Nyiɛkpɔɔ Mɛɛ Ŋgaa
104
Ni nyiɛ o Tafun wre ŋga mɛɛ,o Tafun, ni Nyiɛkpɔɔ mu kpɔɔ,
a mu jaŋga na
mu yɛnyiŋge fɛ mu mu kun.
2 Ŋu mu tia nyisee mu fɛ mu kun,
na yoŋgo mu tɔ,
a mu nyjeeri nyaa mu chan,
na dɛŋglɛ yi.
3 Ŋu mu mu tnihaa sin
mu taa nyumu na nyiɛ yiɛ na,
mu tloe pe mu soo kaa,
mu na jiin fuflɛ na na shie.
4 Ŋu mu fuflɛ pe mu bituŋu,
mu nyiɛ ŋga ki nyini
pe mu sumifun.
5 Ŋu mu tia tra yire gbiŋmbi
a kia jaa kɔ ki titɛɛ.
6 Ŋu mna tia nyumu tra yiɛ tɔ,
hali mna nyuɛ kro tɔ poŋgo.
7 A mna paara a nyumu kre na fun,
ŋga kra mu mana loo kre,
a kra pe nyaanyaa mu fɛ mu fun.
8 Nyumu kre na fo
mu laa nyuɛ yire na,
mna sɛ tro yi tapan tra. Ŋgi na hin?
Bawa mu chaa mbe yi tro.
9 Mna yi trohaa wɔ mu tɛɛ,
imi kie pe mbe kia jaa tra tɔ na.
10 Mna bloe wɔ nyuɛ yire nu,
mu tia yira fuu na tro yi tapan,
11 a nyaalam yurɛ na taa na gboo,
a gbɔɔ na koo pe na.
12 A hanyiɛlɛ na zeere leni
tinyi nyjɛ yii wa mu yire
nyuɛ yire mbɛɛlɛ na yire na,
na tuuri yi klɛ na na nyɛni.
13 Nyjeeri wa mu nyi na nyiɛ paan
na woni nyuɛ yire na,
a mu dwamu tra tɔ poŋgo.
14 Mu tia nyaa na too
a yurɛ na taa na kaa,
a mu lewo ŋga sro ŋga we luu tra,
mbe ki pan mbe u taa li.
15 Mu lewo ŋga simi
mbe u gbɔ mbe u yiɛshɔ,
na simi ŋga we fa mbe u yiɛ nyu
mbra tlan, mbe sro taa li
mbe gbun nyjii u na.
16 O Tafun wre nyumu woni
tinyi na kama.
Cedar tinyi nyjɛ u luu Lebanon na
yire kro na.
17 A hanyiɛlɛ na pe zeere leni yi na,
a lɔɛ hanyiɛlɛ na sni yi klɛ nu.
18 A nyaa yurɛ lawee ta
mu tni nyuɛ yire na,
a pe plɛ ndra haa ta
dnɛ yire weele nu.
19 Mu nyiɛpɔ pe a kra nyjila nyina,
mu tia yila ki to nyjila chin.
20 Ŋu mu tia ble na woo,
mbe ndram wɔ,
mbe nyaalam yurɛ jaa yili fimi na.
21 Na blɛkpɔɔ to fimi na
mbe u taa yurɛ kro, mbe plɛ yii ka,
a ŋu Nyiɛkpɔɔ mu u ŋga u sro.
22 Na yila waa yili, mbe pe fɛ
mbe sɛ ndra pe snihɛɛ nu.
23 Mbe lewo yiri
mbe tnumu tun chiin
mbe sɛ su yilakɔŋgɔ nyu na.
24 O Tafun Nyiɛkpɔɔ,
yirɛ nyjɛ mu pe nɛɛ mu tro,
a kachindɛ ni mu yi kro pe.
Yirɛ nyjɛ yi tra ŋga nyi ŋga kro,
ŋu mu yi pe kro.
25 Ŋu mu epo wa, a ki kpɔɔ mu vala,
bawa yurɛ nyi na tro
a pia jaa tɔɔnri,
pe kpɔɛ na bɛɛlɛ kro.
26 A krɔɛ badɛnyi na tro epo yiɛ na,
a bawa lɔɔ yurɔ kpɔɔ ŋmba mu wa,
a wra pna ki nu kre nyi.
27 Pe kro mblɛ kro,
ŋu na pe yiɛ nyi,
mbe mu pe ŋga pe sro
nyjila ŋga ki fna nu.
28 Mu pe kaan sro mbe pe li
mbe yɔɔ imi na pe chaa.
29 Na mu yiɛ wɔ pe na
fiɛrɛ we pe gbo,
a na mu mu ŋumu wɔ pe nu pie ku,
mbe ndruu kaari tra ŋga ni
mna pe gbeele kre.
30 Ŋu mu tia yurɛ na sii nɛɛrɛ,
a pia jaa kɔ tra na.
31 O Tafun Nyiɛkpɔɔ yɛnyiŋge
ki kro ma nyjila kro nu,
mbe ki ti u yiɛshɔ yirɛ
nyjɛ u wa na.
32 Wre we ndra soo
mbe tra le mbe kraa seeri,
na u da nyuɛ na mbe yira wree yili.
33 Nyjila kro nu, mbe mɛɛ kɔ
mbe o Tafun wre ŋga,
ŋga nii wa ŋmaa ni ŋga mbe mɛɛ kɔ
mbe ni Nyiɛkpɔɔ wre mɛɛ yile.
34 U tii mbe ni jawala kee nyu u pan,
mbe ni yiɛshɔ u na.
35 Ti mbe sisampefɛɛnlɛ
kɔ tra ŋga na,
mbe o pe cha kuraa mbe la.
Ni nyiɛ, o Tafun Nyiɛkpɔɔ
wre ŋga mɛɛ imi na ki fna.