Nyiɛkpɔɔ Jawala
a na mu haale kuraa kre
mu ni lɛɛ kee kro chin.
3 Na mbe nyaari, ndee na mbe sni,
mu ni dɔɔtaa, ki tia
mu ni kepele kro chin kama.
4 Na ni paan mbe paara kuraa kre,
mu chin kee ŋga ni paan mbe yo.
5 Mu ni fɛ mu kun,
mu mu jaŋga tɛɛ mu ni tɔ.
6 Kre jawala ŋga kpɔɔ,
mu pe kawako ni ni pan,
a mba jaa ki nɔɔloo fio.
7 Na ni yo mbe fɛ mu yiɛ,
ndee mbe fɛ mbe shɔ mu kɛɛ,
sena mbe tro hin?
8 Na ni nduu mu sɛ nyjeeri o,
muu wa wa,
na ni sɛ kuulo ndoo o,
muu wa wa.
9 Na ni fɛ mu sɛ yilafinhaa,
ndee na ni fɛ mu sɛ yilatohaa o,
10 mbe mu nya wa
mbe mu ya ni na mbe ni le.
11 Na ni yo na wɔmu ki paan ni tɔ,
mbe nyisee ŋga ki fɛ
mu ni kun kre
kaari wɔmu kuraa kre,
12 na wɔmu kre n pe
yaka yira mu pan,
a blee pe na nyisee yi mu pan,
mu n wɔmu chin,
a mu n nyisee chin,
yi kro nunu mu pan.
13 Nyiɛkpɔɔ, ŋu mu ni kokoe
wɔ nununu, mu yi gbeele,
mu yi yii
mu mbra yi yɛ na ni lo lɛɛ.
14 Ni mu kaan mboo,
ŋgi na hin? Mu ni gbeele
a ni pe fiɛrɛ na kawako ni.
Ni chin na mu kɛ nyu tnumu
kawako ni kain.
15 Ŋu mna Adam faanri fafa,
a ŋu mna ni faanri
mu wa ni lo lɛɛ,
a ndaa ndra wa na lee,
ni yaka nsra wa mu ndra mu na.
16 Nyjila ŋga ni pra ni siire ta kre,
mna ni nya ni lo lɛɛ,
a ble nyjɛ mu ni ŋga mbe ni li kro,
mu yi nyu chin,
mu yi nyunɔ mu hlɛ nu,
a ni chin na paan.
17 Nyiɛkpɔɔ mu jawala kpɔɔ
ni pan mu tro,
mba jaa mu kee nyjɛ
mu jawa na ni ni nyu chin.
18 Na ni yo mbe yi tɔɔnri kre,
yi nɛɛ mu wɛ epo nyu tanyiɛ na,
na ni ŋunu mu nyi kuraa kre,
ni nya na nii wa mu jaara tɛ.
19 Nyiɛkpɔɔ, na mna linkufɛɛnlɛ
sisampefɛɛnlɛ mblɛ gbo
mu laa ni na, kie na tna ni pan.
20 Pe jiɛnlɛ kee yuu na taari mu na,
na mu mɛɛ sisaa yeeri.
21 Nyiɛkpɔɔ mblɛ pe mu pra,
mu yiri mu mu taan pre,
ni pe pra titi.
22 Ni pe pra imi na ki fna,
na pe jawa ni loŋgoolo kama.
23 Ao, Nyiɛkpɔɔ, ni lam le,
mu ŋga kii wa ni loloŋgo nu nya,
ni pe mu le mu ni jawala nya,
24 na ni punu mu kolo ka na kre,
mbe mu ni yii mbe tro na ni ni
blenyini ŋmaa kolo kre na.