Korah bibilɛ mɛɛ ŋga pra kɔ.
88
O Tafun,o ŋmaashɔfun Nyiɛkpɔɔ,
mbe nyɛni mbe mu yeeri
lafo na blee,
2 ti mbe ni nyiɛtalaa le mu ndie,
mbe mu ni kee loo ni pan.
3 Ŋgi na hin? Kanyana ni da,
a ni ŋmaa na shie kumu nu.
4 Pe ni tɔɔnri mu chaa,
mblɛ pie le faŋga nu kre nu,
a faŋga ka n wa ni nu na.
5 Pe ni chaa kuulo nu,
a ni sɛ pe na leele mblɛ pe le wee,
mu pe kee fɛɛ,
a ma jaa ya pe na lɛ.
6 Ŋu mu ni le faŋga ŋga ki juo nu.
Wee ŋga lam ki wɔ kprikpri,
mu juo titi nu mu ni le.
7 Mu krɔ kun na ni ni kpɔɔ mu tro,
a ki tia mba jaa yaka pe na.
8 Mu ni chinfɛɛnlɛ kro ni ni jaara,
mu tia ni kaari afuŋgo yira pe pan.
Mu ni tɔ plimplim,
a mba jaa yili.
9 Kanyana tia mba jaa nyiɛlɛ nyaa.
O Tafun, blenyini ŋga
ni kɛnyi yire nyjeeri na mu tali.
10 Gboolo wa jaa mu kawako kee
nyjɛ mu piin nya.
Pan chɔɔ gboolo wa jaa yiri
mbe mu ŋga mɛɛ.
11 Ndee pie mu koroo kee yo
faŋga wa ree?
Ndee pie mu kpra kre kee yo
kuulo ndoo wa ra?
12 Pe mu kawako kee yire chin,
wɔmu ndoo kre nu ree?
A mu frakaa kre, pe ki chin leele
mblɛ kee pe fɛɛ tra nu ree?
13 La, o Tafun ni nyɛni na mu yeeri,
mbe mu paan ya ni na.
Bnimi kpan mi na ŋu we paara.
14 O Tafun mni a mu ni je hin?
Mni a mu yiɛ wɔ ni na hin?
15 Mu yire ni bimi kre ni kala nya,
mu mbra kumu na.
Ni ndie tiniɛ, na mu fiɛrɛ tia,
ni faŋga kɔ ni nu.
16 Mu krɔ kun na ni ni kpɔɔ,
a ni ndie tiniɛ kre ni kla.
17 Blenyini ŋga, pan yire kee nyjɛ
ni fɛ mu kun,
na lɔɔ lalaa ni nyi mu yire,
a nyumu ni tɔ poŋgo.
18 Mu ni nɔɔlɔ mblɛ mi na pre
mbra kuraa laa ni na,
a ki sɛ kro mi nunu kanyana nu.