Mɛɛ ŋga Ezra ndro Ethan wre na kɔ.
89
Ni Tafun Nyiɛkpɔɔ wre,koroo kpɔɔ kre saara na,
mbe mɛɛ kɔ mbe u ŋga
nyjila kro nu.
A mbe nyu nyaa mbe u kpra
ŋga u lii kre kee yo,
kotɔmblɔ mblɛ pie se pre pan.
2 A mbe yo na mu koroo wa
nyjila kro nu,
a mu kpra kee wa nyjila kro nu,
imi na nyjeerii wa nyjila kro nu kre.
3 Ŋu Nyiɛkpɔɔ yo na,
“Mi titi ndro ŋmba ni wɔ kre,
mi na wre nyu nunu pe.
Ni da mu ni sumifun David ŋga na,
4 mbe ti mbe mu nanae na
ŋunumu lii, nyjila kro nu.
Mbe ti mbe mu ŋujɔɔn kre
tni titɛɛ, nyjila kro nu.”
5 O Tafun, ti mbe nyjeeri bitumblɔ
cheche pre fni nyjeeri wa,
mbe mu kawako kee na mu kpralie
ŋga mɛɛ.
6 Ŋgi na hin?
Ndro ŋmbi uu wa nyjeeri,
mbe pe u tɛɛ mbe mu kra hin?
Ndro n wa nyjeeri wa
mu da na mu ni.
7 Nyjeeri bitumblɔ cheche pre
fni ndoo kre,
pe ŋu Nyiɛkpɔɔ fiɛ wa kpɔɔ.
A pe mu fiɛ mu wɛ mblɛ
pe mu fɛ mu kun kre kro na.
8 O Tafun Nyiɛkpɔɔ Jaŋgafun,
ŋmbi u da na mu ni hin?
O Tafun, mu jaŋga kpɔɔ,
a mu pe kprafun nyjila kro nu.
9 Ŋu jaŋga kii wa epo na,
na ki fuflɛ pnaŋa
mbe mu jaa ti ki nyu nyjii.
10 A ŋu mu Egypt kla
mu ki dɔɔya poŋgo.
Mu jaŋga kre ni mu tɛɛ mu
mu loŋgoolo gbun mu nyina.
11 Mu wo yi nyjeeri na tra,
a waŋgra ŋga na yirɛ nyjɛ yii wa
ki nu kro, ŋu mu yi wa.
12 Ŋu mu nyjeeri haa,
na tapan haa tra yire kro wa,
a nyua Tabor, na nyua Hermon,
lawee yire leele yɛshɔɔrɔ tɛɛ,
na mɛɛ koni na mu mɛɛ yeeri.
13 Mu jaŋga kpɔɔ,
a mu faŋga ŋmbrɔ n wa.
14 Frakaa na kprakuɔn,
na mu ŋunumulie yire,
a ŋga mu pini kro,
mu koroo na mu frakaa nyina.
15 Leele mblɛ pe o Tafun wre
ŋga mɛɛ mu chin,
na taari u kolo ŋga u pe nyina
na kre wo yi dwamu.
16 Mu saara na pe yɛshɔɔrɔ taa
nyjila kro nu,
a pe mu frakaa kre kee yuu
nyjila kro nu.
17 Ŋu wi o yɛnyiŋge na o faŋga,
a mu koroo kre na
o o loŋgoolo ja.
18 O Tafun wre u kɛ toni o na,
ŋu Israel Nyiɛkpɔɔ
ŋmba mu pe cheche wre,
ŋu mu o ŋga o ŋunu.
19 Mna paara fa mu sumifɛɛnlɛ
mblɛ pra mu shɔnli pre pan na,
“Ni yirifuŋu wa wɔ mu yili u leele nu,
mu u pe ŋunɔwifun badaaŋga.
20 Ni ni sumifun David nya,
mu u pe ŋunu,
mu u fa na ni simi cheche kre ni.
21 Mbe ni jaŋga le u nu,
a ni faŋga we ti mbe u yire.
22 U loŋgoolo wa jaa jaŋga
ta u na fio,
a sisampefun wa wa u ja fio.
23 Mbe u prafɛɛnlɛ tre u yiɛ,
a u loŋgoolo krɛrɛ
mbe pe gbo peii.
24 Mbe u kori, mbe yire u kro,
a ni mɛɛ kre na u jaŋga we kpɔɔ.
25 Mbe ti u ŋunumulie yire
epo nyu na, mbe sɛ su,
lɔɔ kpɔɔ kre nyu na.
