Nyiɛkpɔɔ Na U Leele
105
E o Tafun Nyiɛkpɔɔwre mɛɛ yeeri,
e u ŋga mboo.
U kee nyjɛ u pe yire,
e yi yo mbe leele
mblɛ pe n u chin pre yi loo.
2 E mɛɛ kɔ e u ŋga,
e mɛɛ kɔ e u mɛɛ yile,
e u kawako kee
nyjɛ u pe yire kee yo.
3 E ti mbe e yiɛshɔ na yire na wre wi.
E ti mbe mblɛ pe o Tafun
wre haa chaa kre yɛshɔɔrɔ ta.
4 E o Tafun wre jaŋga haa cha,
e u sumi nyjila kro nu.
5 E u kawako kee
nyjɛ u pe yire sɔɔnri,
kre na u kprakuɔn kre ni.
6 Yire u sumifɛɛnlɛ,
Abraham nanae,
Jacob ŋmba wra wɔ wre biile,
7 o Tafun wre, o Nyiɛkpɔɔ wi,
a u kpra kuun waŋgra ŋga nu kro.
8 U u nyu nunu ŋga wra pe
kre sɔɔnri,
hali na yɛlɛ kagbeŋge kɔkro yi kuraa,
wa ki fɛɛ.
9 U nyu nunu ŋga wra pe
na Abraham ni,
na u daŋga ŋga wra da
mu Isaac ŋga kre.
10 Kre nyu nunu kre chɔɔ,
wra ki pe na Jacob ni,
mbe ki tni nyjila kro nu.
11 Mbo, “Ŋu Jacob mbe ŋga
Canaan tra kre mbe mu tni,
kre kie pe mu krɔyira.”
12 Nyjila ŋga ni praa fiɛn,
a pe nsra da yaka,
mna pe fumblɔ tra kre na,
13 a pe nsra titɛɛ ta mu tni,
a praa yiri lawee mbe sɛ lawee kre,
14 Nyiɛkpɔɔ nsra ndro ŋga kolo
mbe u pe tɔɔra,
pe ndra na,
wra ŋulo yiɛ kee yo pe pan,
15 mbo, “Ni biile mblɛ ni wɔ pre,
yaashia kɛ taa pe na.
Ni keenyanyofɛɛnlɛ pre,
yaa shia pe tɔɔra.”
16 Ŋga Nyiɛkpɔɔ na tia
klo na to pe na,
a sro nsraa wa mbe pe li kre,
17 wra klu mu tia
Joseph na yiɛ klu pe na.
Pra u prɛ tnu,
18 a pra sɛɛrɛ le u jeelee na,
mna jlɔnyi le u lagboo,
19 mna sɛ su na kee ŋga wra yo kre
na pe ma yɛŋgɛ.
A Nyiɛkpɔɔ na nyina na
u kee kre pe kpra.
20 Ŋunu wre na tia
pra u wɔ mɛnyi yire nu.
21 A wra u pe u katoo lefun,
mna tia wraa u waŋgra kre kro le.
22 Mna tia wraa u sumifɛɛnlɛ kro le,
na u loplombo kro
nyina kachindɛ.
23 A Jacob na sɛ tni
Egypt waŋgra kre nu wa.
24 Nyiɛkpɔɔ na tia
Jacob kɛ leele na nɛɛ
mu wɛ pe loŋgoolo pre na.
25 Wra tia Egypt leele
pre na u leele pre le nyibie,
mna tia pra yɛkɔɔnrɔ tɛɛ
mu pe fiŋge.
26 Wra Moses na Aaron wɔ
mna pe tun pe pan,
27 a pra sɛ kawako kee
ŋga mu chin ŋga kro pe,
Egypt tra kre nu wa.
28 Wra tia ndram na wɔ
lawee kre nu,
a Egypt leele pre na je
mna ndikana pe u kee kre na.
29 Wra tia pe lɔɛ kro na kaari nyimi,
a pe mbroe naa kuu lɔɔ.
30 Wra tia kpanhɔɔnlɔ na pan
mu tra kre tɔ poŋgo,
hali mna sɛ le pe ŋunu nyuŋgo
mu bawa nyi.
31 Wra paara a shunshɔɔnlɔ na
napɔɔnlɔ na pan mu tra kre tɔ.
32 Wra tia nyiɛsubie na
nyiɛtwanraa na wo tra kre na
poŋgo, na nyiɛ ki paan.
33 A kra pe afue tinyi na tinyi
nyjɛ yi sɛni pra lii kro kla,
mna tinyi nyjɛ yii wa tra kre
na wrɛ gbun mu wo.
34 Wra paara a kpatɔ na kpaae
na pan mu tra kre tɔ,
hali pe nsraa nyu ni.
35 Pra pan mu wrɛ
nyjɛ yiraa wa tra kre na,
na pe see sroe kro ka.
36 Wra Egypt bijlo
ŋmba pe se tra kre nu kro gbo,
a pre na lɛ pe biile
mblɛ pra se pe faŋga nyjila.
37 Wra kɔ mu u leele pre wɔ
tra kre nu soo,
a ŋga praa yilii kre,
na swafinyi na swanyiɛɛ wa pe pan,
a yaŋu nsraa wa pe nu,
pe kro naa faŋga ni.
38 Ŋga praa shie kre,
kra tna Egypt leele pre pan,
ŋgi na hin? Praa pe fiɛ.
39 Nyiɛkpɔɔ na tia tlo na pan
mu pe tɔ,
na ble wɔ mbe kanhun mu
mbe praa nyaa.
40 Klo na pe ta, a pra Nyiɛkpɔɔ tali,
a wra tia hanyiɛlɛ na yiri
sro ni nyjeeri mu pan,
mu pe ŋga a pra ka mu yɔɔ.
41 Wra tia nyumu na yili
dnɛ kpɔɔ ka nu,
mna fo na lɔɔ yi fimi tra kre nu.
42 Ŋgi na hin? Wra u nyu nunu
ŋga wre na pe tolɛɛ Abraham,
u sumifun wre na pe kre sɔɔnri.
43 Wra u leele mblɛ u wɔ pre wɔ
mu yili Egypt na,
a pra yili na yɛshɔɔrɔ ni,
mna mɛɛ kɔ mu gble tataara.
44 Wra tia pra sɛ leele
mblɛ pe nsra u chin
pre tra wru mu tni,
mna sɛ fnaa ŋga plɛ fna tnu li.
45 Mbe ki ti pe u le,
mbe li u mbra na.
O Tafun Nyiɛkpɔɔ wre,
e u ŋga mɛɛ.