Nyiɛkpɔɔ Mbra Yɛshɔɔrɔ
119
Mblɛ pe nyaari Nyiɛkpɔɔmbra yire na,
a pe kooloe kro pe chasi kre,
pe wo yi dwamu.
2 A mblɛ pe taari u kee na,
mu pe lolonyi kro tɛɛ na lii yi na,
kre wo yi dwamu.
3 Pre leele pre wa sisam pe,
Nyiɛkpɔɔ kolo chiin
na pe nyaari.
4 Nyiɛkpɔɔ, ŋu mu o ŋga mu mbra,
mu yo o pan na, o li yi na.
5 Ni chaa mbe jaa li
mu mbra yire na kama.
6 Ni chin na na mbe li
mu mbra yire na kro kre,
nyifɛɛrɛ wa ni gbo fio.
7 Ŋga ni mu frakaa
mbra yire tuan ŋga,
mbe loloŋgo ŋga ki fraka tɛɛ
mbe mu ŋga mɛɛ.
8 Mbe li mu mbra yire na,
kena jande maa shia ni wa.
9 Mni yirifuŋu we pe
mbe u kolo pe chasi hin?
Fɔna we taa mu nyu kee na.
10 Mbe ni lɛɛ wɔ mbe mu haa cha,
kena maa shia ti mbe ni laa
mu mbra yire kro.
11 Ni mu kee yire le lɛɛ,
mbe mba sisaa ka pe
mbe punu mu na.
12 Nyiɛkpɔɔ, mu wo yi mɛɛ,
jande ni nyina mu mbra.
13 Mbra nyjɛ yi yili
mu nyuu yire kro,
mbe yi kee kpali.
14 Ni yiɛshɔ mu mbra yire na
mu wɛ wejiyirɛ na.
15 Nyiɛkpɔɔ, ni mu kee nyjɛ
mu nyina yire kro jawa,
na yi lam chaa mbe nya.
16 Mu mbra yire nu ni yɛshɔɔrɔ taa,
a mba mu nyu kee fɛɛ fio.
17 Nyu mu sumifun na,
mbe ni ŋmaa ta
mbe li mu kee na.
18 Ni nyiɛlɛ nyaa,
mbe ni kawako kee nyjɛ yii wa
mu mbra yire nu nya.
19 Fuŋu wi mi tra ŋga na,
kena maa mu mbra
yire ndra ni na.
20 Ni nyiɛ kila na mu mbra
yire haa chaa, nyjila kro nu.
21 Mu mblɛ pe peyɛ kpɔɔri
pre yiɛ kee yuu pe pan,
pre pe ndikana pini
mu mbra yire na,
a ki tia mu suŋgɔ pe yii.
22 Ŋga ni taa mu mbra yire na ŋga,
maa shia ti mbe pe ni le fiɛn.
23 Hali na waŋgra ŋulo we fni,
mbe tni mbe ni kefɔɔn yo kuraa
kre, mbe tni mbe mu kee jawa.
24 Mu mbra yire ni kaan yɛshɔɔrɔ,
mu ndru na ni kaan jawala.
25 Ni nyiɛ kro bloŋgo nu,
kena yire mu nyu kee kre na
mu ni ŋga ŋmaa.
26 Ni ni kee nyjɛ ni pe
kro yo mu pan,
a mu loo ni pan,
mu ni nyina mu kolo.
27 Ti mbe ni mu mbra yire nɔɔloo,
kre mbe jaa tni,
mbe mu kawako kee
nyjɛ mu pe yire kee jawa.
28 Nyiɛkpɔɔ, fooro ni yii,
mu nyu ŋga mu yo
kre ndra na, ni ŋga faŋga.
29 Ni wɔ mu yili kooloe fuɛn nu,
mu ni dumi mu ni nyina
mu mbra yire.
30 Kpra kolo kre ni wru,
mu taa mu mbra yire na.
31 Nyiɛkpɔɔ, mu kee nyjɛ mu nyina
yire na ni tro,
kena maa shia ti
mbe nyifɛɛrɛ ni gbo.
32 Mbe yiɛ nyina mbe tro
mu mbra yire kolo na,
mbe mu ni jawala nyaa kpɔɔ.
