Nyiɛkpɔɔ Dumiɛn
106
E o Tafun Nyiɛkpɔɔ wre ŋga mɛɛ,e u ŋga mboo,
ŋgi na hin? U nyɔɔ o na,
a u koroo wa nyjila kro nu.
2 Ndro ŋmbi we jaa kekpɔɛ
nyjɛ Nyiɛkpɔɔ pe
yire kro kee yo hin?
Ŋmbi we jaa u ŋga mɛɛ
ŋga ni u fna hin?
3 Mblɛ pe lii u kee na, mu na
ŋga ki fraka pini kre,
pe wo yi dwamu.
4 O Tafun Nyiɛkpɔɔ, jande
na mu yaa mu leele pre na
mu ni sɔɔnri,
jande ni chaa
mblɛ mu shɔ pre nu.
5 Mbe ki ti ni mu leele pre taan
ŋga pie li kre ka nya,
mbe yɛshɔɔrɔ ŋga pie taa li kre ka li,
mbe mi na mu leele pre chaa
mbe mu kpɔɔ.
6 O sisaa pe mu na, imi na
o tolɛɛlɛ pre na yi pe mu na kre.
O fun mu na, mu sisaa
kpɔɔ pe mu na.
7 Ŋga o tolɛɛlɛ pre naa wa
Egypt na kre,
pe nsra mu kawako kee
nyjɛ mna pe yire le mu nya.
Pe nsra mu koroo kpɔɔ kre sɔɔnri,
a pra yire epo nyiɛ kre nyu na
mna paara mu mu taan.
8 A nde mu mɛɛ kre saara na
mna pe shɔ, mna pe tɛɛ
mu mu jaŋga kpɔɔ kre nyina.
9 Nyiɛkpɔɔ na fuu epo nyiɛ kre na,
a kra peeri,
a wra nyaari na leele pre ni
tra waara na,
mu kun na pe ni ki kro.
10 Wra pe shɔ mu yili
pe loŋgoolo kɛɛ.
Pe loŋgoolo nsra jaŋga ta pe na.
11 Epo kre na pe loŋgoolo pre li peii,
pe nunu kuraa nsra kro.
12 Bawa pra chin mna u nyu
ŋga wra yo pe pan kre shɔnli,
mna mɛɛ kɔ mna u ŋga mboo.
13 La, ki nsra mu a pra kee
nyjɛ wra pe yire kro fɛɛ.
Pe nsra u nyu shie,
mnaa nyjɛ pe chaa pini.
14 Pre titi na pe niŋge sro wie
fimi tra kre nu wa, mna ki tɛɛ
mu Nyiɛkpɔɔ pe mu le.
15 A wra pe ŋga sro nyjɛ praa chaa,
a wra ndru mu tia kumu yira
na pan mu le pe nu.
16 Pe yiɛ na nyina Moses na Aaron
Nyiɛkpɔɔ leele cheche pre na,
17 Kre kee ŋga ndra na,
tra na nyaa mu Dathan jɔli,
kra kna mna Abram
na u wolo kro juule.
18 A kanhun na nyi mna le
pe kotɔmblɔ pre nu,
mna pre sisampefɛɛnlɛ pre shɔ
mu gbo peii.
19 Ŋga Israel leele pre hamblɛ
na da Horeb na kre,
pra swanyiɛ tɛɛ mu nuu pɔ gbeele
sɛɛn mnaa ki sumi.
20 Pra Nyiɛkpɔɔ, yɛnyiŋgefun
wre je,
mna nuu ŋmba u nyaa kaa gbeele
na sumi.
21 Nyiɛkpɔɔ ŋmba wra pe shɔ kre,
pra wre fɛɛ,
wre wra kekpɔɛ pe pe yiɛ na
Egypt na kre,
22 mna tia pra kawako kee nya wa,
mna fiɛrɛ kee pe
epo nyiɛ kre nyu na.
23 Ki tia Nyiɛkpɔɔ krɔ na kun
a wra yo we pe kla,
la, Moses ŋmba wra wɔ wre,
na sɛ yire leele pre na
Nyiɛkpɔɔ lalaa mna u tali,
mbe u ti u krɔ nyjii
mbe wa pe kla.
