Wuuble mɛɛ ŋga David na kɔ.
92
Ki nyu, mu fna na oo ŋu,o Tafun Nyiɛkpɔɔ Jaŋgafun
wre ŋga mɛɛ,
mbe mɛɛ kɔ mbe mu ŋga.
2 Mbe mu koroo kre kee yo bnimi,
mbe mu kpra kre kee yo blee,
3 juru ŋga mɛnyi yii kɛ, na saŋgo ni
mbe mɛɛ gbun mbe mu ŋga.
4 Ŋgi na hin? Mu kepele tia
ni yiɛ shɔ.
Mu kɛ nyu tnumu tia,
ndaa yɛshɔɔrɔ mɛɛ koni.
5 O Tafun, mu kɛnyu tnumu kee
pe kawako ni,
ki nyina na mu jawala juo.
6 Jijuo wa mu jawala chin,
a daŋgo wa ki nɔɔloo.
7 Sisampefɛɛnlɛ ndra shelifɛɛnlɛ pre,
we lɛ na nyaa yi, mbe nyu
kolo kro na, la mu pe kla putuu.
8 Ŋgi na hin, ŋu o Tafun Nyiɛkpɔɔ,
mu jaŋga wɛ yira kro na.
9 O Tafun Nyiɛkpɔɔ, o chin
na mu mu loŋgoolo kro kla,
mbe sisampefɛɛnlɛ dɔɔya.
10 Mu tia ni faŋga ta
na nyaalam nuu wi,
mu ni ŋga yɛshɔɔrɔ kpɔɔ.
11 A mu tia ni ni loŋgoolo taahaa nya.
Sisampefɛɛnlɛ pre,
ni pe nyɛnɛɛ loo na ndie ni.
12 Lewo ŋmba u fraka kre we lɛ
na abɛ tiŋge yi badaaŋga.
13 Pan u nyi na tiŋge ŋga pe luu
o Tafun wre katoo yi,
Nyiɛkpɔɔ wre titi u ki le.
14 Na tiŋge kre lɛ kuraa kre,
kie sɛŋgɛ ŋga ki fna sɛ,
mbe faŋga ta mbe wrɛ fɔnyi fun,
15 mbe ki nyina na
o Tafun wre fraka,
a wre wi o lefun,
a sisam ka n wa u nu.