26 Wre titi we nyu nyaa mbe yo na,
‘Ŋu wi ni lɛ, ni Nyiɛkpɔɔ,
ni ŋmaashɔfun na ni lefun.’
27 A mbe u pe ni bijlo,
a wre wi ŋunu kpɔɔ
waŋgra ŋga kro nu.
28 A mbe ni koroo kre wɔ mbe u ŋga,
nyjila kro nu,
a mba ni nyu nunu
ŋga ni pe na u ni kre kla fio.
29 A u ŋujɔɔn kre we tni titɛɛ,
imi na nyjeeri wa mu yire titɛɛ kre.
A mbe ti u nanae ŋunumu li
nyjila kro nu.
30 “La, na u nanae waa ndie kan,
a pe nsra li ni mbra na,
a pe n shia taa ni nyu kee na kre,
31 na pe waa ni nyu kee je,
a pe n shia taa ki na,
32 mbe pe ndie tini pe sisam na,
a pie pe punɔɔ yire kanyana nya.
33 La, David rɛ,
mbe u kori nyjila kro nu,
a mbe li ni nyu kee
ŋga ni yo u pan kre na.
34 A nyu nunu ŋga mi na wre pe kre,
mba ki kla,
a mba kɔ ni nyu kee,
nyjɛ ni yo yire ka na.
35 Ŋga ni pe cheche kre ndra na,
ni da na mba kala fnɛ
David pan fio.
36 U nanae wa kɔ fio,
a u ŋujɔɔn kre we yire,
imi na yilaa wa mu na yilii
nyjila kro nu kre.
37 U ŋujɔɔn kre we yire,
imi nyiɛpɔɔ wa mu na yilii
nyjila kro nu kre,
a u ŋunumu lie kre wa to fio.”
38 La, ŋu Nyiɛkpɔɔ mu krɔ kun,
na mu ŋunu ŋmba mu wɔ kre ni,
mu u wɔ mu ŋga mu u je.
39 Mu nyu nunu ŋga
ŋu na mu sumifun wre pe kre,
mu ki kla.
Mu u ŋujuulee kre wa frɛrɛ nu.
40 Bubuŋgo ŋga u sin,
mu u chia fɛ mu kun kuraa kre,
mu ki juari.
Yirɛ nyjɛ yi chia kre yii
mu ki ŋga faŋga kro,
mu yi juari kro.
41 Ki tia mblɛ pe tro chia kre na
kro na u juu.
A u tnifɛɛnlɛ u ta na tɛɛ.
42 Mu tia u loŋgoolo u ja a pe yiɛ shɔ.
43 Mu tia u ŋunɔ wiyirɛ nyu pin,
a ki tia pe u ja ŋunɔ.
44 Mu n tia u yɛnyiŋge ta,
a u ŋunumulie to.
45 Mu tia u lɛ nyaanyaa,
mu tia u yiɛ le nyumu.
46 O Tafun, mu muyɛ ndra ni na
mbe sɛ su nyjila kro nu ree?
A mu krɔ ŋga ki kun,
na nyini na kanhun yi ŋga,
nyjila ŋgi nu ki nyu we nyjii hin?
47 Sɔɔnri na ni ŋmaa n tnu,
mu sɔɔnri na gbeele
mu lewo gbeele,
a wa kro mbe tni nyjila kro nu.
48 Ndro ŋmbi uu wa mbe tni
mbe wa ku hin?
Ndee ŋmbi we jaa u nyiɛ shɔ
kuulo kɛɛ hin?
49 O Tafun, mu koroo kpɔɔ,
sena mu koroo ŋga mna ta,
mu lewo ŋga fa kre nyi hin?
Mu koroo ŋga na mna yire,
mna mu kpra daŋga da
mu David ŋga kre,
sena ki nyi hin?
50 O Tafun, imi na
pe mu sumifun pini
na tɛɛ mu da kre sɔɔnri.
Leele mblɛ pe n mu chin
pre ni suni, a ni frɔ.
Kena jande ni frɔŋgɔ
ŋga ni ta kre le.
51 O Tafun, mu loŋgoolo pre
mu ŋunu ŋmba mu wɔ,
mu u fa simi ni wre pini na tɛɛ,
mna we tro kpan, tɛɛ pe u tɛɛ.
52 E o Tafun Nyiɛkpɔɔ wre ŋga mɛɛ,
nyjila kro nu, Ami!