Mboo Ŋgaa
138
O Tafun Nyiɛkpɔɔ,mbe ni loloŋgo kro tɛɛ
mbe mu ŋga mboo,
sɛɛnlɛ yiɛ na mbe yire
mbe mu ŋga mɛɛ.
2 Mbe kosie kan, mbe yiɛ tɛɛ
mu Suminyuŋgo cheche
kre lawee mbe mu mɛɛ kpɔɔ,
mu koroo na mu kpra ndra na,
ŋgi na hin? Mu tia mu kee
na mu mɛɛ wɛ yira kro na,
3 ŋga ble ndaa nyɛni
mu mu yeeri kre,
mna loo ni pan, mna ni gbeŋmba,
a ndaa faŋga ta.
4 O Tafun, na waŋgra
ŋga ŋulo kro mu nyu kee loo,
pe kro we mu ŋga mɛɛ.
5 Pie kee nyjɛ mu pe mɛɛ kɔ
mbe mu ŋga. Ŋgi na hin?
Ŋu o Tafun mu yɛnyiŋge kpɔɔ.
6 O Tafun Nyiɛkpɔɔ wa nyjeeri,
nde u mblɛ pe peyɛ nyjii kre le,
la, mblɛ pe peyɛ kpɔɔri kre,
mna pe nyi kpan, u pe nyaa.
7 Ni kanyana nɛɛ, a mu ya ni na,
ni loŋgoolo krɔkun,
a mu kɛ nyini pe na,
mu mu jaŋga kre tɛɛ mu ni shɔ.
8 O Tafun Nyiɛkpɔɔ we ŋga u yo
we pe mbe o ŋga kre pe.
Nyiɛkpɔɔ mu koroo wa nyjila kro nu,
a mu kɛ nyu yira ŋga mu pe
kre maa shia ki wa.