33 Nyiɛkpɔɔ ni nyina mu mbra yire,
mbe ni li yi na nyjila kro nu.
34 Ti mbe ni yi nɔɔloo,
mbe ni lɛɛ wɔ mbe taa yi na.
35 Ti mbe ni tro mu mbra
yire kolo na. Ŋgi na hin?
Yire nu ni yɛshɔɔrɔ taa.
36 Ti mbe ni jawala mu kolo wru,
mbe kia swa taara kolo wru.
37 Ni nyiɛlɛ laa yirɛ wɛɛ yire na,
mu nyu ni na imi na
mu ki yo mu tɛɛ kre.
38 Li mu nyu ŋga mu yo
mu sumifun pan kre na,
mbe ki ti u mu fiɛ.
39 Nyifɛɛrɛ ŋga ni fiɛ na
kie ni gbo kre laa ni na,
ŋgi na hin? Mu mbra yire nyu ni pan.
40 Nyiɛkpɔɔ mu mbra yire la ni ta,
kena ni ŋga faŋga. Ŋgi na hin?
Mu fraka.
41 Nyiɛkpɔɔ, ti mbe mu koroo
kpɔɔ mbe ni ŋga,
mbe ni mu ŋmaashɔmu kre ta,
imi na mu ki yo mu tɛɛ kre.
42 Mbe ni jaa mblɛ pe ni le fiɛn
kre nyu wɔ. Ŋgi na hin?
Mu nyu kee na ni dankna.
43 Maa shia mu kpra kee
kre wɔ ni nyuu.
Ŋgi na hin? Mu mbra yire na
ni yiɛ nyi.
44 Mu mbra yire,
mbe li yi na nyjila kro nu.
45 Mbe nyaari mbe sɛ mna ni chaa.
Ŋgi na hin? Ni li mu kee na.
46 Mbe mu mbra yire kpali ŋulo pan,
nyifɛɛrɛ wa ni gbo yi kee yoo na.
47 Ni yɛshɔɔrɔ ta mu mbra yire nu.
Ŋgi na hin? Ni yi kori.
48 Mu mbra nyjɛ ni kori kre,
ni yi ŋga buuro,
a mbe tni mbe yi kee jawa.
49 Nyiɛkpɔɔ, kee ŋga mu yo
mu sumifun pan kre sɔɔnri.
Ŋgi na hin? Mu tia
ndaa dankna kee kre na.
50 Kee ŋga ki ni gbun nyiŋgei
ni kanyana nyjila nu yi na,
mu nyu ŋga mu yo ni pan
kre ni kaan ŋmaa.
51 Mblɛ pe peyɛ kpɔɔri,
pre ni le fiɛn, nde ni n laa
mu mbra yire kro.
52 Nyiɛkpɔɔ, ni mu mbra
nyjɛ mna le fafa yire sɔɔnri,
a yi ni kaan gbunyiŋge.
53 Na ni sisampefɛɛnlɛ pre nya,
a praa mu mbra yire taanla kre,
mbe krɔ kɔɔn pan mbe ni nyi.
54 Mu mbra yire kaari mɛɛ ni nyuu,
nyjila chiɛri ŋga mbe li tra
mna ŋga nu.
55 Nyiɛkpɔɔ, na ni sni blee kuraa
ni mu mɛɛ sɔɔnri,
na lii mu mbra yire na.
56 Kee ŋga ni pini nyjila kro nu
yi na, mbe li mu mbra yire na.
57 Nyiɛkpɔɔ, ŋu wi ni krɔyira
ŋga ni ta, ki tia ni nyu yo,
na mbe li mu kee kre na.
58 Ni ni loloŋgo kro tɛɛ
mu mu haa cha, kena jande,
yire mu nyu ŋga
mna yo mu tɛɛ kre na,
mu ni dumi.
59 Ni tni mu ni kooloe
nyjɛ na ni tro kro jawa,
mu kna mu sɛ taa mu kolo na.
60 Ni kna nyaanyaa mu pan
mu taa mu kro,
imi kie pe mbe ni jaa li
mu mbra yire na.
