HLƐ KUNƆ WO
(Mɛɛ Hlɛ 107–150)
Mboo Ŋgaa Mɛɛ
107
E o Tafun Nyiɛkpɔɔwre ŋga mboo,
ŋgi na hin? U nyu o na,
a u koroo kpɔɔ kree wa
nyjila kro nu.
2 E ti mbe mblɛ o Tafun wre shɔ
pe loŋgoolo kɛɛ,
pre u ŋga mboo.
3 Leele mblɛ u wɔ mu yili
tra kokoe jijirɛ yire kro na kre,
4 pe plɛ na kila tablɔ tra kre nu,
pe nsra chia nya mbe tni.
5 Klo na pe ta, a gbɔɔ na pe ta,
pe dankna kro na kɔ,
6 pe kanyana kre nu, pra nyɛni
mu o Tafun Nyiɛkpɔɔ yeeri,
a wra pe shɔ
mu yili pe kanyana nu.
7 A wra tro na pe ni kofrakaa na,
mna sɛ na pe ni chia ŋga na
pie jaa tni na.
8 E ti mbe pe o Tafun Nyiɛkpɔɔ
wre ŋga mboo,
u koroo ŋga kii wa nyjila kro nu,
na u kawako kee nyjɛ u pini,
na leweele kaan kre ndra na.
9 Leele mblɛ gbɔɔ na ta kre,
wra tia pra gbɔ mu yɔɔ,
a mblɛ klo na ta kre,
wra tia pra sro chiriri li mu yɔɔ.
10 La, plɛ naa wa mu tni
wɔmu kprikpri ndoo,
pra pe yii mu tɔɔnrɔ mɛnyi le
pe na mu pe le nyuŋgo,
a praa kala nyaa.
11 Ŋgi na hin? Pra yiri mu
Nyiɛkpɔɔ kee kre taan,
mna wre ŋmba wi Jaŋgafun wre
kee le fiɛn.
12 A wra tia pra tnumu tun kpɔɔ
mu fna, na woni na tuuri,
pia yafun nya.
13 Pe kanyana nu kre, pra nyɛni
mu o Tafun Nyiɛkpɔɔ wre yeeri,
a wra pe shɔ
mu yili pe kanyana nu.
14 Wra pe wɔ mu yili
wɔmu kprikpri ndoo kre nu,
mna pe tɔɔnrɔ mɛnyi yire
knumu pe na. Ŋgi na hin?
15 E ti mbe pe o Tafun Nyiɛkpɔɔ
wre ŋga mboo.
U koroo kree wa nyjila kro nu,
a u kawako kee pini
na leweele kaan.
16 Wre u krɔɛ nyjɛ pe piin
swafre ni kuari na woni,
mu na tɔɔnrɔ swanyiɛfre nyjɛ ni
pe krɔ nyu toni kuari.
17 Plɛ ndikana ndra na,
pra kaari jijiele,
mna kala nya pe sisam ndra na.
18 Sro kro kee na pe bin,
a kra tia pra mbra kumu na.
19 Ki tia pe kanyana nu kre,
pra nyɛni mu o Tafun
Nyiɛkpɔɔ wre yeeri,
a wra pe shɔ pe kanyana nu.
20 Wra tia u nyu kayolo
na pan mu pe tra,
a wra pe shɔ mu yili faŋga lam.
21 E ti mbe pe o Tafun
wre ŋga mboo, Ŋgi na hin?
U koroo kree wa nyjila kro nu,
u kawako kee nyjɛ u pini
na leele kaan yire na.
22 E ti mbe pe u ŋga mboo,
mbe sra wɔ mbe u ŋga,
mbe yɛshɔɔrɔ tɛɛ
mbe u kee nyjɛ u pe yire tɛɛ
mbe mɛɛ kɔ.
23 Plɛ na sɛ krɔɛ kpɔɛ ni epo yiɛ na,
mna sɛ tnumu tun lɔɔ yiɛ na.
24 Pre pra kee nyjɛ
o Tafun Nyiɛkpɔɔ wre na pe nya,
kawako kee nyjɛ wra pe
nyumu yiɛ na yire kro,
pra yi nya.
25 Wra paara a fuflɛ kpɔɔ na gbun,
a kra tia epo na kan.
26 Fuflɛ kre na krɔɛ yire kɔ nyjeeri,
a yira pan mu to
nyumu kre yiɛ na,
mna chaa tii na pe ni,
yire kee nyjɛ na tia
pe dankna na kɔ pe nu.
27 Imi krɔɛ yire naa pe mɔŋɔi
na shie na paan kre,
pra sɛ pe na gbɔgbɔɔlɔ lɛ,
pe kachindɛ kro na kɔ pe ndra.
28 Pe nyibinyiɛ nyjila nu kre,
pra nyɛni mna o Tafun
Nyiɛkpɔɔ wre yeeri,
a wra pe shɔ pe kanyana yire nu.
29 Wra tia fuflɛ kre nyu na ku,
a nyumu kre na yire dimm.
30 Pe yiɛ na shɔ na yira kro nyu ku,
a wra tia krɔɛ yire na pan na pe ni yi yire haa,
ŋga lawee praa chaa kre nu.
31 E ti mbe pe o Tafun Nyiɛkpɔɔ
wre ŋga mboo. Ŋgi na hin?
U koroo wa nyjila kro nu,
a wre u kawako kee pini
na leweele kaan.
32 E ti mbe pe u kpɔɔ
lenɛɛrɛ fnindoo,
mbe u ŋga mɛɛ
loplombo fnindoo.
33 Wre wra tia lɔɛ nyumu
na kɔ yi nu,
mna tia bloe na yua.
34 Tra ŋga ki tna kro,
na kaari tra pɛɛn,
leele mblɛ pee wa mu tni tra
kre na pre sisam ndra na.
35 Wra tia fimi lawee yire
na kaari tapla bribri,
mna tia bloe na bɔ
tra ŋga kra yua kre nu.
36 Bawa wra tia mblɛ klo na ta
pre na pan mu tni,
a pra chia pɔ mu tni.
37 A pra seele tɛɛ,
mna afue tinyi luu,
a sro na bɔ tataara.
38 Wra pe dwan a pra nɛɛ,
a u nsra tia ka na kun pe yurɛ na.
39 A na ki pan na kanyana,
na katala, na fooro tia
ka na kuun leele pre na kre,
40 mbe u kna mbe pe
fiŋgefɛɛnlɛ pre le fiɛn,
mbe pe gbun mbe nyina
tablɔ lawee kre nu.
41 La, mblɛ pe kala nyaa pre,
we pe wɔ mbe yili pe kanyana nu,
mbe ti mbe pe sele leele nɛɛ
na mbaala lɛ tataara.
42 Na mblɛ pe fraka pre ki nya,
mbe pe yiɛshɔ,
la, na sisampefɛɛnlɛ pre ki nya
pia sro mbe paara.
43 Ŋmba u kala chin kpan,
ti mbe u yire kee nyjɛ jawa,
mbe chin na o Tafun Nyiɛkpɔɔ
koroo kree wa, nyjila kro nu.