Shɔnlie Mboo Ŋgaa
116
Ni o Tafun Nyiɛkpɔɔ wre kori,ŋgi na hin? U ni talaa loo.
2 Ŋga u ndru ni pan,
a nii ŋmaa ni ŋga,
nyjila kro nu mbe nyɛni
mbe u yeeri.
3 Kumu maŋa na ni pɔ,
a ndaa kanyana ŋga kie sɛ
na ni ni kuulo ndoo nyaa.
Wejiwrɛ na fooro lie nsraa ni tii,
4 a ndaa nyɛni
mna o Tafun Nyiɛkpɔɔ yeeri na,
“O Tafun ni shɔ.”
5 O Tafun wre, latam pefun wi,
a u fraka. O Nyiɛkpɔɔ wre,
fooro chinfun wi.
6 Nyiɛkpɔɔ lewo ŋmba u nyjii le,
ŋgi na hin? Kanyana na ni da
a wra ni shɔ.
7 Ni nyiɛ, tni mu wuu. Ŋgi na hin?
O Tafun Nyiɛkpɔɔ
wre nyu mu na.
8 Ŋgi na hin? U ni shɔ
mu yili kumu nu,
mu ni shɔ nyɛnɛɛ kɛɛ,
mu ni shɔ gbro mu too kɛɛ,
9 mbe ki ti ni nyaari
o Tafun Nyiɛkpɔɔ wre yiɛ na,
ŋmaafɛɛnlɛ tra nu.
10 Ni yo na foorofun wi mi,
nde nii wa mu sheli.
11 Fiɛrɛ na ni yii, a ndaa yo na,
“Lewo kro pe kafnu.”
12 Chichie ŋga Nyiɛkpɔɔ ni ŋga ŋga,
yira ŋgi ni mbe tɛɛ
mbe u fɔlɔ tɔ hin?
13 Ŋmaashɔmu ŋga u ni ŋga
kre ndra na, mbe yɛshɔɔrɔ li,
mbe u mɛɛ yeeri.
14 U leele yiɛ na,
mbe u yirɛ nyjɛ ni da na
mbe u ŋga yire wɔ mbe u ŋga.
15 Nyiɛkpɔɔ leele mblɛ pe fraka pre,
pe kumu kee sheli u na.
16 O Tafun Nyiɛkpɔɔ,
mu sumifun wi mi,
mu sumifun chlɔ pɔ wi mi,
a mu mɛnyi nyjɛ yi ni pɔ
yire saanla ni na.
17 Ŋu mbe mboo ŋgaa sra wɔ
mbe ŋga, mbe mu mɛɛ yeeri.
18 Yirɛ nyjɛ ni da na
mbe mu ŋga yire,
19 mbe yire mu katoo
jlonwee nyu na, Jerusalem na
mbe yi wɔ mbe mu ŋga
mu leele yiɛ na.
E o Tafun Nyiɛkpɔɔ wre ŋga mɛɛ.