24 Pra tra taan ŋga wra pe ŋga kre je,
ŋgi na hin?
Pe nsra u nyu kee kre shɔnli.
25 Pra tni pe yonyi nyinyi nu
na taanri,
pe nsra o Tafun Nyiɛkpɔɔ
wre kee loo.
26 A kra tia wra kɛ yire mna da,
na we ti mbe pe ku
fimi tra kre nu,
27 mbo, a we pe nanae gbun
mbe nyina, leele
mblɛ pe n Nyiɛkpɔɔ chin pre nu,
mbe pe nyina tra kre nu poŋgo.
28 Ŋga pra da Peor na kre,
pra sɛ sɛɛn ŋga pe yeeri Baal
kre sumi, mna sɛ sɛɛn kaara ka,
sɛɛn ŋga nu ŋmaa n wa kaara.
29 Pe sisam kee yire na tia
Nyiɛkpɔɔ krɔ na kun,
a wra tia yira na pan
mu le pe nu mna pe gbo.
30 A Phinehas na yire
mna mblɛ pra sisaa pe
kre ndie tini,
a kumu kre nyu na to.
31 Kre kee ŋga na tia pra yo na
Phinehas fraka,
a pra ki tɛɛ na u sɔɔnri
nyjila kro nu.
32 Pra tia Nyiɛkpɔɔ krɔ na kun
Meribah blo kre mbɛɛ na.
Pe ndra na, Moses na kala ta
Nyiɛkpɔɔ pan.
33 Pra tia u krɔ na kun
a wra paaraa ŋga ki n fna paara.
34 Pe nsra leele mblɛ
pe n Nyiɛkpɔɔ chin pre gbo,
imi na Nyiɛkpɔɔ na yo pe pan kre.
35 La, pra pe leŋge mu tni,
mna pe sɛɛnlɛ sumiɛ
kooloe yire wru.
36 Nyiɛkpɔɔ leele pre,
pra sɛɛnlɛ sumi,
a kra tia wra pe kla.
37 Pra pre titi biile tɛɛ mu sra wɔ
mu sɛɛnlɛ nyjɛ yiraa wa
Canaan na ŋga.
38 Biile pre nsra sisaa ka pe,
nde pra pe gbo,
pre linkufɛɛnlɛ mblɛ na
tra kre kla.
39 Pe kepele na tia pra peyɛ tɔ
na nɛɛrɛ ni,
a pe nsra taa Nyiɛkpɔɔ na.
40 Ki tia o Tafun Nyiɛkpɔɔ
krɔ na kun na u leele pre ni,
a pe kee na u bin.
41 A wra kɛ laa pe na,
mna tia leele
mblɛ pe nsra u chin kre,
na jaŋga li pe na mna pe le.
42 Pe loŋgoolo pre na pe fiŋge,
mna jaŋga li pe na.
43 Nyjila tataara nu,
o Tafun Nyiɛkpɔɔ wre
naa u leele pre shio,
la, pra je na yiri na u taanri,
na sisam kpɔɔ pini u na.
44 Nde na pe nyɛni mu u yeeri
we loo pe pan,
mbe pe shɔ pe kanyana yire nu.
45 Pe ndra na,
wra u nyu nunu kre sɔɔnri,
a u koroo kpɔɔ kre ndra na,
wra pe fooro le.
46 A wra tia pe kee na pe fooro ni
pe fiŋgefɛɛnlɛ pre kɛɛ.
47 A pra kna mbo,
O Tafun Nyiɛkpɔɔ, o shɔ.
O shɔ mu yili leele mblɛ
pe n mu chin pre kɛɛ,
mbe o mu ŋga mboo,
mbe mu mɛɛ cheche kre ŋga mɛɛ.
Israel Nyiɛkpɔɔ wre,
e u ŋga mɛɛ nyjila kro nu.
E ti mbe leele pre kro yo, Ami.
48 E o Tafun Nyiɛkpɔɔ wre ŋga mɛɛ,
Israel leele Nyiɛkpɔɔ wre,
e u ŋga mɛɛ nyjila kro nu.
E ti mbe leele pre kro yo Ami.
E o Tafun Nyiɛkpɔɔ wre ŋga mɛɛ.