Dwamu Ŋga Kii Wa Nyiɛkpɔɔ Fiɛrɛ Nu
112
E o Tafun Nyiɛkpɔɔ wre ŋga mɛɛ.Lewo ŋmba u o Tafun Nyiɛkpɔɔ
wre fiɛ, wre wo yi dwamu,
a we yɛshɔɔrɔ kpɔɔ ta
u mbra yire nu.
2 U biile we faŋga ta tra kre nu,
a u nanae mblɛ pie fraka
pre we dwamu ta.
3 Swa na yirɛ we pe u katoo,
a u frakaa we tni nyjila kro nu.
4 Na lewo ŋmba u frakaa wa
ndramwɔɔ nu kre,
Nyiɛkpɔɔ we kaari nyisee
mbe u ŋga. Ŋgi na hin?
U pe foorochinfun,
na nyɔɔ leele na, mu fraka.
5 Lewo ŋmba u ndro fooro le
na u jini kre, ki nyɔɔ na u kaan,
a we u kee kro pe na kpra ni,
6 a yaka wa jaa u jɔŋgɔ fio,
lewo ŋmba u fraka kre,
nyjila kro nu pie u sɔɔnri.
7 A na u kee sisaa ka loo,
u gbun wa yɔ.
A u dankna o Tafun Nyiɛkpɔɔ
wre na, mu yire gbiŋmbi.
8 U loloŋgo we yire titɛɛ,
a wa fiɛ mbe sɛ su na
we u loŋgoolo nya,
kolo ŋga na u pe chaa na.
9 U lɛɛ woni na shianfɛɛnlɛ kee.
U chichie pee wa nyjila kro nu.
We jaŋga ta, mbe buuro ta.
10 Sisampefɛɛnlɛ we kee yire nya,
mbe yi pe bin.
Pie nyu chirɛ chiin,
mbe sɛ peyɛ chaa la.
Yira ŋga sisampefɛɛnlɛ chaa kre,
pia ki ta.