Korah bibilɛ mɛɛ ŋga pra kɔ.
84
O Tafun Nyiɛkpɔɔ Jaŋgafun,ni mu Sumindoo kre kori titi.
2 Bawa la ni ta,
a ndaa yɛshɔɔrɔ mɛɛ koni
na mu kaan.
3 O Tafun Jaŋgafun,
ni ŋunu na ni Nyiɛkpɔɔ,
chlochloe kuraa lawee ta
mu tni mu tnihaa wa,
mu zeere le mu pe biile le,
hali, pe lawee ta mna mu
sragbuɛnlɛɛ yire nyi kre tata.
4 Mblɛ pee wa mu tni mu katoo wa,
na mɛɛ koni nyjila kro nu,
na mu kaan pre wo yi dwamu.
5 A mblɛ pe faŋga ta mu yiri mu pan,
mu Zion nyua kre kofrakaa yii,
mbe sɛ mu katoo
pre wo yi dwamu.
6 Na pe nyaari mu tro
Baca nyua landɛɛ kre nu,
a koo nyjila nyiɛ
pan mu weele nyi kre,
mbe bawa kaari blo lawee.
7 Pe kro we nyaari faŋga ni,
mbe faŋga ta
mbe yire mu yiɛ Zion na.
8 O Tafun Nyiɛkpɔɔ Jaŋgafun,
ni talaa loo,
Jacob Nyiɛkpɔɔ, ndie tɛɛ ni pan.
9 Nyiɛkpɔɔ, ŋu wi ŋunɔ wiyira
ŋga ki o toni.
Ŋunu ŋmba mu wɔ wre fooro le.
10 Na ni tni mu katoo
ble nunu chom kre,
ki nyu mu wɛ ŋga mbe tni
lawee waa ka nu yɛlɛ kagbeŋge.
Na ni ni Nyiɛkpɔɔ wre
katoo jlonwee nyu sri,
ki prɔ ŋga mi na sisampefɛɛnlɛ
we chaa mbe tni na.
11 O Tafun Nyiɛkpɔɔ,
wre wi nyisee, na o lefun,
wre u o kaan dumiɛn na yɛnyiŋge,
a mblɛ pe nyaari u kolo na kre,
wa chichie ndra pe na fio.
12 O Tafun Jaŋgafun,
lewo ŋmba u dankna mu na
wre wo yi dwamu.