HLƐ JIJIRƐ WO
(Mɛɛ Hlɛ 90–106)
Moses nyiɛtalaa.
90
O Tafun, ŋu jaara oo tninyjila kro nu.
2 Nyjila ŋga ni mu nsra ta
mu nyuɛ wa,
ndee mna waŋgra ŋga wa kre,
na Nyiɛkpɔɔ wi ŋu,
a muu wa mbe pe Nyiɛkpɔɔ
nyjila kro nu.
3 Na mu yo na lewo na nyjuro
u ndru mbe kaari tra, we kaari tra.
4 A yɛlɛ kagbeŋge pe mu pan na
ble nunu yi,
pan yi nyi mu pan na aŋge lam ble
ŋga ki tro mu sɛ ŋga yi,
pan ki pe mu pan na ble wɔ,
a ki n mu to a nyiŋge se.
5 Pan mu tia lewo na kuu to,
na ŋunu u ŋunu,
pan u pe to na bnimi nyu nyaa yi,
6 na mu ki nya bnimi,
kie nyu yiɛ na kama,
yila naa yo kie kɔ kre
na ki nyumu fun, mbe ki yua.
7 Mu krɔkuɔn kre tia o kɔ kuraa,
hali waa jaa yaka pe na.
8 Mu o sisam tɛɛ mu yiɛ,
mu tia o sisam nyjɛ o ndra mu pe
yire kro yili mu yiɛ na.
9 Mu krɔ ŋga ki kun na o ni kre,
tia ka kun o ble nyjɛ oo li na,
o ble nyjɛ oo li yire tro na shie
nyaanyaa na nyiɛ ki nyini.
10 Na oo faŋga ta mbe jaa ble yɛ li
tra ŋga na kre,
yie pe yɛlɛ fuloe taarɛ na kɛ.
Na o mu mu tro kuraa kre,
yie pe yɛlɛ fuloe jijirɛ.
La, yire ble nyjɛ o lii nyjɛ krɛrɛ,
nyjɛ o taa yi fnaa,
na kanyana bribri.
Kia mu kuraa, ble yire nyu we to,
mbe o ku mbe sɛ.
11 Ŋmbi u mu krɔkuɔn kpɔɔ kre
damu nya hin?
Ndee mu mu nyibinyiɛ nya
imi na kii fiɛrɛ ni mu da hin?
12 Ti mbe o chin na o ble
nyjɛ o lii yiree fiɛn,
mbe ki ti mbe o kala chin
mbe yi le chichie.
13 O Tafun Nyiɛkpɔɔ,
nyjila ŋgi nu mu krɔ we nyjii hin?
Jande mu sumifɛɛnlɛ fooro le.
14 Ti mbe mu koroo kre o yɔɔ bnimi,
mbe o yiɛshɔ ble nyjɛ oo li kro nu.
15 Nyjila nyjɛ nu mu tia
o yiɛ je yire krɛrɛ,
ti mbe o yiɛ shɔ mbe da ma na.
16 Ti mbe mu sumifɛɛnlɛ mu
kawako kee nyjɛ mu pe yire nya.
Mbe o nanae mu yɛnyiŋge nya.
17 O Tafun Nyiɛkpɔɔ,
ti mbe o mu dwamu ta,
mbe kee ŋga oo pe kro
nyu mbe o ŋga.