Nyiɛkpɔɔ Chiin Wo Yi Yiɛnyiŋge
115
O Tafun Nyiɛkpɔɔ, ŋu ni mɛɛ fna,wre leweele wo ma mɛɛ kre,
mu koroo na mu kpra
kre saara na, ŋu ni mɛɛ fna.
2 Ŋgi ki tia a leele mblɛ
pe n mu chin na o wie na,
“Sena e Nyiɛkpɔɔ wre nyi hin?”
3 O Nyiɛkpɔɔ wree wa nyjeeri,
ŋga ki tna u pan u pini.
4 Pre rɛ, swafiŋge na swanyiɛ
pe tɛɛ mu sɛɛnlɛ pe.
Lewo u kɛ tɛɛ mu yi gbeele.
5 Nyuu wa yi pan, la, yia jaa paara,
yii nyiɛlɛ ni, la, yi n na nyaa.
6 Yii ndiile ni, la, yi n na ndru,
yii maalɛɛ ni, la,
yi n na ndiom ndru.
7 Yii wa na kɛnyi ni,
la, yia jaa yira yii,
a yii wa na jeelee ni, la,
yia jaa nyaari, ndee mbe gble.
8 Mblɛ pe yi pe mu na yi sumi kre,
pan pe nyi na yire yi.
9 Israel leele,
e na dankna Nyiɛkpɔɔ na,
wre u yaa e na, na kɛ toni e na.
10 Aaron katoo leele, e dankna
o Tafun Nyiɛkpɔɔ wre na,
wre u yaa e na, na kɛ toni e na.
11 Yire mblɛ e o Tafun Nyiɛkpɔɔ
wre fiɛ kre, e dankna u na,
wre u yaa e na, na kɛ toni e na.
12 Nyiɛkpɔɔ wre wa o fɛɛ,
we o dwan,
we Israel katoo dwan,
mbe Aaron katoo dwan.
13 A mblɛ pe u fiɛ kre, we pe dwan,
pe lekpɔɛ na pe bɛɛlɛ kro,
we pe dwan.
14 Nyiɛkpɔɔ we ti mbe
yire na e biile kro nɛɛ.
15 O Tafun Nyiɛkpɔɔ,
ŋmba u nyjeeri na tra wa wre
we e dwan.
16 Nyiɛkpɔɔ wo yi nyjeeri,
la, tra rɛ, u leweele ŋga kre.
17 Mblɛ pe ku, ndee mblɛ pee wa
kuulo-ndoo,
mna ndro wa jaa paara na kre,
bawa ma pie o Tafun Nyiɛkpɔɔ
wre ŋga mɛɛ.
18 Wre mblɛ o le ŋga,
wre ki fna o u ŋga mɛɛ,
mbe yire aŋga mbe sɛ su blenyini,
kena e o Tafun Nyiɛkpɔɔ
wre ŋga mɛɛ.