Ndro ŋmba na kala to nyiɛtalaa.
102
O Tafun Nyiɛkpɔɔ, ni nyɛnɛɛna ni nyiɛtalaa loo,
mu pan mu ya ni na.
2 Na kala ni da,
jande maa shia yiɛ ndra ni na,
na ni mu yeeri mbe mu loo ni pan,
mbe ŋga ki ni shian pe,
nyaanyaa mbe ni ŋga.
3 Ŋgi na hin? Pan ni ble nyjɛ
mbe li yire ni troi,
na shie na wree yi,
a wejiŋge wɛɛri ni na.
4 Ni lɛɛ kla, ki tia
mba jaa sro le nyuu.
5 Ni jiɛn tataara tia ni chɔɔn.
6 Pan ni nyi na lelɔŋgɔfiun
ŋmba u tro tablɔ tra nu wi,
ndee kuwee ŋmba
uu wa mu tni kataa na wi.
7 Ndaa ja mbe ŋunu,
pan ni nyi na hanyini wa
mu tni nyuŋgo ndra na,
wre nunu.
8 Nyjila kro nu, ni loŋgoolo,
na mblɛ pe ni klaa chaa,
pre ni tɛɛlɛ na ni suni.
9 Mu krɔkuɔn kre fiɛrɛ ndra na,
tɔɔnrɔ sɛ kaari ni sro,
a ni yotunyi sɛ chaa ni nyumu
ŋga mbe gbɔ nu.
10 Mu krɔ ŋga ki kun na ni ni
mu tro kre ndra na,
mu ni wru mu sɛ wa.
11 Pan ni ble nyjɛ mbe li yire
sɛ pe na yila koo,
a yirɛ ndile na shie mbe sɛ fun,
pan ni nyi to, na nyaa waa yi.
12 La, ŋu o Tafun, ŋu wi ŋunu
nyjila kro nu,
a mu mɛɛ wa mbe sɛ su
nyjila kro nu.
13 Ni chin na mu yiri
mbe paan Zion fooro le.
Ŋgi na hin?
Nyjila ŋga mu tɛɛ kre da,
mbe mu paan pe fooro le.
14 Kii wa na pe chia kre ja mu ki kla,
nde mu leele pree wa mu ki kori,
a ki fooro wa pe na.
15 Leele mblɛ pe n mu chin
pre we mu mɛɛ kre fiɛ.
Pan chɔɔ waŋgra ŋga ŋulo
we mu jaŋga kre fiɛ.
16 Ŋgi na hin? O Tafun wre
we ndru mbe Zion pɔ na,
mbe u jaŋga kre wɔ mbe nyina.
17 U leele mblɛ wra je pre,
we pe nyiɛtalaa loo,
a wa pe le fiɛn kuraa.
18 E yire kee nyjɛ nyunɔ e tɛɛ
mbakɔ biile pan,
mbe mblɛ pe n se tun pre kɔɔ yiri,
mbe o Tafun wre ŋga mɛɛ.
19 O Tafun wre yire
u cheche ndoo wa nyjeeri,
mu na lewo le tra mna.
20 U yire wa mu mblɛ pe yii tinlɛ
pre jiɛn loo,
a u mblɛ pe shie mbe sɛ gbo pre
saanla mu wa,
21 mbe pe yire Jerusalem na
mbe o Tafun wre mɛɛ yeeri,
mbe u ŋga mɛɛ,
22 mbe waŋgra ŋga leele kro
paan fni wa,
mbe o Tafun wre sumi.
23 O Tafun Nyiɛkpɔɔ, mu tia
faŋga kɔ ni nu, ni yirifum nyjila.
A mu ka kun ni ble nyjɛ mbe li na.
24 Ki tia ni yo ni Nyiɛkpɔɔ pan na,
ni n lɛ, kena maa shia ka kun
ni ble na, mbe ni wru lalaa.
Ŋgi na hin? Muu wa nyjila kro nu.
25 Ŋu mu yire fafa mu tra gbeele,
a nyjeeri pe mu kɛ nyu tnumu.
26 Yi kro we kla,
la, ŋu muu wa nyjila kro nu,
nyjɛ mu gbeele yire kro
we lɛ na yonyi yi.
Yie knumu na yokunumɛɛ yi
mbe fun.
27 La, ŋuu wa imi na mna nyi fa,
a mu yɛlɛ n nyukɔɔrɔ ni fio.
28 Mu sumifɛɛnlɛ biile we tni
mu jaara nyjila kro nu,
a pe nanae wa kɔ fio.