Kanyana Mandiɛ
109
Nyiɛkpɔɔ, ŋu ni kaan mɛɛ,kena maa pieri,
2 ŋgi na hin? Kafinɛfɛɛnlɛ
sisampefɛɛnlɛ pre,
nyu nyaa na paan ni pan,
pe kafinɛ ndile tɛɛ
mu kala fnɛ mu taa ni na.
3 Prara kee pe yuu ni na,
na wii na ni ni finfin.
4 Ni koroo fɔtɔɔrɔ yi kefuɛn
nyjɛ pe yuu ni na,
la, ni nyiɛtali na pe kaan.
5 Chichie ŋga ni pe pini kre,
sisam ni pe ni fɔlɔ toni,
mu ni pra ni koroo
ŋga ni pe kori na.
6 Ti mbe lewo ŋmba ndra ki sheli
ni loŋgo kala li.
Ti mbe wre titi loŋgo lii u taan.
7 A na pe u kala lii kre,
ti mbe u pimi li,
mbe u nyiɛtalaa kaari sisam.
8 Ti mbe u ble pe fiɛn,
mbe wa u lopom
ŋga u lii kre ta na.
9 Ti mbe u biile lɛ la,
mbe u chɔ kaari lekuchɔ.
10 Mbe u biile yili mbe sɛ tali,
mbe pe pe ni mbe yili
katoo ŋga nu pe nyi nu.
11 Ti mbe mblɛ fɔɔlɛɛ u li pan
mbe u yirɛ koli,
mbe fumblɔ u see ŋga u fali
wru mbe li.
12 Maa ti mbe wa u fooro le,
ndee mbe u bijile pre fooro le.
13 Ti mbe u nɔɔ leele fun,
mbe pe mɛɛ waa yili
mbakɔ leele mblɛ pie yiri nu.
14 Nyiɛkpɔɔ jande,
u lɛ sisam nyjɛ u pe kro sɔɔnri,
a maa shia u lo sisam nyjɛ
u pe ti mbe u kɛ.
15 Ti mbe pe sisam yire tni
mu yiɛ nyjila kro nu,
mbe mu yire yi na
mbe pe nɔɔ pɔ tra ŋga na.
16 Ŋgi na hin? U n da mu sɔɔnri
na we chichie ka pe.
Foorofɛɛnlɛ, na shianfɛɛnlɛ
na kanyanafɛɛnlɛ
pre wraa fiŋge na pe kuu.
17 Suni wraa leele suni,
kena ti mbe suŋgɔ u yii,
a wa dwan mbe ndro ŋga,
kena maa ti ndro dwan mbe u ŋga.
18 Suŋgɔ sɛ pe na dodoŋgi
ŋga u leni yi,
ki kaari u nyumu na u sro
ŋga u lii na gboo.
19 Ti mbe suŋgɔ u tɔ na yoŋgo yi,
mbe kaari u greree nyjila kro nu.
20 O Tafun Nyiɛkpɔɔ,
ti mbe ni loŋgoolo
mblɛ pe paara na ni taanri pre,
mbe pe kre fɔtɔɔrɔ ŋga ta.
21 Ŋu o Tafun Nyiɛkpɔɔ Jaŋgafun
jande mu mɛɛ saara na, ya ni na,
ŋgi na hin? Mu koroo kpɔɔ, kena ni shɔ.
22 Ni shian a ni jawala tia ni sɔɔ.
23 Pan ni shie mbe sɛ fun,
imi na yila we to
mbe ndro ndile fun ŋga yi,
pan ni tro mbe sɛ na kpatɔ wi.
24 Blefuun tia ni kosie na funi ni na,
a ni chɔɔn, a ni nyina kɔ ni nu.
25 Na ni loŋgoolo ni nya,
mbe praa ni pini mbra tɛɛ
mbra ndra nyaara.
26 O Tafun Nyiɛkpɔɔ, ya ni na,
mu ni shɔ imi na
mu koroo nyi kre.
27 Ti mbe pe chin na
mu jaŋga ni mu ki pe.
28 Sun pre leele suni,
ŋu rɛ, dwamu mu leele kaan.
Ti mbe nyifɛɛrɛ pe gbo,
la, ti mbe mu sumifun yiɛshɔ.
29 Ti mbe ni loŋgoolo yiɛ le nyumu,
mbe nyifɛɛrɛ pe le dodoŋgi.
30 Mbe ni nyu tɛɛ,
mbe o Tafun Nyiɛkpɔɔ
wre ŋga mɛɛ kpɔɔ
lenɛɛrɛ fnindoo mbe u mɛɛ kpɔɔ.
31 Ŋgi na hin? Uu wa mu yire,
ŋmba u fooro lii wre kalie kɛ,
mbe u shɔ mblɛ pe u kuu pre kɛɛ.