Nyiɛkpɔɔ Wi Kpra Kunfun
94
Nyiɛkpɔɔ, o Tafun Nyiɛkpɔɔŋmba u fɔlɔ toni,
muyɛ wɔ mu o nyina.
2 Yiri mu tra ŋga leele kpra kun,
mblɛ pe peyɛ kpɔɔri kre ŋga fɔtɔɔrɔ
ŋga ki fna na pe ni.
3 O Tafun, nyjila ŋgi nu
sisampefɛɛnlɛ yɛshɔɔrɔ nyu
we to hin?
4 Kekpɔɛ yi yilii pe nyuu,
sisampefɛɛnlɛ pre, peyɛ pe kpɔɔri.
5 O Tafun, pe mu leele pre fiŋge,
mu tia pra kala nyaa.
6 Pe lekuchiɛlɛ na bijile pre frɔ
na kuu,
pre na fumblɔ
mblɛ pee wa tra kre nu kro ni.
7 Pe yuu na, “O Tafun wre wa o nya,
Israel Nyiɛkpɔɔ wre
wa nyjɛ krɛrɛ le.”
8 Jijiele damatiie, nyjila ŋgi nu
ee tuan mbe chin hin?
9 Kena e yo ŋmba wra lewo
ŋga ndie wre, u n na ndru ra?
Ndee ŋmba wra lewo ŋga nyini wre,
u n na nyaa ree?
10 Wre ŋmba u lewo ndie tinii wre,
e jawa na u n jawala ni ra?
Ndee wre ŋmba u lewo nyina kee kre,
e jawa na u n kala chin ra?
11 O Tafun Nyiɛkpɔɔ wre
lewo jawala kee chin,
a u chin na lewo kee
ŋga u jawa kro pe waara.
12 O Tafun, lewo ŋmba ndie mu tinii,
mbe u nyina mu mbra yire kre,
u wo yi dwamu.
13 Mu u shɔ
mbe yili u kanyana ble nu,
mbe sɛ su na pie wee badaaŋga tuu,
mbe sisampefɛɛnlɛ pɛɛri pɛlɛ.
14 Nyiɛkpɔɔ wa u leele je,
a mblɛ lɛ u wolo pre, wa pe wa.
15 We leele kee li kpra ni na,
a mblɛ pe fraka pre
we taa kpra kre kro.
16 Ŋmbi we yiri mbe wi
na sisampefɛɛnlɛ ni,
mbe ni ŋga hin?
A ŋmbi we yire ni jeelee na
mbe wi na sisampefɛɛnlɛ ni hin?
17 Na o Tafun wre nsra ya ni na,
kaa nii wa kuulo ndoo.
18 Ndaa yo na, “Ni mbulɔ mbe to.”
O Tafun, mu koroo kre saara na
mu ni shɔ.
19 Ni jawala na nɛɛ,
a mu foorochiɛn tia ni yiɛshɔ.
20 Ŋu na denyjuu kee lifɛɛnlɛ
mblɛ pe waŋgra jee pre,
wa jaa chaa mbe tni.
21 Pre pe fni mbe yiri
mbe ŋmba u fraka taan,
mbe lewo ŋmba u n yaka pe wre,
gbun na pimi ni mbe sɛ u gbo.
22 La, o Tafun Nyiɛkpɔɔ wre ni le,
mu kɛ tɔ ni na,
mu pe ni fɛndrahaa.
23 O Tafun Nyiɛkpɔɔ,
we pe sisam fɔlɔ tɔ,
pe sisam ndra na, we pe kla peii.