nyiɛkpɔɔ jande,ni shɔ mu yili leesaala
na pɔɔrɔfɛɛnlɛ kɛɛ.
2 Keesɛɛ na kakrɔ kee
pe jawa nyjila kro nu.
3 Pan pe nyu kee nyi to
na lewo dɛnkɛ susrom ka.
4 Kena o Tafun Nyiɛkpɔɔ ni shɔ,
mu yili leesaala
na pɔɔrɔfɛɛnlɛ pre kɛɛ.
Ŋgi na hin?
Pe jina to mbe ni jeelee klɔ.
5 Leele mblɛ pe peyɛ kpɔɔri pre,
pe ni pɛɛri pɛɛlɛɛ nyininyini,
ni trohɛɛ nu mbe ni yii.
6 O Tafun, ni yo mu pan na,
ŋu wi ni Nyiɛkpɔɔ,
kena ni fooro le
mu ni nyɛnɛɛ loo.
7 O Tafun Jaŋgafun,
ŋu wi ni shɔfun,
ŋu mna kɛ tɔ ni na ŋunɔ wi ble.
8 O Tafun, maa shia
sisampefɛɛnlɛ kee, nyjɛ pe jawa
yire pe mbe pe ŋga,
a maa shia pe jina nyjɛ pe tuuri
yire ŋga kolo mbe yi pe,
na kre ma pie na peyɛ kpɔɔri.
9 Jande, maa shia ti
ni loŋgoolo pre ni ta.
Ti mbe pe jiɛnlɛ kee nyjɛ pe yuu,
yire kna mbe tuu pe na.
10 Ti mbe kanhun naŋgua kna
mbe wo pe na,
mbe pe to weele sisɛɛ nyjɛ
pre titi tuulo yire nu,
mbe pia jaa yili na fio.
11 Maa ti mbe kabaarafɛɛnlɛ
tnihaa ta tra kre nu.
Ti mbe kala sisaa pɔɔrɔfɛɛnlɛ
pre da, mbe pe li.
12 Ni Tafun, ni chin na mu
shianfɛɛnlɛ kala lii na pe kaan
kpra ni,
na pɔlɛfɛɛnlɛ shio na waa.
13 Kpra na, mblɛ pe fraka
pre we mu ŋga mɛɛ,
mbe tni mu jaara.