Korah bibilɛ mɛɛ ŋga pra kɔ.
85
O Tafun, mu tia mu tra kredwamu ta,
a mu leele Israel leele pre,
ndru mu peyɛ ta.
2 Mu mu leele sisam kro ti mu pe kɛ,
mu pe sisam kro pɔ mu laa pe na.
3 Mu tia mu krɔ ŋga ki kun
na pe ni kre nyu to,
a mu krɔ sisaa kre nyu nyjii.
4 O Ŋmaashɔfun Nyiɛkpɔɔ,
ndru mu pan na o ni mu jaara.
Mu mu krɔ ŋga ki kun na o ni kre,
wɔ mu lɛɛ.
5 Mu ti mbe mu krɔkun na o ni,
mbe sɛ su nyjila kro nu ree?
Kena mu krɔkuɔn kre,
nyu waa to kuraa ra?
6 Jande ndru mu o ŋga ŋmaa,
mbe mu leele yiɛshɔ mu na.
7 O Tafun Nyiɛkpɔɔ,
ti mbe o mu koroo kre nya,
mu o ŋga mu ŋmaashɔmu.
8 Mbe kee ŋga o Tafun Nyiɛkpɔɔ
wre yo loo,
u nyu yo na we u leele mblɛ
pe fraka pre ŋga wejinyiŋge,
na pe laa pe jijiere kee
yire pee na wala.
9 Yɛŋgɛ na, mblɛ pe u fiɛ kre,
we pe ŋga ŋmaashɔmu,
a wa la pe jaara fio.
10 Koroo na kpra yi lii na fni,
a frakaa na wejinyiŋge
yi chaa mbe tni.
11 Kpralie we fin mbe yili tra yiɛ na,
a frakaa we yire nyjeeri
mbra lewo le tra.
12 O Tafun wre we o ŋga
yira chichie,
mbe yirɛ nyjɛ oo luu bie sɛ
imi na ki fna.
13 Frakaa kie yiɛ klu
o Tafun wre pan,
mbra kolo gbeele u pan
mbe u tro.