Asaph mɛɛ ŋga wra kɔ.
83
Nyiɛkpɔɔ maa pieri,a maa ti mbe mu nyu ku.
2 Le imi na mu loŋgoolo gble leni,
a mblɛ pe mu pra pre yiri,
mu mu taan.
3 Kachindɛ kolo pe wru,
na mu leele pre chaa mbe kla,
pe yiri mu mu leele,
mblɛ na mu kɛ toni pre taan.
4 Pe yuu peyɛ pan na,
e pan mbe o pe kla peii
mbe pe nɔɔ fun,
mbe ndro waa Israel leele
sɔɔnri na fio.
5 Pe fni titɛɛ mu jina to,
na nyu nunu pini
mbe yiri mbe mu taan.
6 Edom leele na Ishmael leele,
Moab leele na Hagar nanae,
7 Gebal leele na Ammon na Amalek,
na Philistine na Tyre leele,
8 Assyria leele kro pan
mu ya Lot nanae na,
mbe pe kro paan wi na mu leele ni.
9 Jande pe pe imi na
mna Midian leele pre pe kre,
na imi na mna Sisera na Jabin pe,
Kishon lɔɔ kre mbɛɛ na kre.
10 Mna pe kla chia ŋga pe yeeri
Endor kre na,
a pe gboolo na fɔɔn
chia kre na kro.
11 Pe loplombo pre pe,
imi na mna Oreb na Zeeb pe kre.
Mu pe ŋulo kro pe, imi na mna
Zebah na Zalmunna ŋulo pe kre.
12 Pre pra yo mbo,
“E ti o tra kre wru mbe tni.”
13 Ni Nyiɛkpɔɔ, pe pe na kra
nyjɛ legboo fuflɛ wru na shie yi,
mbe pe nyina.
14 Pe pe imi kanhun klɔ shio,
mbe sɛ le nyua nu,
mbe ki mbɛɛlɛ lala putuu kre yi.
15 Mu fuflɛ kpɔɔ kre tɛɛ
mu pe kɔŋgɔ ni,
mu ti mbe fiɛrɛ kpɔɔ pe yii.
16 O Tafun Nyiɛkpɔɔ,
ti pe mu jaŋga kre nya,
mbe nyifɛɛrɛ pe gbo.
17 Mbe mu ti pe to,
mbe fiɛrɛ kpɔɔ pe yii,
mbe pe nyifɛɛrɛ kumu ku.
18 Ti mbe pe chin
na ŋu chiin wi o Tafun,
a ŋu chiin wi Nyiɛkpɔɔ Jaŋgafun,
ŋmba mu waŋgra ŋga le.