61 Hali na sisampefɛɛnlɛ ni pɔ
na mɛnyi ni kuraa kre,
mba mu mbra yire fɛɛ fio.
62 Mu mbra nyjɛ yi fraka
kre ndra na,
ni yirii ni dɛŋglɛ na ndroo
mbe mu ŋga mboo.
63 Mblɛ pe mu fiɛ, na mblɛ pe lii
mu mbra yire na, ni nɔɔlɔ lɛ.
64 Nyiɛkpɔɔ, mu koroo kpɔɔ
tra ŋga na poŋgo,
kena ni nyina mu mbra yire.
65 Nyiɛkpɔɔ, nyu mu sumifun na,
imi na mu ki yo mu tɛɛ kre.
66 Ni nyina jawala chichie
na kachindɛ. Ŋgi na hin?
Ni dankna mu mbra yire na.
67 Ndaa mu kolo wa,
a mna ni ndie tini,
la, fuŋga rɛ,
ni li mu mbra yire na.
68 Mu nyu o na,
a kee nyjɛ mu pini kro nyu,
kena ni nyina mu mbra yire.
69 Sisampefɛɛnlɛ pre kala fnɛ
na taari ni na,
la, ni loloŋgo kro ni ni tɛɛ
mu taa mu mbra yire na.
70 Pe ndie kan, la, mi rɛ,
mu mbra yire nu ni yɛshɔɔrɔ taa.
71 Kra nyu mu ni ŋga na
mna ni ndie tini chiɛri,
mbe ki ti
ni jaa mu mbra yire tuan.
72 Mbra nyjɛ yi yili
mu nyuu yire tna ni pan,
mu wɛ waŋgra ŋga swa kro na.
73 Nyiɛkpɔɔ, mu kɛ ki ni faanri,
mu ni gbeele kama, kena ti
mbe ni mu mbra yire nɔɔloo.
74 Ti mbe mblɛ pe mu fiɛ pre
ni nya, mbe pe yiɛshɔ.
Ŋgi na hin?
Ni dankna mu mbra yire na.
75 Nyiɛkpɔɔ ni chin na
mu mbra yire fraka,
a mu kpra lie na mu yire
mu ni ndie tini.
76 Ti mbe mu koroo
ŋga ki n nyukɔɔrɔ ni kre,
ni ŋga gbunyiŋge, imi na
mu ki yo mu sumifun pan kre.
77 Ni fooro le mbe ni ŋmaa ta.
Ŋgi na hin? Mu mbra yire nu
ni yɛshɔɔrɔ taa.
78 Ti mbe nyifɛɛrɛ mblɛ
pe peyɛ kpɔɔri pre gbo,
na pe ni pra waara,
la, mi rɛ, ni mu mbra yire jawa.
79 Ti mbe mblɛ pe mu
mbra yire fiɛ, na yi nɔɔ ndru
pre kna mbe pan ni pan.
80 Ti mbe ni jaa taa
mu mbra yire na kama,
mbe nyifɛɛrɛ wa ni gbo.
81 O Tafun Nyiɛkpɔɔ,
ni faŋga kɔ ni nu,
ŋu na ni kaan
mbe mu paan ni shɔ.
82 Ni mu nyu ŋga mu yo
mu tɛɛ kre le kolo chiin,
mu sɛ pra, mu kna na wie na,
“Ŋgi ble mu ni gbunyiŋge wo?”
83 Pan ni sɛ pe na
pe yira le kagbala nyaara,
mu ki fɛɛ wa, a wree na le ki nu,
la, ni n mu mbra yire fɛɛ.
84 Mu sumifun, ni mu shie
mbe sɛ su nyjila ŋgi nu hin?
Nyjila ŋgi nu mu ni loŋgoolo
pre ndie tini hin?
85 Leele mblɛ pe peyɛ kpɔɔri,
a praa li mu mbra na kre,
pe sɛ weele tuulo ni yiɛ
mbe ni sɛ to yi nu.
86 Nyiɛkpɔɔ, mu mbra yire
kro pe kpra.
Jande ya ni na. Ŋgi na hin?
leele ni pra waara titi.
87 Ki kro fiɛn mbe pra ni gbo
mbe yili tra ŋga nu,
a nde ni n laa mu mbra yire kro.
