Nyiɛkpɔɔ Ŋunumu Lie Kpɔɔ
97
Nyiɛkpɔɔ wi ŋunu, kena e timbe leele mblɛ
pee wa tra na yiɛshɔ.
Leele mblɛ pee wa trɛ
nyjɛ yii wa epo nyu na kro,
e ti mbe e yiɛshɔ.
2 Tloe na wɔmu u fɛ mu kun,
u fraka, na u ŋunumu lii
na kpra ni.
3 Kanhun yiɛklu u pan,
na u loŋgoolo sroi
kamɛŋɛ na kalie.
4 Na nyiɛ nyi, ki nyaa tra,
a na tra leele ki nya,
mbe pra seeri u yiɛ.
5 O Tafun ŋmba wo yi tra kre,
nyuɛ nyani u yiɛ na srɛ kanya yi.
6 Nyjeeri u frakaa nyina,
a leele kro u yɛnyiŋge nya.
7 Mblɛ pe yirɛ wɛɛ na sɛɛnlɛ sumi
na peyɛ kpɔɔri na yi ni pre kro,
nyifɛɛrɛ we pe gbo,
Sɛɛnlɛ yire kro, e kosie kan
e o Tafun Nyiɛkpɔɔ wre sumi.
8 O Tafun, leele mblɛ pee wa
Zion na pre mu kee loo
a pe yiɛshɔ.
A chiɛ nyjɛ yii wa Judae
na yire leele yɛshɔɔrɔ lii,
mu kprakuɔn kre ndra na.
9 O Tafun Jaŋgafun,
ŋu mu tra ŋga kro le,
a mu kpɔɔ mu wɛ sɛɛnlɛ
nyjɛ yii wa tra ŋga na kro na.
10 O Tafun Nyiɛkpɔɔ wre
mblɛ pe sisam fun pre kori.
U u leele pre le, na pe shio
Sutna wre jaŋga kɛɛ.
11 Mblɛ pe fraka pre,
u nyisee kre tia pra nyaa,
mu tia mblɛ lolonyi yi pe cheche
pre yiɛ na shio.
12 Yire mblɛ e fraka kre,
e ti mbe e yiɛshɔ
kee ŋga o Tafun wre pe kre na,
a kee ŋga o Tafun ŋmba
u pe cheche wre pe kre,
e ki sɔɔnri e u ŋga mboo.