Mboo Ŋgaa Mɛɛ
118
E o Tafun Nyiɛkpɔɔwre ŋga mboo,
ŋgi na hin? U nyu o na,
a u koroo kree wa nyjila kro nu.
2 E ti mbe Israel leele yo na,
“U koroo wa nyjila kro nu.”
3 E ti mbe Aaron katoo leele
kro yo na, “U koroo wa
nyjila kro nu.”
4 Ti mbe mblɛ pe o Tafun Nyiɛkpɔɔ
wre fiɛ kre yo na,
“U koroo wa nyjila kro nu.”
5 Ni kanyana nu ndaa nyɛni,
mu o Tafun Nyiɛkpɔɔ wre yeeri,
a wra loo ni pan,
mna ni shɔ mu wa.
6 O Tafun Nyiɛkpɔɔ wree wa ni kro,
ki tia ni n na fiɛ.
Yira ŋgi lewo na nyjuro
we jaa ni pe hin?
7 O Tafun Nyiɛkpɔɔ wree wa
ni kro, na yaa ni na,
ki tia we ni loŋgoolo ja ni pan.
8 Ki nyu na mu fɛ
mbe sɛ ndra Nyiɛkpɔɔ jaara,
mu wɛ ŋga mu sɛ mu yɛ wru
mbe taa lewo na na.
9 Ki nyu na mu fɛ mbe sɛ ndra
Nyiɛkpɔɔ jaara,
mu wɛ ŋga mu muyɛ wru
mbe taa ŋunu na na.
10 Leele mblɛ pe n Nyiɛkpɔɔ chin
kre kun mu ni fni la,
Nyiɛkpɔɔ mɛɛ ni ndaa pe kla.
11 Pra ni fɛ mu kun,
a lawee nsraa wa mbe ni tro,
la, Nyiɛkpɔɔ mɛɛ ni ndaa pe kla.
12 Pra wo ni na na srɛ wi,
la, pra ku mu fun
na wuuro pe le kanhun,
o Tafun Nyiɛkpɔɔ wre mɛɛ ni
ndaa pe kla.
13 Pra ni ŋunɔ
mbe ndaa sɛ to kro ni,
la, Nyiɛkpɔɔ na ya ni na.
14 O Tafun Nyiɛkpɔɔ
wre wi ni faŋga,
wre u ni ŋga ŋmaashɔmu,
a mbe mɛɛ kɔ mbe u ŋga.
15 Nyiɛkpɔɔ leele mblɛ pe fraka
pre wi mu yili,
mu na yɛshɔɔrɔ lii pe kalonyi nu,
Nyiɛkpɔɔ jaŋga ki kawako kee pe.
16 O Tafun Nyiɛkpɔɔ jaŋga kpɔɔ
kre tia o wi mu yili.
17 Mba ku, la, mbe ŋmaa ta,
mbe kee nyjɛ Nyiɛkpɔɔ pe
yire kpali.
18 Nyiɛkpɔɔ na ni ndie tini
badaaŋga, la, u nsra tia ndaa ku.
19 E jlonwee ŋga nu
frakafɛɛnlɛ tro kre nyaa ni pan,
mbe ni le mbe sɛ o Tafun
Nyiɛkpɔɔ wre ŋga mboo.
20 O Tafun Nyiɛkpɔɔ wre
jlonwee nyu krɔ yi kre,
bawa mblɛ pe fraka pre we tro.
21 Mbe mu ŋga mboo,
ŋgi na hin? Mu loo ni pan,
mu ni ŋga ŋmaashɔmu.
22 Dnɛ ŋga nyuŋgo sinfɛɛnlɛ
pre na je, na ki n nyu kre,
ki kɔ mu pe nyuŋgo kre ndra.
23 O Tafun Nyiɛkpɔɔ wre kepele
yi nyjɛ kro,
a yi pe kawako ni o pan.
24 Ble ŋga o Tafun Nyiɛkpɔɔ
pe yi kre,
kena e ti mbe o yiɛshɔ kpɔɔ.
25 O Tafun, o shɔ mu ti
mbe kee kro nyu mbe o ŋga.
26 Ŋmba u paan
o Tafun Nyiɛkpɔɔ mɛɛ nu wre,
wo yi dwamu.
O Tafun wre katoo
o yire na mu dwan.
27 O Tafun wre, Nyiɛkpɔɔ wi,
a u nyu o na.
E tinyi klɛ wla e yii kɛɛ,
e ble kpɔɔ li, e na feni
e na sragbunu kre kuun.
28 Ŋu wi ni Nyiɛkpɔɔ,
ŋu mbe ŋga mboo,
ŋu wi ni Nyiɛkpɔɔ, ŋu mbe kpɔɔ.
29 E o Tafun Nyiɛkpɔɔ
wre ŋga mboo,
Ŋgi na hin? U nyu o na,
a u koroo wa nyjila kro nu.