88 Mu koroo kre saara na,
ni ŋga faŋga, mbe ni jaa li
mu nyu kee na.
89 Nyiɛkpɔɔ, mu nyu kee wa
nyjila kro nu,
a kii wa nyjeeri wa.
90 A mu kpra lie wa nyjila kro nu,
ŋu mu tra wa a kii wa mu yire
ki yirehaa nyjila kro nu.
91 Mu nyu kee saara na,
yira ŋga mu gbeele kroo wa
mu pan mu su aŋga na,
a yi kro na mu sumi.
92 Na mu mbra yire
ma yi ni kaan yɛshɔɔrɔ,
kaa ni ku ni kanyana nu.
93 Mba mu mbra yire fɛɛ fio.
Ŋgi na hin? Yire na mu yire
mu ni ŋga ŋmaa.
94 Mu wo wi mi, kena ni ŋmaa shɔ.
Ŋgi na hin? Ni gbeŋmba
na mbe li mu mbra yire na.
95 Sisampefɛɛnlɛ ni pɛɛri pɛlɛ
mbe ni kla.
La, mu mbra yire ni jawa.
96 Ni nya na kee kroo wa
na ki da haa ni,
la, mu mbra yire n wa
na nyukɔɔrɔ ni.
97 Nyiɛkpɔɔ, ni mu mbra yire kori,
na yi jawa lafo na blee.
98 Mu mbra kee yire ni pe kachiŋu
mu wɛ ni loŋgoolo na,
a yii wa ni jawala nu
nyjila kro nu.
99 Ni chin mu wɛ
ni nyinafɛɛnlɛ kro na,
Ŋgi na hin? ni mu kee jawa
nyjila kro nu.
100 Ni kee nɔɔ ndru mu wɛ
loplombo na. Ŋgi na hin?
Ni lii mu mbra yire na.
101 Ni niyɛ wɔ sisam kolo kro nu,
mbe ki ti ni jaa taa
mu mbra yire na.
102 Ni n laa mu mbra yire kro tun.
Ŋgi na hin? Ŋu titi
mu ni nyina yi yi.
103 Mu kee tna ni pan
mu wɛ srɛ na.
104 Mu mbra yire na
ni kee kro nɔɔ ndru,
ki tia ni kepele fɔɔn kro fun.
105 Na ni nyaari na tro kre,
mu kee kre pe nyisee mu ni ŋga,
mu tia ndaa ni kolo nyaa chasi.
106 Ni da, a mba kɔ ni danyi yire na,
na mbe taa mu kefrakaa na.
107 Nyiɛkpɔɔ, ni kala nya mu mu titi,
jande ni ŋga faŋga fɔŋgɔ
imi na mu ki yo mu tɛɛ kre.
108 Nyiɛkpɔɔ, ni mboo ŋgaa shɔ,
mu ni nyina mu mbra yire.
109 Nii wa kumu nyu na
nyjila kro nu,
nde ni n mu mbra yire fɛɛ.
110 Sisampefɛɛnlɛ ni pɛɛri pɛɛlɛɛ,
nde ni n mu mbra yire kolo wa.
111 Mu mbra yire ni wru
mu pe ni krɔyira, nyjila kro nu.
Yire yi tia ni yiɛ
na shio ni jawala nu.
112 Ni ni lɛɛ wɔ mbe taa
mu mbra yire na,
mbe sɛ su ni kumu ble.
113 Ni mblɛ pe pe jawala pini
shiin shiin pre fun,
la, ni mu mbra yire kori.
114 Ŋu wi ni lefun, na ni shɔfun,
ni danknaa wa mu nyu kee na.
115 Sisampefɛɛnlɛ, e laa ni na,
mbe ni li ni Nyiɛkpɔɔ
mbra yire na.
116 Ni ŋga faŋga mbe ni ŋmaa ta,
imi na mu ki yo mu tɛɛ kre,
ŋu ni le kolo, kena maa ti
mbe nyifɛɛrɛ ni gbo.
117 Ni yii mbe ni ŋmaa ta,
mbe jaa ndie tɛɛ mu kee kre na.
