David nyiɛtalaa.
86
O Tafun Nyiɛkpɔɔ,ndie tɛɛ ni pan. Ŋgi na hin?
Foorofun na shianfun wi mi.
2 Ni shɔ kumu kɛɛ. Ŋgi na hin?
Ni fraka mu yiɛ,
a ni Nyiɛkpɔɔ wi ŋu.
Mu sumifun wi mi
a ndaa dankna mu na, kena ni shɔ.
3 O Tafun, ni fooro le.
Ŋu ni nyɛni na yeeri blenyini ŋga.
4 O Tafun Nyiɛkpɔɔ,
mu sumifun wi mi,
kena jande, ni ŋga yɛshɔɔrɔ.
Ŋgi na hin?
Ŋu ni tali nyjila kro nu.
5 A ŋu o Tafun, ŋu mu nyu,
a ŋu mu tii na kee.
A mblɛ pe mu yeerii kre
mu koroo kpɔɔ mu pe ŋga.
6 O Tafun, ndie tɛɛ mu ni nyiɛtalaa
na ni nyɛnɛɛ loo.
7 Ni kanyana ble,
mbe nyɛni mbe mu yeeri.
Ŋgi na hin? Mu loo ni pan.
8 Sɛɛnlɛ nyjɛ yii wa tra ŋga na kre,
ka n wa mu da ŋu o Tafun wre ni.
Sɛɛn n wa mbe jaa kawako kee
nyjɛ mu pe yire ka pe.
9 O Tafun, leele mblɛ mu wa kro,
pie paan kosie kan mu yiɛ,
mbe mu mɛɛ kre ŋga yɛnyiŋge.
10 Mu kpɔɔ, na kawako kee pini,
a ŋu chiin wi Nyiɛkpɔɔ.
11 O Tafun ni nyina mu kolo,
mbe ni jaa nyaari mu kpra kre na,
ni ŋga yɛnyiŋge nyjila kro nu.
12 Ni Tafun Nyiɛkpɔɔ,
mbe ni loloŋgo kro tɛɛ
mbe mu ŋga mɛɛ,
mbe mu mɛɛ ŋga yɛnyiŋge
nyjila kro nu.
13 Mu koroo kpɔɔ mu ni ŋga,
mu ni nyiɛ wɔ mu yili kuulo nu.
14 Mblɛ pe peyɛ kpɔɔri
yiri mu ni taan,
ndra shelifɛɛnlɛ peyɛ nya
na ni chaa mbe gbo,
pe kee ka ma na mu ni kuraa.
15 La, ŋu o Tafun, ŋu wi Nyiɛkpɔɔ,
fooro chinfun na dumifun,
mu krɔ n na kun nyaanyaa,
a mu koroo na mu kpraa wa
nyjila kro nu.
16 Kena ni le, mu ni fooro le,
mu sumifun wi mi,
ni ŋga faŋga mu ni shɔ.
Ŋgi na hin? Ni mu sumi
imi na ni lo na mu sumi kre.
17 Mu chichie pee sɛmbɛɛrɛ
gbun ni pan,
mbe ni loŋgoolo ni nya,
mbe nyifɛɛrɛ pe gbo. Ŋgi na hin?
Ŋu o Tafun mu ya ni na,
mu ni ŋga gbunyiŋge.