Nyiɛkpɔɔ Wi Ŋunu Kpɔɔ
99
O Tafun ŋunumu lii,a leele na seeri u yiɛ.
U tni u ŋujɔɔn na
yurɛ mblɛ pe yeeri Cherubim
pre lalaa, a tra na seeri.
2 O Tafun wre, u kpɔɔ Zion na,
a pan pe u kpɔɔ waŋgrɛ kro nu.
3 Pie mu ŋga mɛɛ,
mu mɛɛ ŋga ki kpɔɔ kre ndra na.
Ŋgi na hin? Ŋu mu pe cheche.
4 Ŋunu Jaŋgafun, mu kpra kori,
ŋu mu kpra li Israel leele nu,
a mu kpra kun chasi.
5 E o Tafun Nyiɛkpɔɔ wre kpɔɔ,
e kosie kan u yiɛ,
ŋgi na hin? U pe cheche.
6 Moses, na Aaron na lɛ
u srawɔfɛɛnlɛ,
a Samuel na chaa mblɛ
praa u tali pre nu.
Pra nyɛni mu o Tafun Nyiɛkpɔɔ
wre yeeri, a wra shɔ pe pan.
7 Wra yire tloe nu mna paara
na pe ni, a pra li u mbra kee,
na u kee nyjɛ wra yo
pe pan kro na.
8 O Tafun Nyiɛkpɔɔ,
ŋu mna shɔ pe pan,
mna pe nyina na mu pe Nyiɛkpɔɔ
ŋmba mu tii na kee,
nde mna pe ndie tini
pe sisam nyjɛ pra pe na.
9 O Tafun Nyiɛkpɔɔ wre, e u kpɔɔ,
e yire u nyua cheche kre na
e kosie kan e u sumi.
Ŋgi na hin? O Tafun Nyiɛkpɔɔ
wre pe cheche.