118 Mblɛ pe ndikana pini
mu mbra yire na kre,
mu yiɛ woni pe na nyjila kro nu.
Pe leele fana,
a pia tnu ka ta ki nu.
119 Sisampefɛɛnlɛ mblɛ pee wa
tra mna kro,
mu pe woni na waa,
imi na pe nɛɛrɛ woni yira nu kre,
ki tia ni mu mbra yire kori.
120 Mu fiɛrɛ tia ndaa seeri.
Ŋgi na hin?
Ni mu kprakuɔn kre fiɛ.
121 Ni ŋga ki fraka pini,
mu na chichie pini.
Kena jande, maa ni ti
ni fiŋgefɛɛnlɛ pre kɛɛ.
122 Jande, nyu mu sumifun na,
maa ti mbe sisampefɛɛnlɛ
ni fiŋge ma.
123 Ni mu shie mu fna,
a nii wa na mu siri
mbe mu paan ni shɔ
mbe yili sisampefɛɛnlɛ pre kɛɛ,
imi na mu ki yo mu tɛɛ kre.
124 Mu sumifun le
imi na mu koroo kre nyi kre,
mu ti mbe ni mu mbra tuan.
125 Mu sumifun wi mi,
ni ŋga nɔɔloo,
mbe ni jaa mu kee yire nɔɔloo.
126 Nyiɛkpɔɔ, nyjila da
mbe mu kala pe pe na.
Ŋgi na hin? Pe ndikana pe
mu mbra yire na.
127 Ni mu mbra yire kori
mu wɛ swanyiɛ titi na.
128 A ni mu mbra kro le na yi fraka,
a ki tia ni kolo fɔɔn wruu je.
129 Nyiɛkpɔɔ, mu mbra kee
yiree kawako ni mu tro,
kre ki tia ni taa yi na kre.
130 Na pe mu mbra yire nɔɔ nyina,
ki tii mbe lewo jawala ta,
mbe ti mbe mblɛ pe
mu haa chaa pre kala chin.
131 Ni nyu nyaa mu wa
na ŋuni fɛɛn fɛɛn. Ŋgi na hin?
Mu mbra yire la ni ta.
132 Yiɛ kna mu ni le, mu ni dumi,
imi na mu mblɛ pe
mu mɛɛ kori pre pini kre.
133 Ti mbe ni yire gbiŋmbi
mu kee kre nu,
maa ti mbe sisam ka
jaŋga ta ni na.
134 Maa ti mbe ndro ni fiŋge,
mbe ki ti ni jaa li mu mbra na.
135 Yiɛ nyaa mu ni le,
mu ni nyina mu mbra yire.
136 Yotunyi yilii ni nyiɛlɛ
na lɔɔ ki fuu.
Ŋgi na hin? Pe n na lii
mu mbra yire na.
137 Nyiɛkpɔɔ, ŋu mu fraka,
a pan mu mbra yire fraka.
138 Mu mbra nyjɛ mu le
mu tɛɛ yire kro fraka,
mu pe dankna kee.
139 Krɔ tia ni n chin
imi mbe niyɛ pe. Ŋgi na hin?
Ni loŋgoolo mu mbra yire je.
140 Mu mbra yire pe chasi,
ki tia mu sumifun, a ni yi kori.
141 Ni n yaka, a ni n fna,
nde ni n mu mbra yire fɛɛ.
142 Mu frakaa wa nyjila kro nu,
a mu mbra yire pe kpra.
143 Kanyana na fooro ni yii, la,
mu mbra yire ni kaan yɛshɔɔrɔ.
144 Mu mbra yire fraka
nyjila kro nu,
kena ni ŋga nɔɔloo
mbe ni ŋmaa ta.
145 Ni ni loloŋgo kro tɛɛ
na nyɛni na mu yeeri,
kena Nyiɛkpɔɔ, shɔ ni pan,
mbe ni li mu mbra na.
146 Ni nyɛni na mu yeeri,
jande ni shɔ, mbe ni jaa taa
mu nyu kee kre na.
147 Ni gbolo mu yiri mu nyɛni
mu mu yeeri. Ŋgi na hin?
Mu kee kre na ni yiɛ nyi.
148 Ni mu kee kre jawa,
ki tia na ni sni blee
ni nyiɛlɛ wa jaa tɔ.
149 Nyiɛkpɔɔ, jande,
mu koroo kre le
mu loo ni pan, mbe ni ŋmaa ta
imi na mu ki yo mu tɛɛ kre.
150 Sisampefɛɛnlɛ mblɛ pe ni chaa
pre floi na dani ni na,
la, pre na mu mbra yire haale.
151 Nyiɛkpɔɔ, ni chin na
mu mbra ni na,
a mu mbra yire kro pe kpra.
152 Ŋga ni mu mbra yire chin
ki mu,
a ni chin na mu tia yi yire
mbe tni nyjila kro nu.
153 Ni kanyana le mu ni shɔ.
Ŋgi na hin?
Ni n mu mbra yire fɛɛ.
154 Ni kee yo mu ni ŋga,
mu ni shɔ mbe ni ŋmaa ta
imi na mu ki yo mu tɛɛ kre.
155 Sisampefɛɛnlɛ na ŋmaa taara
haale. Ŋgi na hin?
Pe mu mbra yire je.
156 Nyiɛkpɔɔ, mu foorochiɛn kpɔɔ,
kena ti mbe ni ŋmaa ta
imi na mu ki yo mu tɛɛ kre.
157 Ni loŋgoolo mblɛ pe ni chaa
mbe kla pre nɛɛ,
nde ki n tia ni laa
mu mbra yire kro.
158 Na ni mblɛ pe n mu shɔnli
pre nya kre,
fɔŋga mbe yiɛ san. Ŋgi na hin?
Pe n na lii mu nyu kee kre na.
159 Nyiɛkpɔɔ, le imi na
ni mu mbra yire kori mu da,
mu koroo kre saara na,
ti ni ŋmaa ta.
160 Mu nyu kee kro pe kpra,
a mu kprakuɔn fraka,
a kii wa nyjila kro nu.
161 Loplombo ni pra waara,
la, mu nyu kee kre chiin ni fiɛ.
162 Ni yiɛ shɔ mu nyu kee kre na,
na ndro ŋmba u wejiyirɛ ta
tataara wi.
163 Ni kafinɛ fun ni tnimu nu kuraa,
la, ni mu mbra yire kori.
164 Nyiŋge ŋga kie se kpan,
mbe mu ŋga mɛɛ
gbee nununu kɔɔnashin,
ŋga mu mbra yire
fraka kre ndra na.
165 Mblɛ pe mu mbra yire kori kre,
pe wo yi wejinyiŋge kpɔɔ,
a yaka n wa mbe ti pe to.
166 Nyiɛkpɔɔ, mu ŋmaashɔmu
kre ni le kolo,
a mu mbra yire kro ni taa.
167 Mbe li mu kee yire na,
a mbe yi kori ni loloŋgo nu.
168 Mu mbra yire kolo na ni taa,
a ŋga ni pini kro mu ki nyaa.
169 Nyiɛkpɔɔ, ti mbe ni nyɛnɛɛ
le mu ndie,
mu ni ŋga nɔɔloo
imi na mu ki yo mu tɛɛ kre.
170 Ni talaa loo, mu ni shɔ
imi na mu ki yo mu tɛɛ kre.
171 Mbe mu ŋga mɛɛ tataara,
ŋgi na hin? Mu ni nyina
mu mbra yire.
172 Mbe mu mbra yire tɛɛ
mbe mɛɛ kɔ. Ŋgi na hin?
Mu mbra yire kro fraka.
173 Jande, pan mu ya ni na,
ŋgi na hin? Mu kolo ni wru.
174 Nyiɛkpɔɔ, mu ŋmaashɔmu
la ni ta. Ŋgi na hin?
Mu mbra yire na ni yiɛshɔ.
175 Ti ni ŋmaa ta mbe mu ŋga mɛɛ,
mbe mu nyu kee ya ni na.
176 Ni fun mu kolo na,
na mbɔɔ fun kolo na.
Jande, mu sumifun haa cha,
ŋgi na hin?
Ni n mu mbra yire fɛɛ.